ގއ. ދެއްވަދޫ ކްލަސްޓަރއާ ގުޅިގެން މިހާތަނަށް 69 މީހަކު ޕޮޒިޓިވްވެފައިވާ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ)ން ބުނެފިއެވެ.

އާދިއްތަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ނަޒްލާ ރަފީގު ވިދާޅުވީ ދެއްވަދޫ ކްލަސްޓަރއާ ގުޅިގެން ގިނަ ބަޔަކު ޕޮޒިޓިވްވެފައިވާ ކަމަށެވެ. އަދިވެސް ސާމްޕަލްތައް ނެގުމުގެ މަސައްކަތްތައް ކުރިއަށްދާ ކަމަށް ޑރ.ނަޒްލާ ވިދާޅުވިއެވެ.

އެގޮތުން އާދިއްތަ ދުވަހުގެ ރޭގެ ނިޔަލަށް 69 މީހަކު ޕޮޒިޓިވްވެފައިވާ ކަމަށް ޑރ.ނަޒްލާ ވިދާޅުވިއެވެ. އެއީ ގއ.ދެއްވަދޫއިން 55 މީހުން، ލ.ފޮނަދޫއިން 4 މީހުން، ހުޅުމާލެއިން 2 މީހުން، ގއ.ވިލިނގިލިން 2 މީހުން އަދި ގއ.ދާންދޫއިން 6 މީހުން ޕޮޒިޓިވްވެފައިވާ ކަމަށް ޑރ.ނަޒްލާ ވިދާޅުވިއެވެ.

ދެއްވަދޫ ކްލަސްޓަރގައި އެރަށުން 55 މީހުން ޕޮޒިޓިވްވެފައިވާއިރު، މީގެ ތެރޭގައި ގިނައީ އުމުރުން ދުވަސްވީ މީހުންނެވެ.

ރާއްޖެއެމްވީއަށް މަޢުލޫމާތު ދެއްވަމުން އެރަށުގެ ކައުންސިލްގެ ރައީސް އިބްރާހިމް ތައުފީގު ވިދާޅުވީ ކޮވިޑް-19ގެ ކޭސްތައް ފެނުމާ ގުޅިގެން އަޅަމުންދާ ރައްކާތެރިކަމުގެ ފިޔަވަޅުތަކަށް ހުރިހާ ރައްޔިތުން ވެސް ވަރަށް ރަނގަޅަށް އަމަލު ކުރަމުންދާ ކަމަށާއި، ކުރަމުންދާ މަސައްކަތްތަކަށް އެއްބާރުލުން ލިބޭ ކަމަށެވެ.

ރަށުގެ އާންމު ހާލަތު ރަނގަޅުކަން ފާހަގަކުރައްވައި ތައުފީގު ވިދާޅުވީ ފެނާއި، ކާބޯތަކެތި، ބޭސް އަދިވެސް އެހެނިހެން ބޭނުންތަކަށް ބޭނުންވާ އާލަތްތައް އެބަހުރި ކަމަށެވެ. ވަރަށް ގިނަ ފަރާތްތަކަށް އަތޮޅުތެރޭގެ އެހެން ރަށްރަށުގެ ރައްޔިތުންގެ ފަރާތުން ވަރަށް ބޮޑަށް އެހީތެރިކަން ލިބެމުންދާ ކަމަށް ތައުފީގު ވިދާޅުވިއެވެ. އަދި ވިދާޅުވީ އާންމު ރައްޔިތުން ހޭލުންތެރި ކުރުވުމުގެ މަސައްކަތްތައް ކުރަމުންދާ ކަމަށެވެ.

ގާތްގަނޑަކަށް 1380 މީހުންގެ އާބާދީއެއް އޮންނަ ދެއްވަދޫއިން ކޮވިޑްގެ ފުރަތަމަ ކޭސް ފެނިފައިވަނީ ޑިސެންބަރު މަހުގެ 24 ވަނަ ދުވަހުއެވެ.