ސަސުއޯލޯ އަތުން ޔުވެންޓަސްއަށް މުހިންމު މޮޅެއް

އިޓާލިއަން ލީގުގައި އާދީއްތަ ދުވަހުގެރޭ ކުޅުނު މެޗުން ސަސުއޯލޯ އަތުން އެންމެ ފަހުގެ ޗެމްޕިއަން ޔުވެންޓަސް މުހިންމު މޮޅެއް ހޯދައިފިއެވެ.

އަމިއްލަ ދަނޑުގައި ކުޅުނު މެޗުން ޔުވެންޓަސް މޮޅުވީ 3-1 ގެ ނަތީޖާއަކުންނެވެ.

މި މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ސަސުއޯލޯއަށް މައްސަލަތަކެއް ކުރިމަތިވީ މި ހާފުގެ އިތުރު ވަގުތުގައި އެ ޓީމުގެ ޕެޑްރޯ އޮބިއަންއަށް ސީދާ ރަތް ކާޑެއް ދެއްކުމާ ގުޅިގެންނެވެ. އޭނާއަށް ރަތް ކާޑެއް ދައްކާފައިވަނީ ޔުވެންޓަސްގެ ފެޑެރިކޯ ކިއެސާއަށް ކުރި ނުރައްކާތެރި ފައުލަކާ ގުޅިގެންނެވެ. އެ ފައުލާ ގުޅިގެން އެންމެ ފުރަތަމަ އޮބިއަންއަށް ރެފުރީ ރީނދޫ ކާޑެއް ދެއްކި ނަމަވެސް، ވީޑިއޯ އެސިސްޓަންޓް ރެފުރީ (ވީއޭއާރް) ބެލުމަށްފަހު ރެފުރީ ވަނީ ރަތް ކާޑެއް ދައްކާފައެވެ.

ސަސުއޯލޯގެ އެއް ކުޅުންތެރިއަކު މަދުވުމުގެ ފައިދާ ނަގައި ދެވަނަ ހާފު ފަށައިގެން ފަސް ވަނަ މިނެޓުގައި ޔުވެންޓަސްއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ޑެނީލޯއެވެ. އެކަމަކު އޭގެ އަށް މިނެޓު ފަހުން ގްރެގޮއިރޭ ޑެފްރެލްގެ ލަނޑުން ސަސުއޯލޯއިން ވަނީ ނަތީޖާ އެއްވަރުކޮށްފައެވެ. މެޗުގައި ޔުވެންޓަސްއިން ދެވަނަ ފަހަރަށް ލީޑު ނެގީ 82 ވަނަ މިނެޓުގައި އާރޮން ރަމްސީ ޖެހި ލަނޑުންނެވެ. އަދި މެޗުގެ އިތުރު ވަގުތުގެ ތެރޭ ކްރިސްޓިއާނޯ ރޮނާލްޑޯ ވަނީ ޔުވެންޓަސްގެ ތިންވަނަ ލަނޑު ޖަހާފައެވެ.

މި މޮޅާއެކު ޔުވެންޓަސް އޮތީ ތާވަލުގެ ހަތަރުވަނައިގައި ކުޅުނު 16 މެޗުން ލިބުނު 33 ޕޮއިންޓާއެކުއެވެ. އަދި ޔުވެންޓަސް އަތުން ބަލިވި ސަސުއޯލޯ އޮތީ ތާވަލުގެ ހަތްވަނައިގައި 17 މެޗުން 29 ޕޮއިންޓާއެކުއެވެ.