2019 އަހަރާއި އަޅާ ބަލާއިރު ފާއިތުވި އަހަރު ޕާސްޕޯޓް ހެއްދި މިންވަރު ދަށަށް ގޮސްފައިވާ ކަމަށް މޯލްޑިވްސް އިމިގްރޭޝަންގެ ތަފާސްހިސާބުތަކުން ދައްކައިފިއެވެ.
މުޅި ދުނިޔެއަށް ކުރިމަތިވެފައިވާ ކޯވިޑް-19ގެ ޙާލާތާ ގުޅިގެން ރާއްޖޭގެ ބޯޑަރު ވަނީ ޖުލައި 15 އިން ފެށިގެން ދެމަހަށްވުރެ ދިގު މުއްދަތަކަށް ބަންދުކޮށްފައެވެ. އެހެންކަމުން މިސަބަބުތަކާއި ހެދި ޕާސްޕޯޓް ހެއްދި މީހުންގެ ނިސްބަތް މަދުވެފައިވާ ކަމަށް ތަފާސްހިސާބުތަކުން ވަނީ ދައްކާފައެވެ.
މޯލްޑިވްސް އިމިގްރޭޝަންގެ ތަފާސްހިސާބުތަކަށް ބަލާއިއެކު 2019ވަނަ އަހަރު 74864 ޕާސްޕޯޓްވަނީ ހައްދާފައެވެ. ނަމަވެސް 2020ވަނަ އަހަރު ހައްދާފައިވަނީ ޖުމްލަ 13662 ޕާސްޕޯޓެވެ. މިއީ 2019ވަނަ އަހަރާއި އަޅާބަލާއިރު 5 ގުނަ ދަށް ޢަދަދެކެވެ.
އޭގެތެރެއިން މާލޭގައި ހުންނަ އިމިގްރޭޝަންގެ ހެޑް އޮފީހުން ޕާސްޕޯޓް ހައްދާފައިވަނީ 9836 މީހުންނެވެ. 2019 ވަނަ އަހަރަށް ބަލާއިރު އަހަރު ދުވަހުގެ ތެރޭގައި އެއޮފީހުން ޕާސްޕޯޓް ހައްދާފައިވަނީ 51955 މީހުންނެވެ.
ތަފާސްހިސާބުތައް ދައްކާގޮތުން އިމަރޖެންސީކޮށް މިދިޔަ އަހަރު ޕާސްޕޯޓް ހައްދާފައިވަނީ 94 މީހުންނެނެވެ. އަދި 2020 ވަނަ އަހަރު 39 ޕާސްޕޯޓް ކާޑު ހައްދާފައިވެއެވެ. އަދި ތާރޑް ޕަރޓީ އެޕްލިކޭޝަންގެ ގޮތުގައި 2932 މީހުން ޕާސްޕޯޓް ހެއްދުމަށް ވަނީ ހުށައަޅާފައެވެ.
ރާއްޖޭގެ އެހެން ސަރަހައްދުތަކުގައި ހުރި އިމިގްރޭޝަން އޮފީސްތަކުން ޕާސްޕޯޓް ހައްދާފައިވާގޮތަށް ބަލާއިރު ސ.ހިތަދޫން 339 މީހުން، ފުވައްމުލަކުން 127 މީހުން، ހދ.ކުޅުދުއްފުށިން 218 މީހުން އަދި ހއ.ދިއްދޫން 116 މީހުން ޕާސްޕޯޓް ހައްދާފައިވެއެވެ. އެއީ ޖުމްލަ 800 ޕާސްޕޯޓް ކަމަށްވާއިރު، 2019 ވަނަ އަހަރު އަތޮޅުތަކުން 15408 ޕާސްޕޯޓް ހައްދާފައިވެއެވެ.
އެހެން އަހަރުތަކުގައި ޕާސްޕޯޓް ހައްދާ ނިސްބަތް އިތުރުވެފައިވާ ކަމަށް ތަފާސްހިސާބުން ދައްކާފައިވަނީ ސްކޫލު ބަންދާއި ދިމާކޮށެވެ. އެހެންނަމަވެސް މިއަހަރު ދަތުރުފަތުރު ކުރުމަށް ހުރަސްތަކެއް ހުރުމުން ޕާސްޕޯޓް ހެއްދި މިންވަރު ވަނީ ބޮޑުތަނުން މި މުއްދަތުގައި ދަށަށް ގޮސްފައެވެ.
އެހެންނަމަވެސް ކޯވިޑް 19ގެ ހާލަތާއި އެކުވެސް ދުނިޔޭގެ އެކި ކަންކޮޅުތަކުގައި އަލުން ބޯޑަރުތައް ހުޅުވާ ދަތުރުފަތުރުކުރަން ފަށާފައިވުމާއި އެކު އަނެއްކާވެސް ޕާސްޕޯޓް ހައްދާ މީހުންގެ ނިސްބަތް އިތުރުވާނެ ކަމަށް ލަފާކުރެވެއެވެ.
