އޭޑީކޭ ހޮސްޕިޓަލުން ވީއައިއޭގައި ކޮވިޑް-19ގެ ޕީސީއާރް ލެބޯޓްރީއެއް ހުޅުވައިފި
26 ޑިސެމްބަރު 2020 | ހޮނިހިރު 08:25މިއީ ކޮވިޑް-19 ޕީސީއާރް ޓެސްޓް ހަދާ އެންމެ މަތީފެންވަރުގެ ފުލީ އޮޓޮމޭޓެޑް ލެބޯޓްރީއެއް
ވެލާނާ އިންޓަރނޭޝަނަލް އެއަރޕޯޓުގައި ފަތުރުތެރިންތަކެއް މަޑުކޮށްލައިގެން
އޭޑީކޭ ހޮސްޕިޓަލާއި، ލަކްސް ރިސޯރޓްސް އަދި ޕީ.އެމް.އޭ ގުޅިގެން، ވެލާނާ އިންޓަރނޭޝަނަލް އެއާރޕޯރޓް (ވީއައިއޭ)ގައި ކޮވިޑް-19 ޕީސީއާރް ޓެސްޓް ހަދާ ޒަމާނީ ލެބެއް ހުޅުވައިފިއެވެ.
އޭޑިކޭއިން ބުނީ މި ލެބޯޓްރީ ގައި ބޭނުންކުރާނީ ޖަރުމަން ވިލާތުގެ ރޯޗްމަރުކާގެ ލައިޓް ސައިކްލަރ 480 ޕީސީއާރް މެޝިން އަދި މެގްނާ ޕިއޯރ އެކްސްޓްރެކްޓަރ ކަމަށެވެ. އަދި މިއީ ދުނިޔޭގައި މިހާރު ކޮވިޑް-19 ޕީސީއާރް ޓެސްޓް ހަދާ އެންމެ މަތީފެންވަރުގެ ފުލީ އޮޓޮމޭޓެޑް ލެބޯޓްރީއެއް ކަމަށް އޭޑީކޭއިން ބުނެއެވެ.
އޭޑީކޭއިން ބުނީ މި ލެބް ހުޅުވުމާއެކު ކޮވިޑް-19 ޕީސީއާރް ޓެސްޓް ހަދަންޖެހޭ ފަރާތްތަކަށް ފަސޭހަތަކެއް ލިބިގެންދާނެ ކަމަށެވެ. މި ލެބް ހުޅުވުމާއެކު ޓީ.އެމް.އޭ ގައި ހުންނަ ފެބްއިން ސާމްޕަލް ނެގުމާ އެކު ރިސޯރޓްސް ތަކުންނާއި ރަށްރަށުން ގެންނަ ސާމްޕަލް ބަލައިގަނެ އަދި ޓެސްޓު ކުރެވޭނެ ކަމަށް އޭޑީކޭއިން ބުނެއެވެ. މީގެ އިތުރުން އެއާރޕޯޓް ފެރީ ޓާރމިނަލްގައި ވެސް ސާމްޕަލް ޑްރޮޕް-އޮފް ޕޮއިންޓެއް ވާނީ ގާއިމްކުރެވިފައެވެ.
މި ލެބް ހުޅުވުމުން އޭޑީކޭ ހޮސްޕިޓަލް މެދުވެރިވެގެން ޕީސީއާރް ޓެސްޓް ހަދާ ކެޕޭސިޓީ ދުވާލެއްގެ މައްޗަށް 2000 ޓެސްޓަށް އިތުރުވެގެން ދާނެއެވެ. އަލަށް ހުޅުވުނު ލެބޯޓަރީއާއި އެކު މަސައްކަތުގެ އެފިށެންސީ އަށް ކުރިއެރުން އައިސްފައިވާކަން ފާހަގަކޮށް އޭޑީކޭއިން ބުނީ ކޮވިޑް-19 ޕީސީއާރް ޓެސްޓް ހަދައިދޭ އަގުތައްވެސް ކުޑަކޮށްފައިވާ ކަމަށެވެ.
އެގޮތުން އޭޑީކޭ ހޮސްޕިޓަލުން ދިވެހިންނަށް ޓެސްޓް ހަދައިދޭ އަގު، 1200.00 ރުފިޔާއިން، 1000.00 ރުފިޔާއަށް ވަނީ ކުޑަކޮށްފައެވެ. އަދި ޓޫރިސްޓުންނަށް ޓެސްޓް ހަދައިދޭ އަގު 80.00 އެމެރިކާ ޑޮލަރުން، 70.00 އެމެރިކާ ޑޮލަރަށް ކުޑަކޮށްފައިވެއެވެ.
