2017 ވަނަ އަހަރު އައިޖީއެމްއެޗްގައި ފާހާނާ ބަރިިއެއް ހެދުމަށް 4 މިލިއަން ރުފިޔާ ޚަރަދުކޮށްފައިވަނީ މާލިއްޔަތު ގަވާއިދާ ހިލާފަށް: އޮޑިޓް ރިޕޯޓް
އައިޖީއެމްއެޗްގައި ފާޚާނާބަރިއެއް ހެދުމަށް މާލިއްޔަތު ގަވާއިދާ ހިލާފަށް 4،801،599ރ ޚަރަދުކޮށްފައިވޭ
އައިޖީއެމްއެޗްގެ އެމަޖެންސީ ގޭޓް: 2017 ވަނަ އަހަރު މާލިއްޔަތު ގަވާއިދާ ހިލާފަށް ގިނަ ޚަރަދުތަކެއް ކޮށްފައިވޭ
އާންމުން ބޭނުންކުރުމަށް 2017 ވަނަ އަހަރު އައިޖީއެމްއެޗްގައި ހެދި ފާހާނާބަރި ހެދުމަށް 4 މިލިއަން ރުފިޔާ ޚަރަދުކޮށްފައިވަނީ މާލިއްޔަތު ގަވާއިދާ ހިލާފަށް ކަމަށް ހެލްތް މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓް އޮފީހުން އާންމުކޮށްފައިވާ ހެލްތް މިނިސްޓްރީގެ 2017 ވަނަ އަހަރުގެ އޮޑިޓް ރިޕޯޓްގައި ފާހަގަކޮށްފައިވާގޮތުގައި، ޖުމްލަ 4،801،599ރ (ހަތަރު މިލިއަން އަށްލައްކަ އެއްހާސް ފަސްސަތޭކަ ނުވަދިހަނުވަ ރުފިޔާ) ޚަރަދުކޮށްގެން އާންމުން ބޭނުންކުރުމަށް ފާޚާނާ ބަރިއެއް ހަދާފައިވާއިރު، އެ މަސައްކަތް ހަވަލުކުރާނެ ފަރާތެއް ހޯދުމަށް ނޭޝަނަލް ޓެންޑަރ ބޯޑަށް ހުށަހަޅާފައިނުވެއެވެ. ނަމަވެސް މަސައްކަތުގެ އަގު 1،500،00ރ (އެއް މިލިއަން ފަސް ސަތޭކަހާސް ރުފިޔާ)އިން ފެށިގެން މަތީގެ މަސައްކަތްތައް ހަވާލުކުރާނެ ފަރާތެއް ހޯދާނީ، ނޭޝަނަލް ޓެންޑަރ ބޯޑަށް ހުށަހަޅައިގެންކަމަށް ދައުލަތުގެ މާލިއްޔަތުގެ ގަވާއިދުގައި ބަޔާންކޮށްފައިވެއެވެ.
މީގެއިތުރުން، މާލިއްޔަތު ގަވާއިދުގައި ބަޔާންކޮށްފައިވާގޮތަށް، މަސައްކަތުގެ އަގު، ތަކެތީގެ އަގާއެކު، 100،000ރއަށްވުރެ ބޮޑުނަމަ، މަސައްކަތުގެ ޖުމްލަ އަގުގެ 15 ޕަސެންޓަށްވުރެ ބޮޑުނުވާ އަދަދަކަށް އެޑްވާންސްގެ ގޮތުގައި ފައިސާ ދެވިދާނެކަމަށް ބަޔާންކޮށްފައިވެއެވެ. ނަމަވެސް މި މަސައްކަތުގެ ޖުމްލަ އަގުގެ 30 ޕަސެންޓަށްވާ ޖުމްލަ 990،139ރ އެޑްވާންސްގެ ގޮތުގައި ދީފައިވާ ކަމަށް އޮޑިޓް ރިޕޯޓްގައި ފާހަގަކޮށްފައިވެއެވެ. އަދި މާލިއްޔަތު ގަވާއިދުގެ ބަޔާންކޮށްފައިވާ، މަސައްކަތުގެ އަގުގެ 10 ޕަސެންޓަށްވުރެ ބޮޑުނޫން އަދަދެެއް ވޭރިއޭޝަންގެ ގޮތުގައި މަސައްކަތުގެ އަގަށް އިތުރު ކުރެވިދާނެ ކަމަށް ބަޔާންކޮށްފައިވީނަމަވެސް، ވޭރިއޭޝަންގެ ގޮތުގައި ޖުމްލަ އަގުގެ 35 ޕަސެންޓަށްވާ 1،216،725ރ ޚަރަދުކޮށްފައިވާ ކަމަށްވެސް އޮޑިޓް ރިޕޯޓްގައި ފާހަގަކޮށްފައިވެއެވެ.
މީގެއިތުރުން، މާލިއްޔަތު ގަވާއިދާ ހިލާފަށް، އައިޖީއެމްއެޗްގައި ނިއުމެޓިކް ޝޫޓް ހަރުކުރުމުގެ މަސައްކަތަށް 11،912،952ރ (އެގާރަ މިލިއަން ނުވަލައްކަ ބާރަހާސް ނުވަސަތޭކަ ފަންސާސްދެ ރުފިޔާ) ޚަރަދުކޮށްފައިވާ މައްސަލައެއްވެސް އޮޑިޓް ރިޕޯޓްގައި ފާހަގަކޮށްފައިވެއެވެ. އެމަސައްކަތް ކުރުމަށް ބަޔަކާ ހަވާލުކޮށްފައިވަނީވެސް ނޭޝަނަލް ޓެންޑަރ ބޯޑަށް ހުށަހެޅުމަކާނުލާ ކަމަށް އޮޑިޓް ރިޕޯޓްގައި ފާހަގަކޮށްފައިވެއެވެ.
