އަޒަރބައިޖާން 2021 ގެ ސްކޮލަރޝިޕަށް ކުރިމަތިލުމުގެ ފުރުޞަތު ހުޅުވާލައިފި
28 ޖެނުއަރީ 2021 | ބުރާސްފަތި 07:21ބެޗްލަރސް ޑިގްރީއަށް ކުރިމަތިލެވޭނީ 28 ފެބްރުއަރީގެ ނިޔަލަށް 25 އަހަރު ފުރިފައިނުވާ ދަރިވަރުންނަށް
ދިވެހިރާއްޖޭގެ ގައުމީ ޔުނިވަރސިޓީގައި މަތީ ތަޢުލީމު ހާސިލް ކުރަމުންދާ ދަރިވަރުންތަކެއް
އޯ.އައި.ސީ. އަދި ނާމް މެމްބަރ ގައުމުތަކުގައި ކުރިއަށް ގެންދާ އަޒަރބައިޖާން 2021 ގެ ސްކޮލަރޝިޕަށް ކުރިމަތިލުމުގެ ފުރުޞަތު ހުޅުވާލައިފިއެވެ.
ހަޔަރ އެޑިޔުކޭޝަނުން ބުނީ ބެޗްލަރސް ޑިގްރީ، މާސްޓަރސް ޑިގްރީ އަދި ޕީ.އެޗް.ޑީ ލެވަލްގެ ކޯސްތަކަށް ކުރިމަތިލުގެ ފުރުޞަތު ހުޅުވާލާފައިވާ ކަމަށެވެ.
ހަޔަރ އެޑިޔުކޭޝަން މިނިސްޓްރީން ބުނީ ބެޗްލަރސް ޑިގްރީއަށް ކުރިމަތިލެވޭނީ 28 ފެބްރުއަރީ 2021 ގެ ނިޔަލަށް 25 އަހަރު ފުރިފައިނުވާ ދަރިވަރުންނަށް ކަމަށްވާއިރު، މާސްޓަރސް ޑިގްރީއަށް ކުރިމަތިލޭވޭނީ 28 ފެބްރުއަރީ 2021 ގެ ނިޔަލަށް 30 އަހަރު ފުރިފައި ނުވާ ދަރިވަރުންނަށް ކަމަށެވެ. އަދި ޕީއެޗްޑީއަށް ކުރިމަތިލެވޭނީ 28 ފެބްރުއަރީ 2021 ގެ ނިޔަލަށް 40 އަހަރު ފުރިފައިނުވާ ދަރިވަރުންނަށް ކަމަށެވެ.
ސްކޮލަރޝިޕްގެ ދަށުން އެޕްލިކޭޝަން ހުށަހެޅޭނެ ޔުނިވަރސިޓީތައް އެނގޭނެ ލިޔުން މިނިސްޓްރީގެ ވެބްސައިޓަށް އަޕްލޯޑް ކޮށްފައިވާއިރު، ޔުނިވަރސިޓީތަކުގެ މަޢުލޫމާތު studyinazerbaijan.edu.az އިން ވެސް ލިބޭނެއެވެ. އަދި މިސްކޮލަރޝިޕާ ގުޅޭ އިތުރު މަޢުލޫމާތު މިނިސްޓްރީގެ ވެބްސައިޓްwww.mohe.gov.mvއިންނާއި އަޒަރބައިޖާންގެ މިނިސްޓްރީ އޮފް ފޮރިން އެފެއާޒް ގެ ވެބްސައިޓް ކަމުގައިވާwww.mfa.gov.azއިން ލިބެން ހުންނާނެއެވެ.
ހަޔަރ އެޑިޔުކޭޝަނުން ބުނީ ކޯސްތަކުގެ ފައިނަލް ސިލެކްޝަން ހެދުމަށް ހަމަޖެހިފައިވަނީ އަޒަރބައިޖާންގެ ފަރާތުން ކަަމަށާއި، ސްކޮލަރޝިޕަށް ކަނޑައެޅިފައިވާ އަދަދަށް ކެންޑިޑޭޓުން އެޕްލިކޭޝަން ހުށަހަޅާފައި ނުވާނަމަ، ޖާގަ ހަމަކުރުމަށް ކެންޑިޑޭޓުން ނޮމިނޭޓް ކުރާނީ ހުރިހާ ލެވެލްތަކުން މެރިޓް އުސޫލުން އެންމެ މަތިން ޕޮއިންޓް ލިބޭ ފަރާތްތައް ކަމަށެވެ.
ހަޔަރ އެޑިޔުކޭޝަނުން ބުނީ އެޕްލިކޭޝަން ހުށަހަޅާ ފަރާތްތަކުގެ ތެރެއިން ސްކޮލަރޝިޕަށް ނޮމިނޭޓް ކުރެވޭ ކެންޑިޑޭޓުން މި މިނިސްޓްރީން އެންގުމުން، އަޒަރބައިޖާންގެ އެޕްލިކޭޝަން ފުރަންޖެހޭނެ ކަމަށެވެ. އަދި މި ސްކޮލަރޝިޕްގެ ދަށުން ޓިއުޝަން ފީ، އަހަރަކު އެއްފަހަރު ވައިގެ މަގުން ދަތުރުކުރުމަށް އިކޮނޮމީ ކްލާސް ޓިކެޓް، ކޮންމެ މަހެއްގެ އެލަވަންސް، މެޑިކަލް އިންޝުއަރެންސް އަދި ވިސާއާއި ރެޖިސްޓްރޭޝަނަށް ހިނގާ ޚަރަދު ދިނުމަށް ހަމަޖެހިފައިވަނީ ސްކޮލަރޝިޕް އިންތިޒާމުކުރާ ފަރާތުންނެވެ.
ކުރިމަތިލެވޭނީ އެންމެ ކޯހަކަށް ކަމަށްވާއިރު، 15 ފެބްރުއަރީ 2021 ވާ ހޯމަ ދުވަހު 13:30 ގެ ކުރިން އެޕްލިކޭޝަން ހުށަހަޅަން ޖެހެއެވެ. އަދި އެޕްލިކޭޝަން ހުށަހަޅާނީhttps://myedu.egov.mvޕޯޓަލް މެދުވެރިކޮށެވެ.
