ކޮވިޑް ސޭފްޓީ ގޯލްޑް ސެޓްފިކެޓް ކައިމޫގެ ތިން ރިސޯޓަކަށް
ސެޓްފިކެޓް ލިބިފައިވަނީ ކޮވިޑުން ރައްކާތެރިވުމަށް އަޅާފައިވާ ފިޔަވަޅުތަކާއި، އެ ރިސޯޓުތަކުން ހިފާއްޓަމުންދާ ސާފުތާހިރުކަމުގެ މިންގަނޑުތަކުގެ ސަބަބުން
ކައިމޫ ރިސޯޓްސް އެންޑް ހޮޓެލްސްއިން ހިންގަމުންދާ ރިސޯޓެއް
ރާއްޖޭގެ ކައިމޫ ރިސޯޓްސް އެންޑް ހޮޓެލްސްއިން ހިންގަމުންދާ ތިން ރިސޯޓަކަށް ހޮޓެލް ރެސިލިއެންޓުން ދޭ އިންޓަނޭޝަނަލް ސެޓްފިކެޓެއް ކަމަށްވާ ގޯލްޑަން ސެޓްފިކެޓް ލިބިއްޖެއެވެ.
އެގޮތުން މި ސެޓްފިކެޓް ލިބިފައިވަނީ ސަމަރ އައިލެންޑް މޯލްޑިވްސް، އެނބޫދޫ ވިލެޖް އަދި އީކުއޭޓަރ ވިލެޖަށެވެ. މި ތިން ރިސޯޓަށް މި ސެޓްފިކެޓް ލިބިފައިވަނީ ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކާއި، އެ ރިސޯޓުތަކުން ހިފާއްޓަމުންދާ ސާފުތާހިރުކަމުގެ މިންގަނޑުތަކުގެ ސަބަބުންނެވެ.
މި ތިން ރިސޯޓަށް މި ކޮވިޑް ސޭފްޓީ ގޯލްޑް ސެޓްފިކެޓް ލިބިފައިވަނީ 2020 ވަނަ އަހަރުގެ ޑިސެމްބަރު މަހުއެވެ.
މި ސެޓްފިކެޓް ލިބިގެން ދަނީ ކޮންމެ ރިސޯޓަކުންވެސް ކޮވިޑާ ދެކޮޅަށް އަޅާފައިވާ ފިޔަވަޅުތަކާއި، ފަތުރުވެރިންގެ ރައްކާތެރިކަން ކަށަވަރުކުރުމަށް ގެންގުޅޭ ޕޮލިސީތަކާއި، ސާފުތާހިރުކަން ދެމެހެއްޓުމަށް އަޅާފައިވާ ފިޔަވަޅުތަކުގެ އިތުރުން ގައިދުރުކަމަށް ދީފައިވާ ސަމާލުކަމުގެ އިތުރުން ބައްޔަށް ޕޮޒިޓިވްވާ މީހުންނަށް ފަރުވާދިނުމަށް ކަނޑައަޅާފައިވާ ގޮތްތައް ބެލުމަށްފަހުއެވެ.
ކައިމީގެ ތިން ރިސޯޓަކަށް މި އެވޯޑް ލިބުމާއެކު ކައިމީގެ މެނޭޖިން ޑިރެކްޓަރު މާނިހް އަޙްމަދު ވަނީ ގޯލްޑް ސެޓްފިކެޓް ލިބުމަކީ އެކަމާ މެދު ވަރަށް އުފާވާ ކަމެއް ކަމަށާއި، މިއީ ކޮވިޑް-19 ބަލިމަޑުކަމުގެ ތެރޭގައި ރިސޯޓުތަކުން އަޅާފައިވާ ރައްކާތެރިކަމުގެ ފިޔަވަޅުތައް ދައްކައިދޭ ސެޓްފިކެޓެއް ކަމަށް ވިދާޅުވެފައެވެ. އަދި ރާއްޖެއަށް އަންނަ ފަތުރުވެރިންނަށް އެއްވެސް ބިރުވެރިކަމެއް ނެތި ރައްކާތެރިކަމާއެކު ރާއްޖޭގައި ޗުއްޓީ ހޭދަކޮށްލެވޭނެ ކަމަށް މާނިހް ވަނީ ފާހަގަކޮށްފައެވެ.
ގޯލްޑް ސެޓްފިކެޓަކީ ހޮޓެލް ރެސިލިއެންޓުން ރިސޯޓުތަކަށް ދޭ އެންމެ މަތީފަންތީގެ ސެޓްފިކެޓެވެ. މިއީ ފަތުރުވެރިންގެ ރައްކާތެރިކަން ކަށަވަރުކުރުމަށް ރިސޯޓުތަކުންދޭ އަހަންމިޔަތުންކަން ރަމްޒުކޮށްދޭ ސެޓްފިކެޓެކެވެ.
