އިތުރު 127 މީހުން ކޮވިޑަށް ޕޮޒިޓިވްވިއިރު، 2000ށް ވުރެ ގިނަ މީހުން ވެކްސިން ޖަހައިފި
އާދީއްތަ ދުވަހު 2،898 މީހުން ވަނީ ވެކްސިން ޖަހާފައި
ކޮވިޑް-19ގެ ރޭންޑަމް ސާމްޕަލިންގ ނަގަމުން ދަނިކޮށް
ފާއިތުވެދިޔަ 24 ގަޑިއިރު ތެރޭގައި ރާއްޖެއިން 127 މީހުން ކޮވިޑް-19ށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން ހާމަކޮށްފައިވާ ތަފާސް ހިސާބުތަކުން ދައްކާ ގޮތުން ހޮނިހިރު ދުވަހުގެ ހަވީރު 06:00ން ފެށިގެން އާދީއްތަ ދުވަހުގެ ހަވީރު 06:00 އާއި ހަމައަށް 3،151 މީހުން ކޮވިޑަށް ޓެސްޓު ކޮށްފައިވާ ކަމަށެވެ. އަދި އޭގެ ތެރެއިން 127 މީހުން ޕޮޒިޓިވްވެފައިވާ ކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.
އެޗްޕީއޭގެ ތަފާސް ހިސާބުތައް ދައްކާ ގޮތުން އާދީއްތަ ދުވަހު ޕޮޒިޓިވްވި މީހުންގެ ތެރެއިން 92 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އަދި އަތޮޅު ތެރެއިން 15 މީހުން ޕޮޒިޓިވްވެފައިވާއިރު، ރިސޯޓުތަކުން 7 މީހަކު ވަނީ ޕޮޒިޓިވްވެފައެވެ. މީގެ އިތުރުން ނުހުޅުވާ ރިސޯޓުތަކުން 7 މީހަކު ޕޮޒިޓިވްވެފައިވާ ކަމަށް އެޗްޕީއޭގެ ތަފާސް ހިސާބުތަކުން ދައްކައެވެ.
އާދީއްތަ ދުވަހު 2،898 މީހަކު ވެކްސިން ޖަހާފައިވާއިރު މާލެ ސަރަހައްދުން 2،375 މީހަކު ވަނީ ވެކްސިން ޖަހާފައެވެ. އަދި އަތޮޅު ތެރެއިން 523 މީހަކު ވެކްސިން ވަނީ ޖަހާފައިވާކަމަށް އެޗްޕީއޭއިން ބުނެއެވެ.
އެއާއިއެކު ވެކްސިން ޖެހި މީހުންގެ އަދަދު 9،752ށް އަރާފައިވާއިރު، މާލެ ސަރަހައްދުން 7،963 މީހަކު މިހާތަނަށް ވަނީ ވެކްސިން ޖަހާފައެވެ. އަދި އަތޮޅު ތެރެއިން 1،789 މީހަކު ވަނީ ވެކްސިން ޖަހާފައެވެ.
އާދީއްތަ ދުވަހު ޕޮޒިޓިވްވި 127 މީހުންނާއިއެކު ޕޮޒިޓިވްވި މީހުންގެ އަދަދު ވަނީ 16،783ށް އަރާފައެވެ. އަދި އެކްޓިވް ކޭސްތަކުގެ އަދަދު 2.117ށް އަރާފައިވާއިރު ހޮސްޕިޓަލުގައި އެޑްމިޓް ކޮށްގެން 207 މީހަކަށް އަންނަނީ ފަރުވާ ދެމުންނެވެ. ރާއްޖެއިން މިބަލީގައި 55 މީހަކު ނިޔާވެފައިވާއިރު، 14،604 މީހުން ވަނީ ބަލިން ފަސޭހަވެފައެވެ.
