މާލޭ ލީގުގައި ކްލަބް އީގަލްސް ބަލިކޮށް ޓީސީ ސްޕޯޓްސް ކްލަބް ޕޮއިންޓް ތާވަލުގެ ތިންވަނައަށް ޖެހިލައިފި އެވެ.

ހުކުރު ދުވަހު ހަވީރު ކުޅުނު މި މެޗު އީގަލްސްއާ ވާދަކޮށް ޓީސީން ކާމިޔާބުކުރީ 0-1 ގެ ނަތީޖާއަކުންނެވެ.

ދެޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މެޗުގެ ފުރަތަމަ ހާފްގައި ލަނޑު ޖެހުމަށް ހުސް ފުރުސަތުތަކެއް ދެޓީމަށްވެސް ވަނީ ލިބި ބޭކާރުވެފައެވެ. މެޗުގައި ފުރަތަމަ ނުރައްކާތެރި ހަމަލާ އުފެއްދީ އީގަލްސްގެ ހުސެއިން ޝިފާއު ޔޫސުފް އެވެ. އޭރިޔާ ބޭރުން އޭނާ ފޮނުވާލި ބާރު ބޯޅަ ދިޔައީ ގޯލު ދަނޑިކައިރިން ބޭރަށެވެ.

މީގެއިތުރުންވެސް އީގަލްސް އަށް ލަނޑު ޖެހުމަށް ދެތިން ފުރުސަތެއް ފުރަތަމަ ހާފްގައި ވަނީ ލިބި ބޭކާރުވެފައެވެ. ފުރަތަމަ ހާފްގައި ލީޑު ނަގަން އެންމެ ރަނގަޅު ފުރުސަތުތައް ލިބުނީ ޓީސީ އަށެވެ. އެގޮތުން އަލީ ނާފިއު (ކަޅޭ) އަދި އިބްރާހިމް މަހުދީ (އިއްބެ) އަށް ލިބުނު ހުސް ފުރުސަތައް ހިމެނެއެވެ. ޓީސީން މެޗުގެ ލީޑު ނެގީ 16 ވަނަ މިނެޓުގައި އެޓީމަށް ލިބުނު ޕެނަލްޓީއަކުންނެވެ. މި ލަނޑު އެޓީމަށް ކާމިޔާބުކޮށްދިނީ ބިދޭސީ ކުޅުންތެރިޔާ ސްޓެވާޓް އެވެ.

ދެވަނަ ހާފް ޓީސީން ވަރުގަދަކޮށް ފެށިއިރު، އެޓީމުން ވަނީ ފުލުފުލުގައި އީގަލްސްގެ ހާފަށް ބާރުބޮޑުކޮށް ގިނަ ހަމަލާތައް ފޮނުވާލާފައެވެ. ދެވަނަ ހާފްގައި ޓީސީގެ ކަޅޭ އަށް ވަނީ ލީޑު ފުޅާކުރަން ރަނުގެ ފުރުސަތެއް ލިބި ބޭކާރުވެފައެވެ. އީގަލްސްގެ ޕެނަލްޓީ އޭރިޔާ ތެރެއިން މުޅިން ހުހަށް ލިބުނު މި ބޯޅަ ކަޅޭއަށް ފޮނުވާލެވުނީ ސީދާ ކީޕަރު ސުޖަންއާ ދިމާލަށެވެ. އެގޮތުން އޭނާ ވަނީ ބޯޅަ ދިފާއުކޮށްފައެވެ.

މި މެޗުގައި އީގަލްސްގެ ކީޕަރު ސުޖަންގެ ފަރާތުން ގިނަ ސޭވްތަކެއް ފެނިގެންގޮސްފައިވާއިރު، އީގަލްސްގެ ޑިފެންސްލައިނުންވެސް ވަނީ ގިނަ ބޯޅަތައް ދިފާއުކޮށްފައެވެ.

މި މެޗަށް އީގަލްސް ނިކުތީ އެޓީމުގެ މުހިންމު ކުޅުންތެރިން ނުލައެވެ. އެ ކުޅުންތެރިން ނުލާ އީގަލްސް ކުޅެން ޖެހުނީ މިހާރު ކުރިޔަށްދާ ފުޓްސަލް މުބާރާތަށް އެ ކުޅުންތެރިން ރިލީޒްކުރަން ޖެހުމުންނެވެ.

މި ނަތީޖާއާއެކު ޓީސީ އޮތީ ކުޅުނު ފަސް މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި އީގަލްސް އޮތީ ކުޅުނު ފަސް މެޗުން ލިބުނު ހަތް ޕޮއިންޓާއެކު ޕޮއިންޓް ތާވަލުގެ ފަސްވަނައިގަ އެވެ.