އިނގިރޭސި ޕްރިމިއާ ލީގުގައި އާދީއްތަ ދުވަހުގެރޭ ލިވަޕޫލުގެ ދަނޑުގައި ކުޅުނު މެޗުން މެންޗެސްޓާ ސިޓީން ތާރީޚީ ބޮޑު މޮޅެއް ހޯދައިފިއެވެ.
އެންމެ ފަހުގެ ޗެމްޕިއަން ލިވަޕޫލް އަތުން ސިޓީ މޮޅުވީ 4-1 ގެ ނަތީޖާއަކުންނެވެ. މިއީ 2003 ވަނަ އަހަރަށް ފަހު ލީގުގައި ސިޓީން ލިވަޕޫލް ދަނޑުގައި ހޯދި ފުރަތަމަ މޮޅެވެ. އަދި މިއީ 1963 ވަނަ އަހަރަށް ފަހު ލިވަޕޫލުން ލީގުގައި އަމިއްލަ ދަނޑުގައި ޖެހިޖެހިގެން ތިން މެޗުން ބަލިވި ފުރަތަމަ ފަހަރެވެ. އަދި މި މޮޅާއެކު ސިޓީން ވަނީ ހުރިހާ މުބާރާތެއްގައި ޖެހިޖެހިގެން 14 މެޗުން މޮޅުވެ ރިކޯޑަކާ ހަމަކޮށްފައެވެ.
އާދީއްތަ ދުވަހުގެރޭ ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، މި ހާފުގައި ލީޑު ނަގަން ސިޓީއަށް ވަނީ ޕެނަަލްޓީއެއް ލިބިފައެވެ. އެކަމަކު އެ ޓީމުގެ އިލްކާއި ގުންޑޮގާން ފޮނުވާލި ޕެނަލްޓީ ދިޔައީ ގޯލުގެ ހުރަސް ދަނޑިމަތިން ބޭރަށެވެ. މިއި އޭރިއާ ތެރެއިން ސިޓީގެ ރަހީމް ސްޓާލިންނަށް ލިވަޕޫލުގެ ފަބީނިއޯ ކުރި ފައުލަކަށް ރެފުރީ ދިން ޕެނަލްޓީއެކެވެ.
އޭގެ ފަހުން ދެވަނަ ހާފުގައި ސިޓީން ކުޅުން ރަނގަޅުކުރިއިރު، މި ހާފު ފަށައިގެން ހަތަރުވަނަ މިނެޓުގައި ގުންޑޮގާން ވަނީ ލަނޑެއް ޖަހައި އެ ޓީމަށް ލީޑު ނަގައިދީފައެވެ. އެކަމަކު މެޗުގެ 63 ވަނަ މިނެޓުގައި ލިބުނު ޕެނަލްޓީއަކުން ލިވަޕޫލަށް ނަތީޖާ އެއްވަރުކޮށްދިނީ މުޙައްމަދު ސަލާހެވެ. މިއީ އޭރިއާ ތެރެއިން ސަލާހަށް ސިޓީގެ ރުބެން ޑިއާޒް ކުރި ފައުލަަކަށް ރެފުރީ ދިން ޕެނަލްޓީއެކެވެ.
މި މެޗުގައި ސިޓީން ދެވަނަ ފަހަރަށް ލީޑު ނެގީ 73 ވަނަ މިނެޓުގައި ލިވަޕޫލުގެ ގޯލްކީޕަރު އެލިސަން ބެކާ ހެދި ގޯހެއްގެ ފައިދާނަގައި ގުންޑޮގާން ކާމިޔާބުކުރި ލަނޑުންނެވެ. އަދި އޭގެ ތިން މިނެޓު ފަހުން އެލިސަން ހެދި އިތުރު ގޯހެއްގެ ފައިދާނަގައި ސްޓާލިން ވަނީ ސިޓީއަށް ލީޑު ފުޅާކޮށްދީފައެވެ. ދެން މި މެޗުގައި ސިޓީން ކާމިޔާބުކުރި ހަތަރުވަނަ ލަނޑު މެޗު ނިމެން ހަތް މިނެޓަށް ވެފައި ވަނިކޮށް ކާމިޔާބުކޮށްދިނީ ފިލް ފޯޑެންއެވެ.
މި މޮޅާއެކު ސިޓީން ވަނީ ލީގުގެ އެއްވަނައިގައި ފަސް ޕޮއިންޓުގެ ލީޑެއް ނަގާފައެވެ. އެގޮތުން އެ ޓީމު އެއްވަނައިގައި އޮތީ ކުޅުނު 22 މެޗުން ލިބުނު 50 ޕޮއިންޓާއެކުއެވެ. ދެވަނައިގައި އޮތް މެންޗެސްޓާ ޔުނައިޓެޑަށް 23 މެޗުން 45 ޕޮއިންޓް ލިބިފައިވާއިރު، ލިވަޕޫލް ހަތަރުވަނައިގައި އޮތީ 23 މެޗުން 40 ޕޮއިންޓާއެކުއެވެ.
މީގެ އިތުރުން ތާވަލުގެ ފަސްވަނައަށް ޗެލްސީ ޖެހިލީ އާދީއްތަ ދުވަހުގެރޭ ޝެފީލްޑް ޔުނައިޓެޑް އަތުން 2-1 ގެ ނަތީޖާއަކުން މޮޅުވެގެންނެވެ. މި މެޗުން ޗެލްސީ މޮޅުވިއިރު، އެ ޓީމުގެ ކޯޗުގެ މަގާމާ ތޯމަސް ޓުޗެލް ހަވާލުވި ފަހުން ކުޅުނު ހަތަރު މެޗުންވެސް ޗެލްސީ ބަލިވެފައެއް ނުވެއެވެ.
ޝެފީލްޑުގެ ދަނޑުގައި ކުޅުނު މެޗުގެ ފުރަތަމަ ހާފުގައި ޗެލްސީން ވަނީ ލީޑު ނަގާފައެވެ. ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް މި ލަނޑު އެ ޓީމަށް ކާމިޔާބުކޮށްދިނީ މޭސަން މައުންޓެވެ. އެކަމަކު ދެވަނަ ހާފު ފަށައިގެން ވަނަ މިނެޓުގައި ޗެލްސީގެ އެންޓޯނިއޯ ރުޑިގާ އަތުން ބައިކޮޅަށް ވަން ލަނޑުން ޝެފީލްޑުން ވަނީ ނަތީޖާ އެއްވަރުކޮށްފައެވެ. މި މެޗުގައި ޗެލްސީން ދެވަނަ ފަހަރަށް ލީޑު ނެގީ އޭގެ ތިން މިނެޓު ފަހުން ޖޯޖީނިއޯ ކާމިޔާބުކުރި ޕެނަލްޓީންނެވެ.
މި މޮޅާއެކު ތާވަލުގެ ފަސްވަނައަށް ޗެލްސީ ޖެހިލީ 23 މެޗުން 39 ޕޮއިންޓާއެކުއެވެ. އަދި ޗެލްސީ އަތުން ބަލިވި ޝެފީލްޑް އޮތީ ތާވަލުގެ ފުލުގައި 23 މެޗުން 11 ޕޮއިންޓާއެކުއެވެ.
