އައްޑޫ ސިޓީގައި ފަތުރުވެރިކަމުގެ ސިނާޢަތް ކުރިއެރުމަށް މަސައްކަތް ކުރަމުންދާއިރު، ދަތުރުފަތުރުގެ ދަތިކަމަކީ އެންމެ ބޮޑު ގޮންޖެހުން ކަމަށް އައްޑޫ ސިޓީގެ މޭޔަރު އަބްދުﷲ ސޯދިގު (ސޯބެ) ވިދާޅުވެއްޖެއެވެ.

''ފަލަސުރުހީ'' ޕްރޮގްރާމްގައި މޭޔަރު ސޯދިގު ވިދާޅުވީ އައްޑޫގައި ފަތުރުވެރިކަން ކުރިއެރުވުމަށް ގިނަ މަސައްކަތްތައް ކުރަމުންދާ ކަމަށެވެ. ނަމަވެސް ގިނަ ގޮންޖެހުންތައް އެބަހުރި ކަމަށާއި، އެންމެ ބޮޑު ގޮންޖެހުމަކީ ދަތުރުފަތުރުގެ ދަތިކަން ކަމަށް މޭޔަރ ސޯދިގު ވިދާޅުވިއެވެ.

އެގޮތުން ފަތުރުވެރިން އަންނަން އޮތް މަގު އަގުބޮޑުކަން މޭޔަރ ސޯދިގު ފާހަގަކުރެއްވިއެވެ. މޭޔަރު ސޯދިގު ވިދާޅުވީ ޑޮމެސްޓިކް ދަތުރުތައް އެކަނި އޮތުމުން އަގުބޮޑުވުމާއި، ދަތުރު ލިބުމުގައި ދަތިކަން ދިމާވުމުގެ މައްސަލަތައް ކުރިމަތިވާ ކަމަށެވެ.

މިމައްސަލަ ހައްލުކުރުމަށް މަސައްކަތް ކުރަމުންދާކަން ފާހަގަކުރައްވައި މޭޔަރު ސޯދިގު ވިދާޅުވީ ޑައިރެކްޓް ޗާޓަރު ފްލައިޓްތައް ބޭއްވުމާއި، އައްޑޫގެ އެއަރޕޯޓު ރާއްޖޭގެ ދެކުނުގެ އެހެން އެއަރޕޯޓުތަކާއި ގުޅުވުމާއި، ސީޕްލޭން ދަތުރުތައް، ޑޮމެސްޓިކް ފްލައިޓްތައް ގުޅުވައިދެވޭނެ ގޮތުގެ އިތުރުން ސީޕްލޭންގެ ދަތުރުތައް އިތުރުކުރުމާއި މެދު މަޝްވަރާތައް ކުރަމުންދާ ކަމަށެވެ. މިމަޝްވަރާތައް ކުރަމުންދަނީ ޓޫރިޒަމް މިނިސްޓްރީއާއެކު ކަމަށާއި، މިމަސައްކަތްތައް ކުރެވޭނެ ކަމުގެ އުންމީދު މިނިސްޓްރީން ދީފައިވާ ކަމަށް މޭޔަރު ސޯދިގު ވިދާޅުވިއެވެ.

ފަތުރުވެރިކަމުގެ ދުވަހުގެ ގޮތުގައި 27 ސެޕްޓެންބަރުގައި ފާހަގަކުރަމުންދާއިރު، އައްޑޫގައި ވަނީ ގިނަ ހަރަކާތްތައް ބޭއްވުމަށް ނިންމާފައެވެ. މޭޔަރު ސޯދިގު ވިދާޅުވީ ފަތުރުވެރިކަމުގެ ސިނާޢަތުގެ މަސައްކަތް ކުރާ އެކިއެކި ފަރާތްތަކުގެ ގުޅިގެން ގިނަ ހަރަކާތްތައް ކުރިއަށް ގެންދެވިއްޖެކަމުގައިވާނަމަ ބޮޑު ކުރިއެރުމެއް ލިބޭނެ ކަމަށެވެ. އަދި ފަތުރުވެރިކަމުގެ މަންޒިލެއްގެ ގޮތުގައި ޕްރޮމޯޓްކުރުމުގެ ގޮތުން މިހާރު ވެސް ގިނަ މަސައްކަތްތައް ކުރަމުންދާކަމަށް މޭޔަރު ސޯދިގު ފާހަގަކުރެއްވިއެވެ.