ހުޅުމާލޭގައި ހިންގުމަށް ހަމަޖެހިފައިވާ ރަށްވެހި ދަނޑުވެރިކަން ނުވަތަ ކޮމިއުނިޓީ އަރބަން ފާމިންގ މަޝްރޫޢުގެ ދަށުން ހުޅުމަލޭގައި ދަނޑުވެރިކަން ކުރަން ހުޅުވާލި ފުރުސަތަށް ކުރިމަތިލި ފަރާތްތަކުގެ މެދުގައި ގުރުއަތު ނަގައިފައެވެ.
އެގޮތުން ހުޅުމާލޭ ގާޒީ ސްކޫލުގައި ބޭއްވުނު ގުރު ނެގުމުގެ ރަސްމިއްޔާތުގައި ވަނީ ތިން ގިންތިއަކަށް ބަހާލާއިގެން ތިން ދަނޑުވެރިން އެކުލެވޭ ގްރޫޕުތަކުން 16 ގްރޫޕެއް ހޮވާފައެވެ. ހުޅުމާލެ ނެއިބާހުޑް ތިނަކުން ޖުމްލަ 19،877.26 އަކަފޫޓު 16 ޕްލޮޓަށް ބަހާލައިގެން ހުޅުވާލި މިފުރުސަތުގައި 393 ފަރާތަކުން ވަނީ ފޯމު ހުށަހަޅާފައެވެ.
އަންހެނުނަށް ހާއްސަ ކެޓަގަރީއަށް 168 ބޭފުޅުން ފޯމު ލާފައިވާއިރު، "ޒުވާނުން އަދި ނުކުޅެދުންތެރިކަމެއް ހުންނަ" ފަރާތްތަކުގެ ކެޓަގަރީއަށް 78 ފަރާތަކުން ވަނީ ފޯމު ހުށަހަޅާފައެވެ. އަދި "އެހެނިހެން" ކެޓަގަރީއަށް 147 ފޯމު ހުށަހަޅާފައިވެއެވެ.
މި ތިން ގިންތިއަށްވެސް ވަކި ގުރެއް ނެގުނުއިރު، ފުރަތަމަ ގުރު ނަގާފައިވަނީ "އަންހެނުންނަށް" ހާއްސަ ކެޓަގަރީންނެވެ.
މި ކެޓަގަރީން ވަނީ ހަ ގްރޫޕުގެ ނަމްބަރު ނަގާފައެވެ. "ޒުވާނުން އަދި ނުކުޅެދުންތެރިކަމެއް ހުންނަ ފަރާތްތަކަށް ހާއްސަ "ކެޓަގަރީން ފަސް ގްރޫޕް ހޮވުނުއިރު، "އެހެނިހެން" ކެޓަގަރީންވެސް ވަނީ ފަސް ގްރޫޕް ހޮވާފައެވެ. މި ކެޓަގަރީގެ ގުރު ނަގާފައިވާއިރު، އެހެނިހެން، ޒުވާނުން އަދި ނުކުޅެދުންތެރިކަމެއް ހުންނަ ފަރާތްތަކަށް ހާއްސަ ކެޓަގަރީން ހޮވިފައިނުވާ ހުރިހާ ފަރާތްތަކެއްވެސް ހިމަނައިގެން ކަމަށް އެޗްޑީސީން ބުނެއެވެ.
މީގެ އިތުރުންވެސް ކޮންމެ ކެޓަގަރީ އަކުން ވެއިޓް ލިސްޓުގެ ގޮތުގައި އިތުރު ތިން ނަންބަރުވެސް ނަގާފައިވާ ކަމަށާއި އަދި މި މައުލޫމާތުތައއެޗްޑީސީގެ ވެބްސައިޓުގައި ހިމަނާފައިވާ ކަމަށް މައުލޫމާތުދެއެވެ.
މި މަޝްރޫއު ކުރިއަށް ގެންދިއުމުގެ އެންމެ ބޮޑު މަގުސަދަކީ ދަނޑުވެރިކަމުގެ ސިނާޔަތް ކުރިއަރުވައި، ދަނޑުވެރިކަމަށް އަހުލުވެރިކޮށް، އެ ދާއިރާއިން ގިނަ ބަޔަކު ބިނާކުރުން ކަމަށް އެޗްޑީސީން ބުނެއެވެ.
މާލެ ސަރަހައްދުގެ ތޮށްޖެހުން ކުޑަކޮށް ބޯހިޔާވެހިކަމަށް ދިމާވެފައިވާ ދަތިތަކަށް އެދެވޭ ހައްލެއް ހޯދުމުގެ ގޮތުން އެކުލަވަލާފައިވާ ހުޅުމާލެ މާސްޓަރ ޕްލޭނުގެ ދަށުން، ހުޅުމާލެ ތަރައްގީކުރުމަށް ގިނަ މަސައްކަތްތަކެއް ދަނީ ކުރަމުންނެވެ.
އެގޮތުން ހުޅުމާލޭގައި ދިރިއުޅޭ ރައްޔިތުންނަށް ދުޅަހެޔޮ ދިރިއުޅުމެއް އުޅުމުގެ ފުރުސަތު ހޯދައިދިނުމަށް ގިނަ ޕާކުތަކާއި ހުސް ޖާގަތަށް ވަނީ މި ޕްލޭނުގައި ހިމަނާފައެވެ.
އެގޮތަށް ހުންނަށް ހުސްޖާގަތަށް ހެޔޮގޮތުގައި ބޭނުންކޮށް، އަދި ކޮވިޑް19 ގެ ސަބަބުން މާލީގޮތުން އެންމެ ބޮޑު ގެއްލުމެއް ލިބިފައިވާ ފަރާތްތަކަށް ދެމެހެއްޓެނެވި ގޮތެއްގައި އާމްދަނީ ލިބޭން ގޮތެއް ހޯދައިދިނުމަކީވެސް މި މަޝްރޫއުގެ އެންމެ މައިގަނޑު އެއް މަގުސަދެއް ކަމަށް އެޗްޑީސީން ބުނެއެވެ.
