މިދިޔަ އަހަރު ޖޭ.އެސް.ސީ.އިން 3.5 ގުނަ އިތުރު ޖަލްސާ ބާއްވައި މަސައްކަތްތައް މެކުހަށް
28 ޖެނުއަރީ 2021 | ބުރާސްފަތި 03:30ކޯޓްތަކަށް ޢައްޔަންކުރި އަންހެން ފަނޑިޔާރުންގެ ނިސްބަތް ވަނީ އިތުރުވެފައި
ޖުޑީޝަލް ސަރވިސް ކޮމިޝަން
2019 ވަނަ އަހަރަށް ވުރެ މިޔަ އަހަރު ޖޭ.އެސް.ސީ.އިން 3.5 ގުނަ އިތުރު ޖަލްސާބާއްވައި މަސައްކަތްތުގެ ރޭޓް އިތުރުކޮށްފައިވާކަން ހާމަކޮށްފިއެވެ. މިކަން ހާމަކޮށްފައިވަނީ ޖުޑީޝަލް ސަރވިސް ކޮމިޝަނުން އެންމެ ފަހުން އާންމުކޮށްފައިވާ އަހަރީ ތަފާސް ހިސާބުތަކުންނެވެ.
ޖޭ.އެސް.ސީ.އިން އާންމުކުރި ތަފާސްހިސާބުތައް ދައްކާގޮތުން ކޮވިޑްގެ ބަލިމަޑުކަން ތަހައްމަލުކުރި 2020 ވަނަ އަހަރު ޖޭ.އެސް.ސީ.އިން 95 ޖަލްސާއެއް ވަނީ ބާއްވާފައެވެެ. މިއީ އޭގެ ކުރީއަހަރާ އަޅާބަލާއިރު 3.5 ގުނަ އިތުރު އަދަދެކެވެ. އެގޮތުން ވަކިވަކި މަސައްކަތްކާ ބަލާއިރު 2020 ވަނަ އަހަރު ބޭއްވި ޖަލްސާގެ އަދަދު 2019 ވަނަ އަހަރާ އަޅާބަލާއިރު ކޮންމެ މަހެއްގައި ވެސް ވަނީ އިތުރުވެފައެވެ. އެގޮތުން ކޮންމެ މަހެއްގައި ވެސް އެންމެ މަދުވެގެން 4 ޖަލްސާ ބާއްވާފައިވާއިރު، މިއީ 2019 ވަނަ އަހަރު އެންމެ ގިނައިން މަހެއްގެ މައްޗައް ޖަލްސާ ބޭއްވުނު އަދަދެވެ. 2020 ވަނަ އަހަރު އެންމެ ގިނަ ޖަލްސާ ބާއްވާފައިވަނީ އަހަރުގެ ފަހުކޮޅުއެވެ. އެގޮތުން ނޮވެމްބަރ އަދި ޑިސެމްބަރު މި ދެ މަހުވެސް ވަނީ 11 ޖަލްސާއެއް ބާއްވާފައެވެ. ޖޭ.އެސް.ސީ.ގެ ތަފާސްހިސާބުތައް ދައްކާގޮތުން މިދިޔަ އަހަރު އެ އިދާރާއަށް ކަނޑައަޅާފައިވާ ބަޖެޓް ވަނީ 15 މިލިއަނަށް ކުޑަކޮށްފައެވެ. މި ބަޖެޓުން އެ އިދާރާއިން ބޭނުންކޮށްފައިވަނީ 94 އިންސައްތައެވެ.
2020 ވަނަ އަހަރު ޖޭ.އެސް.ސީ.އަށް ހުށަހެޅިފައިވާ މައްސަލަތަކުގެ އަދަދުވެސް ވަނީ ވަރަށް ބޮޑަށް އިތުރުވެފައެވެ. އެގޮތުން 2018 ވަނަ އަހަރު އެންމެ 7 މައްސަލަ ޖޭ.އެސް.ސީ.އަށް ހުށަހަޅާފައިވާއިރު، 2019 ވަނަ އަހަރު 114 މައްސަލަ އަދި 2020 ވަނަ އަހަރު މިއަދަދު 288އަށް ވަނީ އިތުރުވެފައެވެ. މިދިޔަ އަހަރު ފެށިއިރު އޭގެ ކުރީ އަހަރު ނުނިމި ހުރި 73 މައްސަލައަކާއި، އަލަށް ފެށި 41 މައްސަލައެއްގެ މަސައްކަތް ވަނީ ކޮށްފައެވެ. މިދިޔަ އަހަރު ޖުމުލަ 304 މައްސަލަ ބެލުމާ ގުޅޭގޮތުން ދިރާސާކޮށްފައިވާއިރު، 77 އިންސައްތަ މައްސަލަ ތަޙުޤީޤްކުރަން ނުފެންނަކަމަށް ނިންމާ ދޫކޮއްލުމަށް ވަނީ ނިންމާފައެވެ. އެހެންކަމުން މިދިޔަ އަހަރު ޖޭއެސްސީއިން ތަޙުޤީޤުކޮށް ގޮތެއް ނިންމާފައިވަނީ 54 މައްސަލައެކެވެ.
