ޗައިނާއިން ސިނޮފަރމް ވެކްސިން އާންމުންނަށް ދިނުމުގެ ހުއްދަދީފި
31 ޑިސެމްބަރު 2020 | ބުރާސްފަތި 10:36މި ވެކްސިނަކީ 86 އިންސައްތަ ކާމިޔާބު ވެކްސިނެއް
ޗައިނާގެ ސިނޮފަރމުން ކޮވިޑް-19 އަށް އުފައްދާފައިވާ ވެކްސިން
ޗައިނާގެ ސިނޮފަރމް ކުންފުނިން ކޮވިޑް-19 އަށް އުފައްދާފައިވާ ވެކްސިނަށް އެ ގައުމުން ހުއްދަ ދީފިއެވެ.
ސިނޮފަރމުން އެކުންފުނީގެ ވެކްސިން ޗައިނާގެ އާންމު ރައްޔިތުންނަށް ދިނުމަށް ހުއްދަ ހޯދުމަށް އެދުނު އެދުން ޗައިނާއިން ވަނީ ގަބޫލުކޮށް އެކަމުގެ ހުއްދަދީފައެވެ. އެގޮތުން ވެކްސިނަށް ހުއްދަދިނުމާއެކު، ސިނޮފަރމްގެ ވެކްސިން ވެގެން ގޮސްފައި މިވަނީ ޗައިނާގެ ވެކްސިންތަކުގެ ތެރެއިން އާންމުންނަށް ބޭނުން ކުރުމުގެ ހުއްދަ އެންމެ ފުރަތަމަ ލިބުނު ވެކްސިނަށެވެ.
ސިނޮފަރމުން އެކުންފުނީގެ ވެކްސިން 79 އިންސައްތަ ކާމިޔާބުކަމަށް ބުނެފައިވާއިރު، ޔޫއޭއީގައި ކުރިއަށް ގެންދިޔަ ފޭސް ތިނެއްގެ ކްލިނިކަލް ޓްރަޔަލްތަކުގެ ނަތީޖާ ދައްކާގޮތުން މި ވެކްސިނަކީ 86 އިންސައްތަ ކާމިޔާބު ވެކްސިނެކެވެ.
ސިނޮފަރމުގެ ތަރުޖަމާނަކު ވަނީ ޓެސްޓުތަކުގެ އިންޓަރިމް ނަތީޖާތައް ހާމަކުރާއިރު، ތަފާތުތަކެއް ހުރެދާނެ ކަމަށާއި އެންމެ ފަހުގެ ނަތީޖާ އަދި ހާމަކުރާނެ ކަމަށެވެ.
މީގެ ކުރިން ޗައިނާއިން ވަނީ އިމަރޖެންސީ ހާލަތުގައި ސިނޮފަރމްގެ ވެކްސިން ޖެހުމަށްފަހު ބޭރު ގައުމުތަކަށް ދަތުރުކުރި އެއްވެސް މީހަކަށް ވައިރަހުގެ އަސަރެއް ނުކުރާކަމަށް ބުނެފައެވެ. އަދި ސިނޮފާމުގެ ވެކްސިން އެމެޖެންސީކޮށް ބޭނުންކުރުމުގެ ހުއްދަ ޗައިނާއިން ދީފައިވާއިރު، އެގައުމުގެ ގިނަ ކުންފުނިތަކެއްގެ މުވައްޒަފުންނަށް ވަނީ ވެކްސިން ޖަހާފައެވެ.
ސިނޮފަރމުން ދެ ވެކްސިނެއްގެ މަސައްކަތް ކުރިއަށް ގެންދާއިރު، އެއީ ވޫހާން އިންސްޓިޓިއުޓް އޮފް ބަޔަލޮޖިކަލް ޕްރޮޑަކްޓްސް އަދި ބެއިޖިން އިންސްޓިޓިއުޓް އޮފް ބަޔަލޮޖިކަލް ޕްރޮޑަކްޓްސްއާ ގުޅިގެން އެކުންފުނިން އުފައްދާ ވެކްސިނެވެ.
