ވެކްސިން ޖަހަން ދުވާލަކަށް 1،000އެއްހާ މީހުން ރަޖިސްޓަރވަމުން ދާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވެއްޖެއެވެ.

ކޮވިޑް-19 ގެ ވެކްސިން ޖެހުމަށް ރަޖިސްޓްރީ ވުމުގެ ފުރުސަތު ޖެނުއަރީ 18 ވަނަ ދުވަހުން ފެށިގެން ހުޅުވާލާފައިވާއިރު އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ، މިހާތަނަށް 19،666 ފަރާތެއް ރަޖިސްޓްރީ ކޮށްފައިވާކަމަށެވެ.

ޑރ. ނަޒްލާ ވިދާޅުވީ ވެކްސިން ޖަހަން ޝަރުޠުހަމަވާ ހުރިހާ ފަރާތްތަކުން ވީހާވެސް އަވަހަކަށްމައި.ހެލްތް.އެމްވީވެބްސައިޓް މެދުވެރިކޮށް ރަޖިސްޓަރވުމަށް އެދިވަޑައިގަންނަވާފައެވެ.

މި ވެބްސައިޓް މެދުވެރިކޮށް ރަޖިސްޓަރ ވުމަށްޓަކައި އެމީހެއްގެ މަޢުލޫމާތު ވެބްސައިޓްގެޕޯޓަލްގައިހިމަނަން ޖެހެއެވެ. އަދި އެ މަޢުލޫމާތުތައް ކަށަވަރު ކުރުމަށްޓަކައި ރަޖިސްޓަރ ވުމަށްފަހު، ފޯނަށް އަންނަ "އޯޓީޕީ" ކޯޑް ޖެހުމުން، އެޗް.ޕީ.އޭ.އިން ރަޖިސްޓްރޭޝަންގެ ކަންކަން ބަލަމުން ގެންދާނެއެވެ.

ރާއްޖޭގައި ވެސް ކޮވިޑް ވެކްސިން ޖެހުމަށްޓަކައި ވާންޖެހޭ ތައްޔާރީތައް ކަމާބެހޭ ފަރާތްތަކުން ވަމުންދާއިރު މި މަހުގެ 20 ވަނަ ދުވަހު އިންޑިއާ ސަރުކާރުން ކޮވިޝީލްޑް ވެކްސިންގެ އެއް ލައްކަ ޑޯޒް ރާއްޖެއަށް ވަނީ ހަދިޔާ ކޮށްފައިވެއެވެ.