އައު އަހަރުގެ ފުރަތަމަ 3 ދުވަހު 10،000 އަށްވުރެ ގިނަ ފަތުރުވެރިން ރާއްޖެ އަތުވެއްޖެ

މި އަހަރުގެ ފުރަތަމަ 3 ދުވަސްތެރޭ 10،000 އަށްވުރެ ގިނަ ފަތުރުވެރިން ރާއްޖެ އައިސްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން އާންމުކޮށްފައިވާ ތަފާސް ހިސާބުތަކަށް ބަލާއިރު، މި އަހަރުގެ ފުރަތަމަ 3 ދުވަހު 10،360 ފަތުރުވެރިން ވަނީ ރާއްޖެ އައިސްފައެވެ. ފާއިތުވި ޑިސެމްބަރ މަހުގެ 1 ވަނަ ދުވަހުން 28 ވަނަ ދުވަހުގެ ނިޔަލަށް 87,024 ފަތުރުވެރިން ވަނީ ރާއްޖެ އައިސްފައެވެ. މިއީ 10،883 ފަތުރުވެރިން އިތުރު އަދަދެކެވެ.

ތަފާސް ހިސާބުތައް ދައްކާގޮތުން މިއަހަރުގެ ފުރަތަމަ 3 ދުވަހު ފަތުރުވެރިން އެންމެ ގިނައިން ޒިޔާރަތްކޮށްފައިވަނީ ރަޝިއާއިންނެވެ. އެގޮތުން ރަޝިއާއިން އިން ވަނީ 3,226 ފަތުރުވެރިން ރާއްޖެ ޒިޔާރަތްކޮށްފައެވެ. އަދި ޔޫކްރެއިން ދެވަނާގައި އޮތްއިރު އެޤައުމުން ވަނީ 979 ފަތުރުވެރިން ރާއްޖެއަށް ޒިޔާރަތްކޮށްފައެވެ. އަދި މި 3 ދުވަހު ތިންވަނަ އަށް އެންމެ ގިނަ ފަތުރުވެރިން ޒިޔާރަތް ކޮށްފައި ވަނީ އިންޑިއާ އިންނެވެ. އެޤައުމުން 778 ފަތުރުވެރިން ވަނީ ރާއްޖެ ޒިޔާރަތް ކޮށްފައެވެ.

ރާއްޖޭގެ ބޯޑަރު ހުޅުވާލިފަހުން އިންޓަނޭޝަނަލް އެއަރލައިންތަކުން ރާއްޖެއަށް ދަތުރުކުރާވަރު އިތުރުވެފައިވާއިރު، މިހާރުވެސް 25 އަށް ވުރެ ގިނަ އެއަރލައިނުން ރާއްޖެއަށް ދަތުރުކުރެއެވެ. އަދި ބަލިމަޑުކަމުގެ ސަބަބުން ރާއްޖޭގެ އާންމު މާކެޓްތަކުން ރާއްޖެއަށް އަންނަ ފަތުރުވެރިންގެ އަދަދު ދަށްވި ނަމަވެސް ރާއްޖޭގެ ފަތުރުވެރިކަމަށް އިތުރު މާކެޓްތައް ވަނީ ތައާރަފްވެފައެވެ.

ޓޫރިޒަމް މިނިސްޓްރީގެ އަމާޒަކީ މިއަހަރު 1.5 މިލިއަން ފަތުރުވެރިން ރާއްޖެ ގެނައުމެވެ. ތަފާސް ހިސާބުތައް ދައްކާގޮތުން މިދިޔަ އަހަރު ރާއްޖެއަށް ވަނީ 555،399 ފަތުރުވެރިން ޒިޔާރަތްކޮށްފައެވެ.