ފުވައްމުލައް ސިޓީގައި މިއަހަރުގެ މާދަރީ ބަހުގެ ދުވަސް ކުލަގަދަކޮށް ފާހަގަކުރަނީ
9 ޖެނުއަރީ 2021 | ހޮނިހިރު 04:01އަދަބީ އީދެއް ބޭއްވުމަށް ނިންމާފައިވޭ
ފުވައްމުލައް ސިޓީ ކައުންސިލްގައި ބޭއްވި ބައްދަލުވުމުގެ ތެރެއިން
ފުވައްމުލައް ސިޓީގައި މިއަހަރުގެ މާދަރީ ބަހުގެ ދުވަސް ކުލަގަދަކޮށް ފާހަގަކުރުމަށް ނިންމައިފިއެވެ.
ފުވައްމުލައް ސިޓީ ކައުންސިލުން ބުނީ މާދަރީ ބަހުގެ ދުވަސް 2021 ފުވައްމުލަކުގައި ކުލަގަދަކޮށް ފާހަގަ ކުރުމުގެ ގޮތުން ކައުންސިލްގެ ބައިވެރިވުމާއެކު ދިވެހި ބަހުގެ އެކަޑަމީއާއި ފުވައްމުލަކުގެ ސުކޫލުތަކާއެކު މަޝްވަރާ ބައްދަލުވުންތަކެއް ބާއްވާފައިވާ ކަމަށެވެ. އަދި މާދަރީ ބަހުގެ ދުވަސް ފާހަގަކުރުމަށްޓަކައި ވާން ޖެހޭ ތައްޔާރީތަކުގެ މަސައްކަތްތައް ފަށާފައިވާ ކަމަށް ކައުންސިލުން ބުނެއެވެ.
ފުވައްމުލަކު ސިޓީގެ މޭޔަރ އަދި ދިވެހި ބަހުގެ އެކަޑަމީގެ ރައީސް ބައިވެރިވަޑައިގެން ކުރިއަށް ގެންދިޔަ މިބައްދަލުވުންތަކުގައި މާދަރީ ބަހުގެ ދުވަސް ފާހަގަކުރުމުގެ މުހިންމުކަމުގެ އަލިއަޅުވާލައި ވާހަކަދެއްކެވިއެވެ.
ކައުންސިލުން ބުނީ މިބައްދަލުވުމުގައި ފުވައްމުލަކުގައި އަދަބީ އީދެއް ބޭއްވުމާއި، ސުކޫލް ކުދިންނަށް އަދަބީ ހުނަރު ދަސްކޮށްދިނުމުގެ ޕްރޮގުރާމްތަކެއް ހިންގުމުގެ އިތުރުން ފުވައްމުލަކު މުއައްސަސާތަކުގެ މުވައްޒިފުން ދިވެހި ބަހަށް އަހުލުވެރިކުރުމުގެ ތަމްރީން ޕްރޮގުރާމެއް ހިންގުމާއި ބެހޭ ގޮތުން ފުޅާދާއިރާއެއްގައި މަޝްވަރާކޮށްފައިވާ ކަމަށެވެ.
މީގެ އިތުރުން ކައުންސިލުން ބުނީ ސުކޫލް ކުދިންނަށް އަމާޒުކޮށްގެން ފުވައްމުލަކު ބަހުރުވައިން ވާހަކަ ހުށަހެޅުމުގެ މުބާރާތަކާއި ދިވެހި ބަހުން ލިޔެފައި ހުންނަ ފޮތްތަކުގެ މައުރަޒެއް ބޭއްވުމަށް ނިންމަންފައިވާ ކަމަށެވެ. އަދި ސުކޫލް ކުދިންގެ އާންމު މައުލޫމާތުގެ ކުއިޒް މުބާރާތެއްގެ އިތުރުން ސުކޫލް އަދަބީ ޖަމްމިއްޔާތަކުގެ ރައީސުންގެ ކޮންފަރެންސެއް ބޭއްވުމަށް މަޝްވަރާކޮށްފައިވާ ކަމަށް ކައުންސިލުން ބުނެއެވެ.
ކޮންމެ އަހަރެއްގެ ފެބްރުއަރީ މަހުގެ 21 ވަނަ ދުވަހަކީ ބައިނަލްއަގުވާމީ ގޮތުން ފާހަގަކުރާ މާދަރީ ބަހުގެ ދުވަހެވެ.
