ޒިދާނުގެ ހިތްހަމަނުޖެހުން ނޫސްވެރިންނަށް

ރެއާލް މެޑްރިޑުގައި އޭނާގެ މުސްތަގުބަލާ ބެހޭ ގޮތުން ހަގީގަތާ ޚިލާފު ވާހަކަތައް ފަތުރާތީ އެ ޓީމުގެ ކޯޗު ޒިނެދިން ޒިދާން ވަރަށް ބޮޑަށް ހިތްހަމަނުޖެހުން ފާޅުކޮށްފިއެވެ.

މި ސީޒަނުގައި ރެއާލުގެ ކުޅުން ވަރަށް ބޮޑަށް ދަށްވެފައިވާއިރު، މީގެ ކުރިން ސްޕެއިނުގެ މީޑިއާތަކުން ވަނީ އެ ޓީމުގެ ކޯޗުގެ މަގާމުން ޒިދާން ވަކިކުރާނެ ކަމަށް ރިޕޯޓުކޮށްފައެވެ. މީގެ އިތުރުން ބައެއް މީޑިއާތަކުން ވަނީ ރެއާލުގެ ކޯޗުން އަވަސް މުސްތަގުބަލެއްގައި ޒިދާން އިސްތިއުފާދޭނެ ކަމަށްވެސް ރިޕޯޓުކޮށްފައެވެ.

އެކަމަކު ދާދި ފަހުން އޮތް ނޫސްވެރިންގެ ބައްދަލުވުމުގައި ނޫސްވެރިއަކު ޒިދާނުގެ މުސްތަގުބަލާ ބެހޭ ގޮތުން ސުވާލުކުރުން އޭނާ ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފައެވެ. އެގޮތުން ޒިދާން ބުނީ އޭނާއާ މެދު މީޑިއާއިން ކަންތައްކުރާ ގޮތް އިންސާފުވެރިކަމަށް ނުދެކޭ ކަމަށެވެ. އަދި ރެއާލަކީ ސްޕެނިޝް ލީގުގެ އެންމެ ފަހުގެ ޗެމްޕިއަނުން ކަމަށާއި، އެހެންކަމުން އެއީވެސް ކޮންމެވެސް ވަރަކަށް އިޙުތިރާމު ކުރަން ޖެހޭ ކަމެއް ކަމަށްވެސް ބުންޏެވެ. އަދި އެއީ 10 އަހަރު ކުރީގެ ވާހަކައެއް ނޫން ކަމަށާއި، އެއީ މިދިޔަ ސީޒަނުގައި ހިނގި ކަމެއްގެ ވާހަކަ ކަމަށްވެސް ވަނީ ބުނެފައެވެ.

ޒިދާން އިތުރަށް ބުނީ އޭނާއާ ގުޅުވައިގެން ނޫސްވެރިން ވަރަށް ގިނަ ވާހަކަ ދައްކާ ކަމަށާއި، އޭނާ ފަސް އެނބުރުނީމަ އެ ވާހަކަތައް ދެއްކުމުގެ ބަދަލުގައި، މޫނު ކުރިމަތީގައި ރެއާލުގެ ކޯޗުގެ މަގާމުން އޭނާ ވަކިވާން ނޫސްވެރިން ބޭނުންވާ ވާހަކަ ބުނުން މާ ރަނގަޅުވާނެ ކަމަށްވެސް ޒިދާން ބުންޏެވެ.

މި ސީޒަނުގައި ރެއާލުގެ ކުޅުން ވަރަށް ބޮޑަށް ދަށްވި ނަމަވެސް، މީގެ ކުރިން ރެއާލުން ވަނީ ޒިދާނުގެ އިރުޝާދުގެ ދަށުން ގިނަ ކާމިޔާބީތަކެއް ހޯދާފައެވެ. އެގޮތުން 2016 ވަނަ އަހަރުގެ ޖެނުއަރީ މަހުން ފެށިގެން 2018 ވަނަ އަހަރުގެ މެއި މަހުގެ ނިޔަލަށް ޒިދާން އެންމެ ފުރަތަމަ ރެއާލަށް އިރުޝާދު ދިންއިރު، އެ ފަހަރު ވަނީ ޖެހިޖެހިހެން ތިން ފަހަރަށް ރެއާލަށް ޔުއެފާ ޗެމްޕިއަންސް ލީގު ކާމިޔާބުކޮށްދީފައެވެ. އަދި މި މުއްދަތުގައި ވަނީ އެ ޓީމަށް ސްޕެނިޝް ލީގު އެއް ފަހަރު ކާމިޔާބުކޮށްދީފައެވެ.

އޭގެ ފަހުން ޒިދާން ދެވަނަ ފަހަރަށް ރެއާލާ ގުޅުނީ 2019 ވަނަ އަހަރުގެ މާޗު މަހުގެ ތެރޭގައެވެ. އެއަށްފަހު ރެއާލުން ވަނީ މިދިޔަ ސީޒަނުގެ ސްޕެނިޝް ލީގު ކާމިޔާބުކޮށްފައެވެ. އަދި ރެއާލާއެކު ޒިދާން މިހާރު ހަދާފައިވާ އެއްބަސްވުން ހަމަވާނީ 2022 ވަނަ އަހަރުއެވެ.