ފަނޑިޔާރުންނާއި ޝަރުއީ ދާއިރާގެ މުވައްޒަފުންނަށް ކޮވިޑް-19ގެ ވެކްސިން ދޭން ފަށައިފިއެވެ.

ޖުޑިޝަލް ސަރވިސް ކޮމިޝަން (ޖޭއެސްސީ)ން ބުނީ އާއްމުންނަށް ޚިދުމަތްދިނުމުގައި މަސައްކަތް ކުރާ ފަނޑިޔާރުންނާއި ޝަރުއީ ދާއިރާގެ މުވައްޒަފުންނަށް ކޮވިޑް-19 ގެ ވެކްސިންޖެހުމުގެ އިންތިޒާމް ހަމަޖައްސާފައިވާ ކަމަށެވެ.

އެގޮތުން ބުދަ ދުވަހު ވެކްސިން ދޭން ފަށާފައިވާ ކަމަށް ޖޭއެސްސީން ބުނެއެވެ.

ރާއްޖޭގައި ފެބްރުއަރީ މަހުގެ އެއްވަނަ ދުވަހު ވެކްސިނޭޝަން ޕްރޮގްރާމް ފަށާފައިވާއިރު، މިހާތަނަށް ސަރުކާރުގެ ގިނަ އިސްވެރިންތަކެއް ވަނީ ވެކްސިން ޖަހާފައެވެ. އަދި ސިއްހީ ޚިދުމަތްތެރިންނާއި، ސިފައިންނާއި ފުލުހުންގެ އިތުރުން ވެސް އެކި މުއައްސަސާތަކުގައި މަސައްކަތް ކުރާ މީހުން ދަނީ ވެކްސިން ޖަހަމުންނެވެ.

ވެކްސިން ދިނުމުގެ ޕްރޮގްރާމް ހަލުވިކަމާއެކު ކުރިއަށް ދާއިރު މާލެ ސަރަހައްދުގައި ދިރިއުޅޭ އުމުރުން 45 އަހަރުން މަތީގެ މީހުންނަށް ކޮވިޑް-19 ވެކްސިން ޖެހުން ބުދަ ދުވަހު ވަނީ ފަށާފައެވެ.

އެގޮތުން މި ފަރާތްތަކަށް ވެކްސިން ޖެހުމުގެ ކަންތައްތައް ސޯޝަލް ސެންޓަރުން 9:00ން 17:00ށް އަދި ހުޅުމާލެ ވެކްސިނޭޝަން ސެންޓަރ (ހުޅުމާލޭ ފްލޫ ކްލިނިކް) 9:00ން 17:00ށް އަދި ވިލިމާލެ ޔޫތު ސެންޓަރުން 9:00ން 13:00ށް ކުރިއަށްދާނެ ކަމަށް ވަނީ ބުނެފައެވެ.