ވެކްސިންޖަހާ މީހުންގެ އަދަދު އިތުރުވެ، އެކަމުގެ ސަބަބުން ބަލިމަޑުކަމުން އަރައިގަތުމަށް އައު ހިތްވަރެއް ލިބެމުންދާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވެއްޖެއެވެ.

ހުކުރު ދުވަހު ކުރެއްވި ޓްވީޓެއްގައި ޑރ. ނަޒްލާ ވިދާޅުވީ ވެކްސިން ޖަހަންދާ މީހުންގެ އަދަދު ދަނީ އިތުރުވަމުން ކަމަށެވެ. އަދި އޭގެ ސަބަބުން ކޮވިޑް-19ގެ މި ހާލަތުން އަރައިގަތުމަށް އިތުރު ހިތްވަރަކާއި އުއްމީދެއް ލިބިގެން ދާކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ އިތުރަށް ވިދާޅުވީ މުޅި ދުނިޔެއަށް ދިމާވެފައިވާ ޕެންޑެމިކްގެ ނިމުން ﷲގެ އިރާދަފުޅުން ވަރަށް އަވަހަށް އަންނާނެ ކަމަށެވެ. އަދި ހުރިހާ ފަރާތްތަކުން ވެސް ވެކްސިން ޖެހުމަށް ޚާއްޞަކުރެވިފައިވާ ޕޯޓަލްގައި ރެޖިސްޓަރ ވުމަށް ޑރ. ނަޒްލާ ވަނީ އިލްތިމާސް ކުރައްވާފައެވެ.

މިހާރު މުޅި ރާއްޖޭގައި ވެސް ވެކްސިންދޭން ފަށާފައިވާއިރު އެންމެ އިސްކަމެއް ދެނީ ފްރަންޓްލައިން މުވައްޒަފުންނާއި ހައި ރިސްކު މީހުންނަށެވެ. އަދި ކުރިއަށް އޮތް ދުވަސްތަކުގައި އިތުރު ކެޓެގަރީތަކަށް ވެސް ވެކްސިން ދޭން ފަށާނެ ކަމަށް އެޗް.ޕީ.އޭ.އިން ބުނެފައިވެއެވެ.

އެގޮތުން ހުކުރު ދުވަހު 1،003 މީހަކަށް ވެކްސިންދީފައިވާ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސްހިސާބުތަކުން ދައްކައެވެ. އޭގެ ތެރޭގައި މާލޭ ސަރަޙައްދުން ވެކްސިން ޖަހާފައިވާ 787 މީހަކާއި، އަތޮޅުތެރެއިން ވެކްސިންދީފައިވާ 216 މީހަކު ހިމެނެއެވެ. އެއާއެކު، ރާއްޖެއިން މިހާތަނަށް ކޮވިޑް-19 ވެކްސިން ޖަހާފައިވާ މީހުންގެ ޖުމުލަ އަދަދު ވަނީ 4،269ށް އަރާފައެވެ.

ވެކްސިން ޖެހުމަށް ޚާއްޞަ ޕޯޓަލެއް އެޗް.ޕީ.އޭ.އިން ހަދާފައިވާއިރު، އުމުރުން ދުވަސްވީ އަދި ޕޯޓަލްގައި ރަޖިސްޓްރީ ނުވެވޭ މީހުންނަށް ބޭނުންވާ އެހީތެރިކަން ވެކްސިން ދޭ ސެންޓަރުތަކުން ދޭނެ ކަމަށް އެޗް.ޕީ.އޭ.އިން ވަނީ ބުނެފައިވެއެވެ.

މިވަގުތު ރާއްޖޭގައި ކޮވިޝީލްޑް ވެކްސިން ޖަހަން ފަށާފައިވާއިރު، މިހާރު ރާއްޖެއަށް ޗައިނާއިން ތައްޔާރުކޮށްފައިވާ ސިނޮފާމް ވެކްސިންގެ 6،000 ޑޯޒު ވަނީ ލިބިފައެވެ. ނަމަވެސް އެ ވެކްސިން ބޭނުންކުރުމުގެ ހުއްދަ އަދި ފުޑް އެންޑް ޑްރަގް އޮތޯރިޓީން ދީފައެއް ނުވެއެވެ.