ހުޅުމާލެ ފޭސް 2ގައި މޫދަށް އެރި އުޅުނު މީހަކު މަރުވެއްޖެ
މަރުވެފައި ވަނީ ދިވެހި ފިރިހެނެއް
ހުޅުމާލޭގައި އާންމުން މޫދަށް އެރި
ހުޅުމާލެ ފޭސް 2 ގައި މޫދަށް އެރި އުޅުނު މީހަކު މަރުވެއްޖެއެވެ.
ފުލުހުން ބުނީ މަރުވެފައި ވަނީ އުމުރުން 86 އަހަރުގެ ދިވެހި ފިރިހެނެއް ކަމަށެވެ. އަދި މި ހާދިސާގެ މައުލޫމާތު ރިޕޯޓްކޮށްފައި ވަނީ ހުކުރު ދުވަހުގެ މެންދުރު 12:20 ހާއިރު ކަމަށެވެ.
އެމީހާ ހުޅުމާލެ ހޮސްޕިޓަލަށް ގެންދިޔަ އިރުވެސް މަރުވެފައިވާ ކަމަށް ހުޅުމާލެ ހޮސްޕިޓަލާއި ހަވާލާދީ ފުލުހުން ބުނެއެވެ.
ފުލުހުން ބުނީ މި ހާދިސާ އާއި ގުޅިގެން ބަލަންޖެހޭ ކަންތައްތަ ބަލަމުން ގެންދާ ކަމަށެވެ.
ހުޅުމާލެ ފޭސް 2 ގައި މިވަގުތު ގިނަ ބަޔަކު ދިރިއުޅެމުން ނުދާއިރު، ހުކުރު ދުވަހު މަރުވި މީހާ އަކީ ފޭސް 2 ގައި ދިރިއުޅޭ މީހެއްތޯ ނުވަތަ ނޫންތޯ ފުލުހުން ހާމަކޮށްފައެއް ނުވެއެވެ. އަދި އެސަރަހައްދަކީ އާންމުގެ މެދުގައި މޫދަށް އެރި އުޅެން މަގުބޫލު ސަރަހައްދެކެވެ.
