ގޯއެއަރއިން މާލެ އާއި ހައިދަރްއާބާދުއާ ދެމެދު ސީދާ ދަތުރުތައް ފަށަނީ
ގޯއެއަރއިން ހައިދަރްއާބާދުން ހަފްތާއަކު ހަތަރު ދުވަހު ރާއްޖެއަށް ދަތުރުކުރާނެ
ގޯއެއަރގެ ފްލައިޓެއް
އިންޑިއާގެ އެއަރލައިނެއް ކަމަށްވާ ގޯއެއަރއިން މާލެ އާއި ހައިދަރްއާބާދާ ދެމެދު ސީދާ ދަތުރުތައް ފަށަން ނިންމައިފިއެވެ.
ގޯއެއަރ އިން މާލެ އާއި ހައިދަރްއާބާދާއި ދެމެދު ސީދާ ދަތުރުތައް ފަށަން ނިންމާފައި ވަނީ ފެބްރުއަރީ 8 ވަނަ ދުވަހުއެވެ. އެގޮތުން ގޯއެއަރއިން ހައިދަރްއާބާދުން ހަފުތާއަކު ހަތަރު ދުވަހު ރާއްޖެއަށް ދަތުރުކުރާނެއެވެ.
ގޯއެއަރ އިން ހައިދަރްއާބާދުން ކުރާ ދަތުރުތަކުގެ ޓިކެޓް ވޮޔޭޖަސް މޯލްޑިވްސްއިން އޮންލައިކޮށް އަދި ފޯނުން ގުޅައިގެން ލިބޭނެއެވެ.
އެ އެއަރލައިނުން މިހާރު އިންޑިއާގެ ތިން ސިޓީ އަކުުން މާލެއަށް ސީދާ ދަތުރުތައް ކުރެއެވެ. އެއީ މުމްބާއީ، ދިއްލީ އަދި ބެންގްލޫރެވެ. އެގޮތުން މިހާރު މުމްބާއީ އާއި މާލެއާ ދެމެދު ކުރާ ދަތުރުތައް ކޮންމެ ހަފުތާއެއްގެ ބުދަ، ބުރާސްފަތި އަދި އާދިއްތަ ދުވަހު ކުރާ އިރު، ދިއްލީ އާއި މާލެއާ ދެމެދު ދަތުރުތައް ކުރަނީ ކޮންމެ ހަފުތާއެއްގެ ހޯމަ، ބުދަ އަދި ހޮނިހިރު ދުވަހުއެވެ. އަދި ބެންގަލޫރާއި މާލެއާ ދެމެދު ގޯއެއަރގެ ފްލައިޓް އޮޕަރޭޓް ކުރަނީ އާދިއްތަ އަދި ބުދަ ދުވަހުއެވެ.
ފާއިތުވި އަހަރު ނިމުނު އިރު ރާއްޖެއަށް އެންމެ ގިނަ އަދަދެއްގެ ފަތުރުވެރިން އައި ގައުމަކަށް އިންޑިއާ ވެފައިވާއިރު، މި އަހަރުގެ މިހާތަނަށް އިންޑިއާއިން 16,155 ފަތުުރުވެރިން ވަނީ ރާއްޖެ އައިސްފައެވެ. މިއީ ރާއްޖެ އަންނަ ފަތުރުވެރިންގެ 19.2 އިންސައްތައެވެ.
އިންޑިއާގެ ގައުމީ އެއަރލައިން އެއަރ އިންޑިއާގެ އިތުރުން އިންޑިގޯ އެއަރލައިން އަދި ސްޕައިސްޖެޓުން އަންނަނީ ރާއްޖެއާއި އިންޑިއާ އާ ދެމެދު ދަތުރުތައް ކުރަމުންނެވެ.
