ރާއްޖޭގެ ފަތުރުވެރިކަމުގައި ހަރަކާތްތެރިވާނެ ދިވެހި ބަޓްލަރުން ތަމްރީނުކުރުމުގެ އެމްއޯޔޫއެއްގައި ޓޫރިޒަމް މިނިސްޓްރީ އާއި މޯލްޑިވްސް ބަޓްލަރ އެކެޑެމީއާ ދެމެދު ސޮއިކޮށްފިއެވެ.

ޓޫރިޒަމް މިނިސްޓްރީގެ ފަރާތުން އެމްއޯޔޫގައި ސޮއިކުރެއްވީ ޑިރެކްޓަރ އަދި އެކްޓިންގ ޕަރމަނެންޓް ސެކްރެޓަރީ އަލީ ޝިނާނެވެ. އަދި މޯލްޑިވްސް ބަޓްލަރ އެކެޑެމީގެ ފަރާތުން ސޮއިކުރެއްވީ ޑިރެކްޓަރ މުޙައްމަދު ޔަމާނީއެވެ.

ބުރާސްފަތި ދުވަހު ސޮއިކުރެވުނު އެއްބަސްވުމުގެ ދަށުން ޓޫރިޒަމް މިނިސްޓްރީގެ ފަރާތުން މޯލްޑިވްސް ބަޓްލަރ އެކެޑެމީގެ ސަރޓިފިކެޓް އެންޑޯސްކޮށްދޭނެއެވެ. އަދި މި އެއްބަސްވުމުގެ ދަށުން ބަޓްލަރުން ތަމްރީނުކުރުމާ ގުޅޭ ކަންތައްތަކުގައި ޓޫރިޒަމް މިނިސްޓްރީއަށް މޯލްޑިވްސް ބަޓްލަރ އެކެޑެމީގެ އެހީތެރިކަން ފޯރުކޮށް ދިނުމާއި، ރާއްޖޭގެ ބަޓްލަރ ޓްރެއިނިންގ ކޯސް ހިންގުމާއި، ޓޫރިޒަމް މިނިސްޓްރީއާ ގުޅިގެން ބަޓްލަރ ޕްރޮފެޝަނަށް ދިވެހިންގެ ޝައުގުވެރިކަން އިތުރުކުރުމުގެ މަސައްކަތް ކުރިއަށް ގެންދާނެއެވެ.

ޓޫރިޒަމް މިނިސްޓްރީގައި ބުރާސްފަތި ދުވަހު ބޭއްވުނު އެމްއޯޔޫގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ބަޓްލަރ ޓްރެއިނިންގ ޕްރޮގްރާމަކީ ރާއްޖެއަށް ވަރަށް މުހިންމު ޕްރޮގްރާމެއް ކަމުގައި ޓޫރިޒަމް މިނިސްޓަރ ޑރ. މައުޞޫމް ފާހަގަކުރެއްވިއެވެ. އަދި ބަޓްލަރ ވަޒީފާއަކީ ހުނަރުވެރި، ރަނގަޅު އާމްދަނީއެއް ލިބޭ ވަޒީފާއަކަށް ވާތީވެ، އެކަމަށް ގިނަ ދިވެހިން ކުރިމަތިލާނެ ކަމަށް އުންމީދުކުރައްވާ ކަމަށްވެސް ވިދާޅުވިއެވެ.

ބަޓްލަރ އެކެޑެމީގެ ޑިރެކްޓަރ މުޙައްމަދު ޔަމާނީގެ ވާހަކަފުޅުގައި އަމިއްލަ ފަރާތްތަކަށް ޓޫރިޒަމް މިނިސްޓްރީއާ ގުޅިގެން ހިންގޭ މިފަދަ ޕްރޮގްރާމުތަކުން ދިވެހިންނަށް ވަޒީފާގެ ކުރިއެރުން ލިބުމުގެ ފުރުސަތު ބޮޑުވެގެންދާނެކަން ފާހަގަކުރެއްވިއެވެ. އޭނާ ވިދާޅުވީ ބަޓްލަރުންނަށް ވަރަށް ޑިމާންޑް އަދި ސްކޯޕް ބޮޑު ކަމަށާއި، ބަޓަލަރުންގެ ބައިނަލްއަގުވާމީ ފެންވަރަށް ރާއްޖޭގެ ބަޓަލަރުން ގެންދަން ބޭނުންވާ ކަމަށެވެ.

މަތީ ފެންވަރުގެ ރިޒޯޓުތަކުގައި ގެސްޓުންނަށް ޚިދުމަތް ދިނުމުގައި ބަޓުލަރުން ބޭނުންކުރުމަކީ މިފަހަކަށް އައިސް ވަރަށް މަގުބޫލުކަމެކެވެ.