ކިނބިދޫ އަދި ކަނޑޫދޫ ސިއްޙީ މަރުކަޒުގެ އައު އިމާރަތް އެޅުމަށް ބަޔަކާ ޙަވާލުކޮށްފި

ތ ކަނޑޫދޫ އަދި ތ ކިނބިދޫ ސިއްޙީމަރުކަޒުގެ އައު އިމާރަތް އެޅުމަށް މިނިސްޓްރީ އޮފް ހެލްތުން ބަޔަކާ ޙަވާލުކޮށްފިއެވެ.

އަންގާރަ ދުވަހު މިނިސްޓްރީގައި ބޭއްވި ރަސްމިއްޔާތެއްގައި މި މަޝްރޫޢުތައް ޙަވާލުކޮށްދެއްވާފައިވަނީ އެ މިނިސްޓްރީގެ ސްޓޭޓް މިނިސްޓަރ އަޙުމަދު އާދިލްއެވެ. މި 2 މަޝްރޫޢުގެ ތެރެއިން ތ ކިނބިދޫ ސިއްޙީ މަރުކަޒުގެ އައު އިމާރާތުގެ މަސައްކަތް ޙަވާލުކޮށްފައިވަނީ އަމޭން މޯލްޑިވްސް ޕްރައިވެޓް ލިމިޓެޑާއެވެ. އެގޮތުން 300 ދުވަހުގެ ތެރޭގައި ނިންމުމަށް ޙަވާލުކުރި މި މަޝްރޫޢުގެ އަގަކީ 15،371،786.03 (ފަނަރަ މިލިއަން ތިންލައްކަ ހަތްދިހަ އެއްހާސް ހަތްސަތޭކަ އަށްޑިހަ ހަ ރުފިޔާ ތިން ލާރި) އެވެ.

އޭގެ އިތުރުން، ތ ކަނޑޫދޫ ސިއްޙީ މަރުކަޒުގެ އައު އިމާރާތުގެ މަސައްކަތް ވެސް 300 ދުވަހަށް ނިންމުމަށް ޙަވާލުކޮށްފައިވާއިރު، މަސައްކަތުގެ ކޮންޓްރެކްޓަރަކީ ޑުޕްލެކްސް ޕްރައިވެޓް ލިމިޓަޑެވެ. އަދި މަސައްކަތުގެ އަގަކީ 13،972،920 ( ތޭރަ މިލިއަން ނުވަލައްކަ ހަތްދިހަ ދެހާސް ނުވަސަތޭކަ ވިހި ރުފިޔާ) އެވެ.

މި ރަސްމިއްޔާތުގައި ވާހަކަ ދައްކަވަމުން ސްޓޭޓް މިނިސްޓަރ އާދިލް ވިދާޅުވީ، ދެ ރަށުގައި ވެސް އަލަށް ހެދޭ ސިއްޙީމަރުކަޒުތަކާއެކު، ސްޓާފުން ތިބުމަށް އެކޮމޮޑޭޝަން ބްލޮކްތަކެއް ވެސް ހެދުމަށް ހަމަޖެހިފައިވާ ކަމަށެވެ. އަދި އަލަށް ހަދާ މަރުކަޒުތަކުގައި ވީހާވެސް ގްރީން އެނަރޖީ ބޭނުން ކުރުމަށް އަމާޒު ހިފާފައިވާނެކަން އާދިލްގެ ވާހަކައިގައި ފާހަގަކުރެއްވިއެވެ.

މި ރަސްމިއްޔާތުގައި ކިނބިދޫ ދާއިރާގެ މެމްބަރު މުޙައްމަދު ނާޝިޒު ވެސް ބައިވެރިވެވަޑައިގެންނެވިއެވެ. އަދި މެމްބަރު ނާޝިޒް ވަނީ ކޮންޓްރެކްޓުގެ އުސޫލުތަކާ އެއްގޮތަށް މަސައްކަތް މުއްދަތުގެ ތެރޭގައި ނިންމުމަށް ކޮންޓްރެކްޓަރ ކިބައިން އެދިވަޑައިގަންނަވާފައެވެ.