ނާޕޮލީއަށް ކުޅެމުން އަންނަ ސެނެގާލުގެ ޑިފެންޑަރު ކަލިދޫ ކުލިބާލީ ހޯދަން އިނގިރޭސި ޕްރިމިއާ ލީގުގެ ބޮޑެތި ކުލަބުތަކުން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

ކުލިބާލީ އަކީ ނާޕޮލީން ފަހަކަށް އައިސް ނެރެމުން އަންނަ ނަތީޖާތަކުގައި އެންމެ މުހިންމު ދައުރެއް އަދާކުރާ އެއް ކުޅުންތެރިޔާއެވެ. އެއާއެކު މދިޔަ ހޫނު މޫސުމުގެ ޓްރާންސްފާގައިވެސް އުމުރުން 29 އަހަރުގެ ޑިފެންޑަރު ހޯދަން ޔޫރަޕުގެ ބޮޑެތި ކުލަބުތަކުން ވަނީ މަސައްކަތް ކޮށްފައެވެ.

ރިޕޯޓުތައް ބުނާ ގޮތުން ޕްރިމިއާ ލީގުގެ އެންމެ ފަހުގެ ޗެމްޕިއަން ލިވަޕޫލާއި، މެންޗެސްޓާ ސިޓީ އަދި މެންޗެސްޓާ ޔުނައިޓެޑުންވެސް އަންނަނީ ކުލިބާލީ ހޯދަން މަސައްކަތް ކުރަމުންނެވެ. މީގެ ތެރެއިން ސިޓީން ވަނީ މީގެ ކުރިންވެސް ކުލިބާލީ ހޯދަން މަސައްކަތް ކޮށްފައެވެ. ކުލިބާލީ ހޯދަން ޕްރިމިއާ ލީގުގެ ބޮޑެތި ކުލަބުތަކުން މަސައްކަތް ކުރަމުން އަންނައިރު، ރިޕޯޓުތައް ބުނާ ގޮތުން މި ޖެނުއަރީ ޓްރާންސްފާގައި ނާޕޮލީން އޭނާ ވިއްކާނީ 100 މިލިޔަން ޕައުންޑަށެވެ.

ކުލިބާލީއަށް ޕްރިމިއާ ލީގުގެ ބޮޑެތި ކުލަބުތަކުން ފާރަލާއިރު، ލިވަޕޫލުން އޭނާ ހޯދުމަށް މަސައްކަތް ކުރަމުން އަންނަނީ އެ ޓީމުގެ ތަޖުރިބާކާރު ޑިފެންޑަރު ވާޖިލް ވެން ޑައިކުގެ ކަކުލަށް ލިބުނު ސީރިއަސް އަނިޔާއާ ގުޅިގެން އޭނާއަށް މި ސީޒަނުގައި ދެން ނުކުޅެވޭނެތީއެވެ. އަދި ޔުނައިޓެޑުން ކުލިބާލީ ހޯދަން މަސައްކަތް ކުރަމުން އަންނަނީ އެ ޓީމުގެ ކެޕްޓަން ހެރީ މެގުއާއާއެކު ކުލިބާލީ ކުޅުވަން ކަމަށްވެސް ރިޕޯޓުތައް ބުނެއެވެ.

ގެންކް ދޫކޮށް 2014 ވަނަ އަހަރު 6.5 މިލިޔަން ޕައުންޑަށް ނާޕޮލީއާ ގުޅުނު ކޫލިބަލީ އަންނަނީ އެ ޓީމުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް ކޫލިބަލީ ވަނީ ނާޕޮލީއަށް ކުޅެދިން 264 މެޗުގައި 10 ލަނޑު ޖަހާފައެވެ. އަދި އޭނާ ވަނީ ނާޕޮލީއާއެކު އިޓާލިއަން ކަޕުގެ އިތުރުން އިޓާލިއަން ސުޕަ ކަޕް ކާމިޔާބުކޮށްފައެވެ. މީގެ އިތުރުން ސެނެގާލްގެ ގައުމީ ފުޓްބޯޅަ ޓީމަށްވެސް ކުޅެމުން އަންނަ ކުލިބާލީ ވަނީ މިހާތަނަށް ގައުމީ ޓީމުގެ ޖާޒީގައި 44 މެޗު ކުޅެފައެވެ.