މިދިޔަ އަހަރު 114 މައްސަލައެއްގައި ތަޙުޤީޤް ކޮމިޓީއިން މަސައްކަތް ކޮށްފައިވާއިރު، 74 އިންސައްތަ މައްސަލަ ވަނީ ސާބިތުވެފައެވެ. މި ސަބަބައްޓަކައި މައްސަލަ ސާބިތުވެ 9 ފަނޑިޔާރަކު ވަކިކޮށް، 2 ފަނޑިޔާރަކު ސަސްޕެންޑްކޮށް، އަދި 4 ފަނޑިޔާރަކަށް ނަސޭހަތާއެކު ތަމްރީން ފުރިހަމަކުރުވާފައިވެއެވެ.
ކޯޓްތަކަށް ޢައްޔަންކުރި އަންހެން ފަނޑިޔާރުންގެ ނިސްބަތް މިދިޔަ އަހަރު 3 އިންސައްތަ މައްޗަށް ވަނީ ޖެހިފައެވެ. ޖޭ.އެސް.ސީ.ގެ ހިސާބުތައް ދައްކާގޮތުން މިދިިޔަ އަހަރު އެންމެ ގިނަ ފަނޑިޔާރުން ޢައްޔަންކޮށްފައިވަނީ ސުޕީރިއަރ ކޯޓްތަކާއި މެޖިސްޓްރޭޓް ކޯޓްތަކަށެވެ. މި ގޮތުން ގްރޭޓަރ މާލޭ ސަރަހައްދުގައި ހުންނަ ސުޕީރިއަރ ކޯޓްތަކަށް 9 ފަނޑިޔާރުން ޢައްޔަންކުރި އިރު މެޖިސްޓްރޭޓް ކޯޓްތަކަށް ޢައްޔަންކޮށްފައިވަނީ 9 ފަނޑިޔާރުންނެވެ. ދެން މިދިޔަ އަހަރު ފަނޑިޔާރުން ޢައްޔަންކޮށްފައިވަނީ ސުޕްރީމް ކޯޓާއި ހައިކޯޓަށެވެ. މީގެއިން ކޮންމެ ކޯޓަކަށްވެސް 2 ފަނޑިޔާރުން ވަނީ ޢައްޔަންކޮށްފައެވެ. މިިދިޔަ އަހަރު ކޯޓްތަކަށް ޢައްޔަންކުރި 22 ފަނޑިޔާރުންގެ ތެރެއިން 6 ފަނޑިޔާރުންނަކީ އަންހެން ބޭފުޅުންނެވެ. އަދި މީ އޭގެކުރީ އަހަރާ އަޅާބާއިރު 3 އިންސައްތަ އިތުރު އަދަދެއްކަމަށް ވެސް ޖޭ.އެސް.ސީ.ން ހާމަކޮށްފައިވެއެވެ.
މިދިޔަ އަހަރު ޢައްޔަންކުރި ފަނޑިޔާރުންގެ ޖުމްލަ އަދަދު 2019 ވަނަ އަހަރާ އަޅާބަލާއިރު 2 އިންސައްތަ އިތުރުކަމަށް ވެސް ޖޭ.އެސް.ސީ.ން ވދާޅުވެއެވެ. މިިދިޔަ އަހަރު 4 ފަނޑިޔާރަކު ރިޓަޔަރ ކުރެއްވިިއިރު 9 ފަނޑިޔާރަކުވަނީ މަޤާމުން އިސްތިޢުފާދެއްވާފައެވެ. އަދި 4 ފަނޑިޔާރަކުވަނީ މަޤާމުން ވަކިކޮށްފައެވެ.
