ތޫނު އެއްޗަކުން ހަމަލާދީ މަރާލާފައިވާ ށ. ފޭދޫ ހީނާމާގެ އިސްމާއިލް ޝައްފާން ޝަރީފްގެ މަރުގެ މައްސަލަ އަންނަ ފެބްރުއަރީ މަހު ނިންމާނެ ކަމަށް ބުނެފިއެވެ.

މި މައްސަލާގައި ބުރާސްފަތި ދުވަހު ވަނީ ޝައްފާންގެ މަރުގެ މައްސަލާގައި ދައުވާ އުފުލާފައިވާ މީހުން ޝަރީޢަތް ނިމެންދެން ބަންދުކޮށްފައިވާތީ، ބަންދުގެ އަމުރު މުރާޖަޢާކުރުމަށް އަޑުއެހުމެއް ބާއްވާފައެވެ. އެމީހުންގެ ބަންދާމެދު ދައުލަތުގެ ގާނޫނީ ވަކީލު ވިދާޅުވީ އެމީހުން ބަންދުގައި ބޭތިއްބުމަށް އެދޭކަމަށެވެ. ދައުވާ ލިބޭ ފަރާތްތަކުން ބުނަނީ، އެމީހުން ބަންދުކޮށްފައި ބޭތިއްބި ނަމަވެސް، އެމީހުންނަށް ލިބެންޖެހޭ ހައްގުތަށް ނުލިބޭކަމަށެވެ. ޚާއްޞަކޮށް، ޑޮކްޓަރަށް ދެއްކުމުގެ ކަންކަން އެންމެ އެދެވޭ ގޮތަށް ކުރިއަށް ނުދާކަން އެފަރާތްތަކުން ފާހަގަކުރިއެވެ.

މީގެއިތުރުން ދިފާޢީ ވަކީލު ވިދާޅުވީ، މި މައްސަލައިގެ އަޑުއެހުންތަކުގެ ތާވަލަށް ބަލާއިރު، އަންނަ ފެބްރުއަރީ މަހުގެ ފަހުކޮޅު ޚުލާޞާ ބަޔާންއިއްވައި ހުކުމްކުރުމަށް ތާވަލްކޮށްފައިވާތީ، އެމީހުން ބަންދުގައި ބޭތިއްބުމަށް ކޯޓުން ނިންމާފައިވާ ނިންމުމަށް އިޚުތިރާމްކުރައްވާކަމަށެވެ. ނަމަވެސް ވީހާވެސް އަވަހަކަށް މި މައްސަލަ ނިންމަވައި ދެއްވުމަށް ދިފާޢީ ވަކީލުން އެދިލެއްވިއެވެ.

މި މައްސަލާގައި ހެކީންގެ ހެކިބަސް ނަގާފައިވާތީއާއި ހެކީންނަށް ނުފޫޒުފޯރުވުމުގެ ފުރުސަތު މިހާރުނެތަތީ، އެމީހުންގެ މައްޗަށް ޝަރުޠުތަކެއް ކަނޑައެޅުމަށްފަހު، ބަންދުން ދޫކޮށްލުން ނުވަތަ ގެއަށް ބަދަލު ކޮށްދިނުމަށް ވެސް ދިފާޢީ އެހެން ވަކީލެއް އެދިލައްވާފައިވެއެވެ.

ނަމަވެސް މި މައްސަލަ ބައްލަވާ ގާޒީ ނިންމެވީ، އެމީހުންގެ ބަންދަށް އެއްވެސް ބަދަލެއް ނުގެނެސް، ޝަރީޢަތް ނިމެންދެން ބަންދުގައި ބޭތިއްބުމަށެވެ. އަދީ ގާޒީ ވެސް ވަނީ މި މައްސަލައިގެ ޚުލާޞާ ބަޔާން އަންނަ މަހުގެ ތެރޭގައި އިއްވައި، މައްސަލަ ނިންމުމުގެ މަރުހަލާގައިވާކަމަށް ވިދާޅުވެފައެވެ.

ތޫނު އެއްޗަކުން ހަމަލާދީ ޝައްފާނު މަރާލާފައިވަނީ ދެ ގްރޫޕެއްގެ ދެމެދުގައި ހިނގި ސިލްސިލާ މާރާމާރީތަކާ ގުޅިގެން ބަދަލުހިފުމުގެ ގޮތުން ކަމަށް އެ މައްސަލަތަކުގެ ތަހުގީގު ޓީމުން ބުނެފައިވެއެވެ.

