ކަޝްމީރު އިންތިހާބަށްފަހު 75 މީހަކު ހައްޔަރުކޮށްފި
27 ޑިސެމްބަރު 2020 | އާދީއްތަ 03:57ވެރިކަން ކުރާ ބާރިތިޔާ ޕާޓީ (ބީޖޭޕީ)އަށް ލިބިފައިވަނީ 74 ގޮނޑި
ކަޝްމީރުގައި ކުރިޔަށްދިޔަ އިންތިހާބުގައި ވޯޓުލާން މީހުން ކިއު ހަދާފައި
ކަޝްމީރުގެ އިންޑިއާއިން ވެރިކަން ކުރާ ފަޅީގައި ކުރިޔަށްދިޔަ ލޯކަލް ޑިސްޓްރިކްޓް ކައުންސިލް އިންތިހާބަށް ފަހު އެގައުމުގެ 75 މީހަކު ހައްޔަރުކޮށްފިއެވެ.
ކަޝްމީރުގައި ނޮވެމްބަރު މަހުގެ 28 އިން ޑިސެމްބަރު މަހުގެ 19 އާއި ދެމެދު ބޭއްވި ޑިސްޓްރިކްޓް ކައުންސިލް އިންތިހާބަކީ އިންޑިއާއިން އެ ސަރަހައްދަށް ދީފައިވާ ހާއްސަ އިމްތިޔާޒްތައް އުވާލިފަހުން ކަޝްމީރުގައި ބޭއްވި ފުރަތަމަ އިންތިހާބެވެ.
މި އިންތިހާބުގައި ޑިސްޓްރިކްޓް ކައުންސިލްގެ ގިނަ ގޮނޑިތައް ކާމިޔާބު ކޮށްފައިވަނީ ޕީޕަލް އެލަޔަންސް ފޯ ގުޕްކާރު ޑިކްލަރޭޝަން (ޕީއޭޖީޑީ)އިންނެވެ. ޕީއޭޖީޑީއިން ވަނީ ކަޝްމީރަށް އިންޑިއާއިން ދީފައިވާ ހާއްސަ އިމްތިޔާޒުތައް އުވާލުމާއި ދެކޮޅަށް އަޑު އުވާލާފައެވެ. ޑީއޭޖީޑީއިން ވަނީ 280 ގޮނޑީގެ ތެރެއިން 112 ގޮނޑި ކާމިޔާބުކޮށްފައެވެ. އިންޑިއާގެ ވެރިކަން ކުރާ ބާރިތިޔާ ޕާޓީ (ބީޖޭޕީ)އަށް ލިބިފައިވަނީ 74 ގޮނޑިއެވެ.
އިންތިހާބުގެ ނަތީޖާ އިއުލާން ކުރުމާއިއެކު އިންޑިއާއިން ވަނީ ކަޝްމީރުގެ ބައެއް ސިޔާސީ ލީޑަރުންނާއި އެކްޓިވިސްޓުން ހިމެނޭ ގޮތަށް 75 މީހަކު ހައްޔަރުކޮށްފައެވެ. އިންޑިއާ ފުލުހުންގެ އޮފިޝަރަކު ބުނީ 75 މީހުން ހައްޔަރުކުރީ މުޒާހަރާކޮށް ހަމަނުޖެހުން އުފެއްދުމުގެ ބިރު އޮތުމުން ކަމަށާއި އެފަދަ ކަމަކަށް ފުރުސަތު ދެވެން ނެތް ކަމަށެވެ.
