ތ. އަތޮޅާއި ލ. އަތޮޅާ ދެމެދު ކުރާ ލޯންޗް ފެރީ ދަތުރުތަކުގެ ގަޑިތަކަށް ބަދަލު ގެނެސްފި

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)އިން ތ. އަތޮޅާއި ލ. އަތޮޅާ ދެމެދު ކުރާ ލޯންޗް ފެރީ ދަތުރުތަކުގެ ގަޑިތަކަށް ބަދަލު ގެނެސްފިއެވެ.

އެމް.ޓީ.ސީ.ސީ.އިން ބުނީ އަތޮޅުތެރޭގެ ރަށްތަކަށް ދެމުންދާ ލޯންޗު ފެރީގެ ޚިދުމަތުން މިހާރު ތ. އަތޮޅާއި ލ. އަތޮޅާ ދެމެދު ކުރާ ދަތުރުތަކުގެ ގަޑިތަކަށް ބަދަލުގެނެވިފައިވާ ކަމަށެވެ. އަދި މިބަދަލުތައް ގެނެވުނީ ބަލަންޖެހޭ ވަރަށް ގިނަ ކަންކަމަށް ބެލުމަށްފަހު، އާންމު ރައްޔިތުންނަށް ލުއި ފަސޭހަ ކުރުމުގެ ގޮތުން ކަމަށް އެމް.ޓީ.ސީ.ސީ.ން ބުނެއެވެ.

އެގޮތުން ތ. ވޭމަންޑޫއިން ތ. ތިމަރަފުށްޓަށް އަދި ތ. ތިމަރަފުށިން ލ. ގަމަށް ހެނދުނު ކުރާ ދަތުރުތަކުގެ ގަޑިއަށް ވަނީ ބަދަލު ގެނެސްފައެވެ. މީގެ އިތުރުން ލ. ގަމުން ތ. ތިމަރަފުއްޓަށް އަދި ތ. ތިމަރަފުށިން ތ. ވޭމަންޑޫއަށް ކުރާ ދަތުރުތަކުގެ ގަޑިތަކަށް ވެސް ބަދަލު ގެނެސްފައިވެއެވެ.

އެމް.ޓީ.ސީ.ސީ.ން ބުނީ ކޮންމެ ހަފުތާއެއްގެ އަންގާރަ ދުވަހުން ފެށިގެން ލޯންޗް ފެރީގެ ޚިދުމަތް ހަފްތާއަކު 4 ދުވަހު ދޭނެ ކަމަށެވެ. އެގޮތުން ހޮނިހިރު، އާދީއްތަ، އަންގާރަ އަދި ބުރާސްފަތި ދުވަހު ލޯންޗް ފެރީގެ ޚިދުމަތް ދެމުންދާނެ ކަމަށް އެމް.ޓީ.ސީ.ސީ.އިން ބުނެއެވެ.

ތ. އަދި ލ. އަތޮޅާ ދެމެދެ ފަށާ ލޯންޗް ފެރީގެ ޚިދުމަތް ދޭ ރޫޓްގައި ހިމެނޭ ރަށްތަކަކީ ތ. ވޭމަންޑޫ، ތ. ތިމަރަފުށި އަދި ލ. ގަމެވެ. މި ޚިދުމަތުގައި ތ. ވޭމަންޑޫއިން ތ. ތިމަރަފުއްޓަށް އެއްކޮޅު ޓިކެޓުގެ އަގަކީ 75.00 ރުފިޔާއެވެ. އަދި ދެކޮޅު ޓިކެޓުގެ އަގަކީ 150.00 ރުފިޔާއެވެ. ތ.ވޭމަންޑޫ އަދި ތ. ތިމަރަފުށިން ލ. ގަމަށް އެއްކޮޅު ޓިކެޓުގެ އަގަކީ 250.00 ރުފިޔާއެވެ. ދެކޮޅު ޓިކެޓުގެ އަގަކީ 400.00 ރުފިޔާއެވެ.

ދަތުރުފަތުރުގެ ނިޒާމު ހަރުދަނާކޮށް ފަސޭހައިން ދަތުރުތައް ހަމަޖައްސައިދިނުމަށް މިސަރުކާރުން ގިނަ މަސައްކަތްތައް ކުރަމުންދެއެވެ. އަދި ދަތުރުފަތުރުގެ ނިޒާމުން ގުޅާލުމަކީ މިސަރުކާރުގެ ރިޔާސީ ވަޢުދަކަށްވާއިރު، އެމް.ޓީ.ސީ.ސީ.ން ދަނީ އަތޮޅުތެރޭގެ ގިނަ ރަށްތަކަށް ލޯންޗު ފެރީގެ ޚިދުމަތް ދެމުންނެވެ.