118 މިލިއަނަށް ހުޅުމާލޭގެ ދެވަނަ ފިޔަވަހީގެ ފުރަތަމަ ސްކޫލު އިމާރާތް ކުރުމަށް ބަޔަކާ ހަވާލުކޮށްފި
7 ފެބުރުއަރީ 2021 | އާދީއްތަ 17:39މި އިމާރާތުގެ މަސައްކަތް 390 ދުވަހުގެ ތެރޭގައި ނިންމަން ޖެހޭ
އެއްބަސްވުމުގައި ސޮއިކުރުމުގެ ރަސްމިއްޔާތުގެ ތެރެއިން
ހުޅުމާލޭގެ ދެވަނަ ފިޔަވަހީގެ ފުރަތަމަ ސްކޫލު "ސަލާހުއްދީން ސްކޫލު" އިމާރާތް ކުރުމަށް ބަޔަކާ ހަވާލުކޮށްފިއެވެ.
އާދިއްތަ ދުވަހު އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި "ސަލާހުއްދީން ސްކޫލު" ގެ މަސައްކަތް ހަވާލުކޮށްފައިވަނީ އަމީން ކޮންސްޓްރަކްޝަން ޕްރައިވެޓް ލިމިޓެޑާއެވެ. މި އެއްބަސްވުމުގައި އެޑިޔުކޭޝަން މިނިސްޓްރީންގެ ފަރާތުން ސޮއިކުރެއްވީ ސްޓޭޓް މިނިސްޓަރު އަހުމަދު ރިޔާޒެވެ. އަމީން ކޮންސްޓްރަކްޝަނުން ސޮއިކުރެއްވީ ޑިރެކްޓަރު މުހައްމަދު އިރުފާނެވެ.
އަމީން ކޮންސްޓްރަކްޝަންއާއި މިމަސައްކަތް ހަވާލުކޮށްފައިވަނީ 118,336,879.62( ސަތޭކަ އަށާރަ މިލިއަން ތިންލައްކަ ތިރީސް ހަ ހާސް އަށްސަތޭކަ ހަތްދިހަ ނުވަ ރުފިޔާ ފަސްދޮޅަސް ދެ ލާރި) އަށެވެ.
އެޑިއުކޭޝަން މިނިސްޓްރީން ބުނީ މި އިމާރާތުގެ މަސައްކަތް 390 ދުވަހުގެ ތެރޭގައި ނިންމަން ޖެހޭ ކަމަށެވެ.
އެއްދަންފަޅިއަށް ސްކޫލުތައް ބަދަލުކުރުމަކީ މިސަރުކާރުގެ ސިޔާސަތަކަށްވާއިރު، ސަލާހުއްދީން ސްކޫލުގައި ވެސް ކިޔަވައިދިނުމަށް ޕްލޭން ކޮށްފައިވަނީ އެއްދަންފަޅި އަކަށެވެ. ދެވަނަ ފިޔަވަހީގައި އިތުރު ސްކޫލުތައްވެސް އެޅުމުގެ މަޝްވަރާތައް ކުރަމުންދާއިރު، ސަލާހުއްދީން ސްކޫލަކީ މިދިޔަ އަހަރުގެ ޕީއެސްއައިޕީ ބަޖެޓުން ޚަރަދުކޮށްގެން އިމާރާތް ކުރަން ހަމަޖެއްސި ސްކޫލެކެވެ. ނަމަވެސް ކޮވިޑު-19ގެ ސަބަބުން ސްކޫލުގެ މަސައްކަތް، މި އަހަރަށް ފަސްކުރީ އެވެ.
