2021 ވަނަ އަހަރަކީ ފަތުރުވެރިކަމުގެ އިންވެސްޓްމެންޓް އަހަރު - މިނިސްޓަރ
9 ޖެނުއަރީ 2021 | ހޮނިހިރު 08:35ހުއްޓިފައި ހުރި ވިޔަފާރިތައް ކުރިއަށް ގެންދިއުމަށް މަސައްކަތްކުރާނަން
ޓޫރިޒަމް މިނިސްޓަރ ޑރ. އަބްދުﷲ މައުސޫމް - 2021 ވަނަ އަހަރަށް ފަތުރުވެރިކަމުގެ ގިނަ ޕްލޭންތަކެއް ވަނީ އެކަށައަޅާފައި
އަންނަ އަހަރު ރާއްޖޭގެ ފަތުރުވެރިކަމުގެ ރަންޔޫބީލު ފާހަގަކުރާއިރު، 2021 ވަނަ އަހަރު ބްރޭންޑް ކޮށްފައި މިވަނީ ފަތުރުވެރިކަމުގެ އިންވެސްޓްމެންޓް އަހަރުގެ ގޮތުގައި ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ 'ވިޔަފާރި މިއަދު' ޕްރޮގްރާމްގައި ވާހަކަދައްކަވަމުން މިނިސްޓަރ ވިދާޅުވީ މި އަހަރުގެ ތެރޭގައި ފަތުރުވެރިކަމުގެ ސިނާއަތުގައި އިތުރު ގިނަ ވިޔަފާރިތަކެއް ހުޅުވިގެންދާނެކަމަށެވެ.
އެގޮތުން ފަތުރުވެރިމުގެ ސިނާއަތުގައި ރިސޯޓް، ސަފާރީ ނުވަތަ ގެސްޓް ހައުސްތަކަށް އިންވެސްޓްކޮށް އެހެން ނަމަވެސް ދިމާވި ގޮންޖެހުންތަކާއި އެކު އެތަންތަން ނުހުޅުވި އެބަހުރި ކަމަށާއި 2022 ވަނަ އަހަރު ހިނގައިގަންނަން ވާއިރަށް މިހުރިހާ ވިޔަފާރިތަކެއް ފެށެން ޖެހޭ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އަހަރުގެ ކުރިއަށް ހުރި މަސްތަކުގައި އިންވެސްޓްކުރުމަށް ފަހު ތަންތަން ނުހެދި ހުރި ވިޔަފާރިވެރިންނާއި ބައްދަލުކުރައްވާ ތާވާލެއް ހަދައި އެތަންތަން ހަދައި ނިމި ވުޖޫދަށް ގެނައުމުގެ މަސައްކަތްކުރައްވާނެ ކަމަށެވެ.
ރާއްޖޭގެ ދަނޑުވެރިކަމާއި މަސްވެރިކަންވެސް ފަތުރުވެރިމުގެ ސިނާއަތާއި ގުޅިފައިވާކަން ފާހަގަކުރައްވާ މިނިސްޓަރ ވަނީ މި ކަންތައްތައް ލާމެއްސޭނީ ފަތުރުވެރިކަމަށްވެސް ފުދޭވަރެއްގެ ކުރިއެރުންތަކެއް ލިބިގެން ކަމަށް ވިދާޅުވެފައެވެ.
މީގެ އިތުރުން ރާއްޖޭގެ އެތެރޭގެ ދަތުރުފަތުރުގެ ނިޒާމް ހަރުދަނާ ވެގެން ދިއުމަކީވެސް ފަތުރުވެރިކަން ކުރިއެރުވުމަށް މުހިންމު ކަމެއް ކަމަށާއި މިހާރު ރާއްޖޭގައި އެތެރޭގެ ދަތުރުތައް ކުރާ ގިނަ އަދަދެއްގެ އަމިއްލަ ފަރާތްތަށް ތިބި ނަމަވެސް ހަރުދަނާ އާންމު ދަތުރުފަތުރުގެ ނިޒާމެއް ގާއިމްކުރުމަކީ މުހިންމު ކަމެއް ކަމަށް މިނިސްޓަރ ވަނީ ވިދާޅުވެފައެވެ.
މިނިސްޓަރ ވަނީ ރަންޔޫބީލް ފާހަގަކުރާ އިރު ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް ވެސް ފަހި ފުރުސަތުތައް ގާއިމްކޮށްދީ އެ މުވައްޒަފުންނަށް ހިނުތުންވުން ގެނައުމަކީ މުހިންމު ކަމެއްކަމަށް ވެސް ވިދާޅުވެފައެވެ.
