ޖެނުއަރީ 5 ގެ ފަހުން ކޮޅުފުށިން އެއްވެސް ރަށަކަށް ދަތުރުކޮށްފައިވާ މީހުން އެންގުމަށް އެޗްޕީއޭއިން އެދެފި
އާދިއްތަ ދުވަހުގެ ހަވީރުގެ ވަގުތެއްގައި ކޮޅުފުށި މޮނިޓަރިންގެ ހާލަތަށް ވަނީ ގެނެސްފައި
މ.ކޮޅުފުށި
ޖެނުއަރީ 5 ގެ ފަހުން މ.ކޮޅުފުށިން އަތޮޅުތެރޭގެ އެއްވެސް ރަށަކަށް ދަތުރުކޮށްފައިވާ މީހުން އެރަށެއްގެ ހޮސްޕިޓަލް ނުވަތަ ހެލްތު ސެންޓަރަށް އެންގުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)ން އެދެފިއެވެ.
އެޗްޕީއޭއިން ބުނީ މި މުއްދަތުގައި ކޮޅުފުށިން މާލެއަށް ދަތުރުކޮށްފައިވާ މީހުން 1676 އަށް ގުޅުމަށްފަހު މައުލޫމާތު ހިއްސާ ކުރުމަށެވެ.
އަދި މި މުއްދަތުގައި ކޮޅުފުށިން ދަތުރުކޮށް 14 ދުވަސް ހަަމަނުވާ މީހުން، 14 ދުވަސް ފުރިހަމަ ވަންދެން ކަރަންޓީނުވެ، ކަރަންޓީނު ނިމުމަށްފަހު ކޮވިޑް-19 އަށް ޓެސްޓުކޮށް ނަތީޖާ ލިބެންދެން ކަރަންޓީނުގައި ތިބުމަށް އެޗްޕީއޭއިން އިލްތިމާސް ކުރެއެވެ.
މީގެ އިތުރުން ކޮޅުފުށިން ދަތުރުކޮށް 14 ދުވަސް ހަަމަވެފައިވާ މީހުން ކޮވިޑް-19 އަށް ޓެސްޓުކޮށް ނަތީޖާ ލިބެންދެން ކަރަންޓީނުގައި ތިބުމަށްވެސް އެޗްޕީއޭއިން އިރުޝާދުދެއެވެ.
މ.ކޮޅުފުށިން މާލެއަށް އައި މީހެއް ކޮވިޑް-19ށް ޕޮޒިޓިވްވެފައިވާއިރު އާދިއްތަ ދުވަހުގެ ރޭ ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ.ނަޒްލާ ރަފީގު ވިދާޅުވީ އާދިއްތަ ދުވަހުގެ ހަވީރުގެ ވަގުތެއްގައި ކޮޅުފުށި މޮނިޓަރިންގެ ހާލަތަށް ގެނެވިފައިވާ ކަމަށެވެ.
ޑރ.ނަޒްލާ ވިދާޅުވީ އެރަށުން މާލެ އައި މީހެއްގެ ގައިން، ދެ ދުވަހުގެ ތެރޭގައި ބަލީގެ އަލާމާތްތައް ފެނިގެން ޓެސްޓުކުރުމުން ބައްޔަށް ޕޮޒިޓިވްވެފައިވާ ކަމަށެވެ. އަދި ކޭސް އިންވެސްޓިގޭޝަންތަކާއި، ކޮންޓެކްޓް ޓްރޭސިންގެ މަސައްކަތްތައް ކުރިއަށް ގެންދިއުމަށް އެރަށް މޮނިޓަރިންއަށް ލާފައިވާ ކަމަށް ޑރ.ނަޒްލާ ވިދާޅުވިއެވެ.
ރާއްޖެއެމްވީއަށް މައުލޫމާތު ދެއްވަމުން ކޮޅުފުށީ ކައުންސިލްގެ ރައީސް ހުސެއިން ޝާމިލް ވިދާޅުވީ އެރަށުން 9 މީހަކު ކޮވިޑް-19އަށް ޕޮޒިޓިވްވެފައި ވާކަމަށެވެ. އަދި ރަށު ތެރެއިން ސާމްޕަލްތައް ނެގުމުގެ މަސައްކަތްތަކާއި، ޑައިރެކްޓް ކޮންޓެކްޓުން ދެނެގަތުމުގެ މަސައްކަތްތައް ކުރިއަށްދާ ކަމަށް ވިދާޅުވިއެވެ. އަދި ގާތްގަނޑަކަށް 50 ސާމްޕަލް ނެގިފައިވާކަމަށް އޭނާ ވިދާޅުވިއެވެ.
މީގެ އިތުރުން ޝާމިލް ވިދާޅުވީ ރަށުގައި މިވަގުތު ބަލިހާލު ބޮޑު އެއްވެސް މީހެއް ނެތް ކަމަށާއި ރަށަށް މިވަގުތަށް ބޭނުންވާ މިންވަރަށް ފެނާއި ކާބޯތަކެތި އެބަހުރި ކަމަށެވެ. އަދި ރައްޔިތުންގެ ކިބައިން އެދެނީ މިހާރުވެސް ކައުންސިލަށް އެއްބާރުލުން ދެމުން ގެންދާ ގޮތަށް އެއްބާރުލުން ދިނުން ކަމަށް ޝާމިލް ވަނީ ވިދާޅުވެފައެވެ.