އެގޮތުން، ގދ. ފަރެސްމާތޮޑާ، ކޮކާ، އިބްރާހިމް އާގިލް (19އ) މަރާލި މައްސަލައާ ގުޅޭ ގޮތުން ފުލުހުންގެ ތަހުގީގު ޓީމުން އޭރު ވިދާޅުވެފައިވަނީ، އާގިލް މަރާލީ 2018 އޮގަސްޓް 31 ވަނަ ދުވަހު ވ. ފުލިދޫ އަށް ކުރި ދަތުރެއް ނިންމާލުމަށް ފަހު މާލެއަށް ފޭބި ވަގުތު ބޮޑުތަކުރުފާނު މަގު އެމް.އެމް.އޭ ކުރިމަތީ އޮންނަ ތޮށިގަނޑު މަތިން ތޫނު އެއްޗަކުން ހަމަލާދީގެން ކަމަށެވެ. އާގިލް މެޔަށް ތޫނު އެއްޗަކުން ހަމަލާދީފައިވާ ކަމަށް ފުލުހުންގެ ތަހުގީގަށް ފާހަގަކުރެވިފައިވާ ކަމަށާއި އޭނާ ހޮސްޕިޓަލަށް ގެންދިޔަ އިރު ވެސް ދިރިހުރި ކަމުގެ ނިޝާނެއް ފެންނަން ނެތް ކަން ތަހުގީގު ޓީމުން ފާހަގަކޮށްފައިވެއެވެ.

މީގެ އިތުރުން 2018 އޮކްޓޫބަރު 11ވަނަ ދުވަހުގެ ދަންވަރުގެ ވަގުތެއްގައި އިސްމާއިލް ޝައްފާހު ޝަރީފް މަރާލީ އޭނާ ދިރިއުޅެމުން ދިޔަ ސަބުދެލިޔާ މަގު ގ. ރޯޒީ ކުރިމަތިން ބަޔަކު ތޫނު އެއްޗަކުން ހަމަލާދީ ކަމަށް ވެސް ފުލުހުންގެ ތަހުގީގު ޓީމުން ހާމަކޮށްފައިވެއެވެ. ޝައްފާހުއަށް ހަމަލާދިންކަމުގެ މައުލޫމާތު ފުލުހުންނަށް ލިބުމާ އެކު އެ ސަރަހައްދަށް ދިޔަ ކަމަށާއި، އަދި ގާތްގަނޑަކަށް ފަސް ވަރަކަށް މިނެޓު ތެރޭގައި އޭނާ ހޮސްޕިޓަލަށް ގެންދެވުނު އިރު ވެސް އޭނާ ދިރިހުރި ކަމުގެ ނިޝާނެއް ފެންނަން ނެތް ކަމަށް ތަހުގީގު ޓީމުން ބުނެފައިވެއެވެ. އޭނާގެ ގައިގެ 8 ތަނަކަށް ތޫނު އެއްޗަކުން ހަމަލާ ދީފައިވާ ކަމަށް ފުލުހުންގެ ތަހުގީގަށް ފާހަގަކުރެވިފައިވާ ކަމަށް ވެސް ބުނެފައިވެއެވެ.

އާގިލް މަރާލި މައްސަލާގައި ދައުލަތުން ދައުވާ ކޮށްފައިވާ ތިން މީހުންނަކީ، ލ. ފޮނަދޫ، ހިޔާ، ހަމްދޫން ހަމްޒަތާއި ސ. ހިތަދޫ، ސްވޭހުހީނާގެ، މިޖުވާދު މާލިކު އިބްރާހީމްގެ އިތުރުން، ހއ. ދިއްދޫ، ސްނޯބާޑް، އިބްރާހީމް ވިޝާމްގެ މައްޗަށެވެ. މިމައްސަލަ ވެސް ކްރިމިނަލް ކޯޓުގައި ކުރިއަށްދެއެވެ.

ޝައްފާން މަރާލި މައްސަލާގައި ދައުލަތުން ދައުވާކޮށްފައިވާ ހަތަރު މީހުންނަކީ، ސ. ހިތަދޫ، މަލަ، މުހައްމަދު އައިމަން ހަބީބް (27އ)، ސ. މަރަދޫ މޫންލައިޓް ގްލޯރީ ހަސަން ނަބާހް (19އ) ސ. ހިތަދޫ، ޗަމަން، ހުސައިން ނިހާދު އަހްމަދު (27އ) އަދި ކ. މާލެ، ޓޮމާޓޯފްލާވަރ ހުސެއިން ޖައިލަމް (19އ) އެވެ.