އޭޑީކޭގައި ބަލިމީހުން އެޑްމިޓްކުރުން ހުއްޓާލައިފި
އިމަރޖެންސީގައި އެޑްމިޓްކޮށްގެން ދޭންޖެހޭ ޚިދުމަތްތަކާއި ހޮސްޕިޓަލުގެ އިމަރޖެންސީ ޚިދުމަތްތަކާއި ޑައިގްނޯސްޓިކް ޚިދުމަތްތައް ކުރިއަށްދާނެ
އޭޑީކޭ ހޮސްޕިޓަލްގެ ކައުންޓަރުން މީހުން ޚިދުމަތް ހޯދަނީ
އޭޑީކޭ ހޮސްޕިޓަލުން ބަލިމީހުން އެޑްމިޓްކުރުން މިވަގުތަށް މެދުކަނޑާލައިފިއެވެ.
އެ ހޮސްޕިޓަލުން ނެރުނު ބަޔާނެއްގައި ބުނެފައިވަނީ ކޮވިޑް-19 އާ ގުޅިގެން އާންމުންގެ ރައްކާތެރިކަމަށާއި ސިއްޙީ ޚިދުމަތްދޭ ފަރާތްތަކުގެ ރައްކަަލަކަށްޓަކައި ވައިރަސް ފެތުރެމުންދާ ނިސްބަތަށް ބަލައި ތަފާތު ފިޔަވަޅުތައް އަޅަމުންދާ ކަމަށެވެ. އެގޮތުން ރާއްޖޭގައި ވައިރަސް ފެތުރޭ މިންވަރު އިތުރުވެގެން ދިޔުމާއެކު ހޮސްޕިޓަލުގެ ބައެއް މުވައްޒަފުން ކަރަންޓީންގައި ބައިތިއްބަން ޖެހުމާ ގުޅިގެން ހޮސްޕިޓަލުން ދޭ ޚިދުމަތްތަކަށް ބަދަލުގެނައުމަށް ނިންމާފައިވާ ކަމަށެވެ.
އެގޮތުން ހޮނިހިރު ދުވަހުން ފެށިގެން (އިއްޔެ އިން ފެށިގެން) ހޮސްޕިޓަލުގެ ބައެއް ޚިދުމަތްތަކަށް ބަދަލު ގެނެސްފައިވާ ކަމަށެވެ. އެގޮތުން ހުރިހާ އޯޕީޑީ ކޮންސަލްޓޭޝަންތައް އޮންލައިންކޮށް ބަދަލުކުރުމާއި އިލެކްޓިވް ސާރޖަރީތައް މިވަގުތަށް މެދުކަނޑާލުމާއި އެޑްމިޓްކޮށްފައިވާ ބަލިމީހުންނަށް ޒިޔާރަތްކުރުން މަނާވާނެ ކަމަށް އެ ހޮސްޕިޓަލުން ބުންޏެވެ.
މި ޚިދުމަތްތަކަށް ބަދަލު އައި ނަމަވެސް އިމަރޖެންސީގައި އެޑްމިޓްކޮށްގެން ދޭންޖެހޭ ޚިދުމަތްތަކާއި ހޮސްޕިޓަލުގެ އިމަރޖެންސީ ހިޚިދުމަތްތަކާއި ޑައިގްނޯސްޓިކް ޚިދުމަތްތައް ކުރިއަށްދާނެ ކަމަށް ވަނީ ބުނެފައެވެ.
މީގެ އިތުރުން އޭޑީކޭ ހޮސްޕިޓަލުން ބުނީ ކޮންމެހެން އަންނަން ޖެހިއްޖެ ހާލަތެއްގައި ނޫނީ ހޮސްޕިޓަލަށް ނައުމަށާއި ހޮސްޕިޓަލަށް އަންނަން ޖެހިއްޖެ ހާލަތެއްގައި، އެކަނި ނުވަތަ އެހީތެރިއެއްގެ ގޮތުގައި އެކަކަށް ވުރެ ގިނަ މީހުން ނުގެނައުމަށް އެދޭ ކަމަށެވެ. އަދި ހޮސްޕިޓަލަށް މީހުން އަންނައިރު ރަނގަޅަށް މާސްކް އެޅުމަށާއި ހޮސްޕިޓަލުގެ އެކި ސަރަޙައްދުތަކުގައި ބަހައްޓާފައި ހުރި ހޭންޑް ސެނެޓައިޒަރތައް ބޭނުން ކުރުމަށް ވެސް ވަނީ އެދިފައެވެ.
ރާއްޖޭގައި މިހާރު ފެންނަ ކޮވިޑްގެ ކޭސްތައް އިތުރުވެފައިވާއިރު ހޮސްޕިޓަލުގައި ފަރުވާދޭންޖެހިފައިވާ މީހުންގެ އަދަދު އިތުރުކަން ވެސް ފާހަގަކޮށްލެވެއެވެ. އަދި ރާއްޖޭގައި ކޮވިޑް-19 ހަލުވި ކަމާއިއެކު ފެތުރެމުން އަންނައިރު ރާއްޖޭގައި މި ބައްޔާ ދެކޮޅަށް އަޅާފައިވާ ފިޔަވަޅުތަކަށް ލުއި ދިނުމަށްފަހު އަނެއްކާވެސް ފިޔަވަޅުތައް އިތުރަށް ވަނީ ވަރުގަދަ ކޮށްފައެވެ.
