ފޮނަދޫއިން ބަޔަކު ޕޮޒިޓިވްވުމާއި ގުޅިގެން އެއަތޮޅު ކުނަހަންދޫގައި ޚާއްސަ ފިޔަވަޅުތަކެއް އަޅައިފި
10 ޖެނުއަރީ 2021 | އާދީއްތަ 04:58ފޮނަދޫއަށް ދަތުރުކުރި ކަމަށް މިހާތަނަށް 10 މީހަކު ނަން ނޯޓުކޮށްފައިވޭ
ލ.ކުނަހަންދޫ، ބަލިން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާ ކަމަށް ކައުންސިލުން ބުނޭ
ލ.ފޮނަދޫއިން ކޮވިޑް-19ގެ ކޭސްތައް ފެނުމާއި ގުޅިގެން އެއަތޮޅު ކުނަހަންދޫގައި ވެސް ޚާއްސަ ފިޔަވަޅުތަކެއް އަޅައިފިއެވެ.
ރާއްޖެއެމްވީއަށް އެރަށުގެ ކައުންސިލް ރައީސް އަސްމާއު އަބޫބަކުރު ވިދާޅުވީ ކުނަހަންދޫގެ ރައްޔިތުން ސިއްހީ ފަރުވާ ހޯދުމަށާއި، އެހެނިހެން ބޭނުންތަކަށް ވަރަށް ގިނައިން ފޮނަދޫއަށް ދަތުރުކުރާ ކަމަށެވެ. އަދި ފޮނަދޫއިން ކޮވިޑް-19ގެ ކޭސްތައް ފެނިފައިވާއިރު، ސަމާލުވާން ޖެހޭކަމަށް އޭނާ ވިދާޅުވިއެވެ.
އެގޮތުން މިމަހުގެ 4 ވަނަ ދުވަހުން ފެށިގެން މިމަހުގެ 9ގެ ނިޔަލަށް ފޮނަދޫ އަދި ގަން ސަރަހައްދަށް ދަތުރުކޮއްފައިވާ ފަރާތްތަކުގެ މައުލޫމާތު ކައުންސިލަށް ހިއްސާކޮއްދިނުމަކީ ވަރަށް މުހިންމު ކަމެއް ކަމަށެވެ. އަސްމާއު ވިދާޅުވީ މިސަރަހައްދަށް ދަތުރުކޮއްފައިވާ ފަރާތްތަކުގެ މައުލޫމާތު 9995970، 9511616 މި ނަންބަރުތަކަށް ގުޅައިގެން ނުވަތަ މެސެޖަކުން އަންގައި ދިނުމަށް އެދޭ ކަމަށެވެ. އަދި މިހާތަނަށް 10 މީހަކު ނަން ނޯޓުކޮށްފައިވާކަން ވެސް އޭނާ ފާހަގަކުރެއްވިއެވެ.
ކޮވިޑް-19ން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާކަން ފާހަގަކުރައްވައި އަސްމާއު ވިދާޅުވީ މިހާލަތުގައި ގަން، ފޮނަދޫ ސަރަޙައްދަށް ދަތުރުކޮއްފިނަމަ ކަރަންޓީން ވާން ޖެހޭ ކަމަށެވެ. އަދި އާންމު ރައްޔިތުން ރަށުތެރޭގައި އުޅުމުގައި މާސްކު އަޅައި ގައިދުރުކޮށް އުޅުމަށް ސަމާލުކަން ދިނުމަށް ވަނީ އިލްތިމާސްކޮށްފައެވެ.
