މަތިވެރިއަށް ދަތުރުކުރި ލޯންޗެއް އަޑިއަށް ގޮސްފި

މާލެއިން ފުރައިގެން އއ. މަތިވެރިއަށް ދަތުރުކުރި ލޯންޗެއް ފަޅައިގެންގޮސް، އެ ލޯންޗު އަޑިއަށް ގޮސްފިއެވެ.

"ޖީ ތުރޯ" ނަމަކަށް ކިޔާ ލޯންޗު އަޑިއަށް ދިޔައިރު އެ ލޯންޗުގައި ތިން މީހުން ތިބި ކަމަށާއި، މާލޭގެ ހުޅަނގުން، 18 މޭލު ބޭރުން އެމީހުން ކަނޑުމަތިން ނަގާފައި ވަނީ، އއ. ބޮޑުފުޅަދޫއިން ފުރައިގެން މާލެ ދަތުރުކުރި "ސައިރަން އޮފް ދަ ސީ" ނަމަކަށްކިޔާ ލޯންޗަކަށް ކަމަށް އެމްއެންޑީއެފުން މަޢުލޫމާތުދެއެވެ.

އެމްއެންޑީއެފްއިން ބުނީ، ހުކުރު ދުވަހުގެރޭ ލޯންޗު އަޑިއަށް ގޮސްފައިވަނީ އަލިހުރަސްކަނޑުން ދަތުރުކުރަމުންދަނިކޮށް، ކަނޑުމަތިން އޮޔާދިޔަ އެއްޗެއްގައިޖެހި ލޯންޗު ފަޅައިގެން ދިއުމުން ކަމަށެވެ. އަދި ލޯންޗު އަޑިއަށްގޮސް އޮޔާދާތީ އެސަރަހައްދުން ދަތުރުކުރާ ދަތުރުވެރިން ސަމާލުވުމަށް އިލްތިމާސްކޮށްފައި ވެއެވެ.

ލޯންޗުގެ ކެޕްޓަނާ ހަވާލާދީ އެމްއެންޑީއެފުން ބުނެފައި ވަނީ، އަޑިއަށްދިޔަ ލޯންޗަކީ މަޑު ފެހިކުލައިގެ ދަވާދު ލާފައިވާ ލޯންޗެއްކަމަށެވެ.