އެލްޗޭ ބަލިކޮށް ބާސާ ތިންވަނައަށް

ސްޕެނިޝް ލީގުގައި އާދީއްތަ ދުވަހުގެރޭ އެލްޗޭ ބަލިކޮށް ތާވަލުގެ ތިންވަނައަށް ބާސެލޯނާ ޖެހިލައިފިއެވެ.

ރަށުން ބޭރުގައި ކުޅުނު މެޗުން ބާސާ މޮޅުވީ 2-0 ގެ ނަތީޖާއަކުންނެވެ.

މި މެޗުގައިވެސް ސަސްޕެންޝަނުގެ ސަބަބުން ބާސާގެ ކެޕްޓަން ލިއޮނެލް މެސީ ކުޅެފައެއް ނުވެއެވެ. މެސީއަށް ދެ މެޗުގެ ސަސްޕެންޝަނެއް ކުރިމަތިވީ ސްޕެނިޝް ސުޕަ ކަޕުގެ ފައިނަލުގައި އެތުލެޓިކް ބިލްބާއޯ އަތުން 3-2 ން ބާސާ ބަލިވި މެޗުގައި ދެއްކި ރަތް ކާޑާ ގުޅިގެންނެވެ.

އާދީއްތަ ދުވަހުގެރޭ ކުޅުނު މެޗުގައި ބާސާއިން ރަނގަޅު ކުޅުމެއް ދެއްކިއިރު، ފުރަތަމަ ހާފުގައި އެ ޓީމުން ވަނީ ލީޑު ނަގާފައެވެ. މެޗުގެ 39 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ މިޑްފީލްޑަރު ފްރެންކީ ޑި ޔޮންއެވެ. އަދި މެޗު ނިމެން މިނެޓަކަށް ވެފައި ވަނިކޮށް ޑި ޔޮން ހުރަސްކޮށްދިން ބޯޅައަކުން ބާސާއަށް ލީޑު ފުޅާކޮށްދިނީ ޒުވާން މިޑްފީލްޑަރު ރިކީ ޕޫޖެވެ. މިއީ އުމުރުން 21 އަހަރުގެ ޕޫޖް ބާސާއަށް ކާމިޔާބުކޮށްދިން ފުރަތަމަ ލަނޑެވެ.

މި މޮޅާއެކު ތާވަލުގެ ތިންވަނައަށް ބާސާ ޖެހިލީ ކުޅުނު 19 މެޗުން ލިބުނު 37 ޕޮއިންޓާއެކުއެވެ. ތާވަލުގެ ދެވަނައިގައި އޮތް އެންމެ ފަހުގެ ޗެމްޕިއަން ރެއާލް މެޑްރިޑަށް 19 މެޗުން ލިބިފައިވަނީ 40 ޕޮއިންޓެވެ. ތާވަލުގެ އެއްވަނައިގައި އޮތް އެތުލެޓިކޯ މެޑްރިޑް ވަނީ އާދީއްތަ ދުވަހުގެރޭ ވެލެންސިއާ އަތުން 3-1 ން މޮޅުވެ ހަތް ޕޮއިންޓަށް ލީޑު ފުޅާކޮށްފައެވެ. އެގޮތުން އެތުލެޓިކޯއަށް 18 މެޗުން ވަނީ 47 ޕޮއިންޓް ލިބިފައެވެ.

މީގެ އިތުރުން އާދީއްތަ ދުވަހުގެރޭ ބާސާ އަތުން ބަލިވި އެލްޗޭ އޮތީ ތާވަލުގެ ފުލުން ދެވަނައިގައި 18 މެޗުން 17 ޕޮއިންޓާއެކުއެވެ. އަދި ބާސާ އަތުން އެލްޗޭ ބަލިވިއިރު، އެންމެ ފަހުން ކުޅުނު 13 މެޗުންވެސް އެ ޓީމަށް މޮޅެއް ހޯދިފައެއް ނުވެއެވެ.