ވެމްކޯއިން ދެމުންދާ ކުނި ނެގުމުގެ ޚިދުމަތްތަކަށް ބަދަލު ގެނައުމަށް ނިންމައިފި
24 ޑިސެމްބަރު 2020 | ބުރާސްފަތި 10:29މެންދުރުގެ ވަގުތު މާލޭގެ މަގުތަކުގައި ދުއްވާ އުޅަނދާއި، އާންމުން ގިނަ އަދަދަކަށް ހަރަކާތްތެރިވޭ
ވެމްކޯގެ މުއައްޒަފުން ކުނި ނެގުމުގެ ތެރެއިން
ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ)ން ދެމުންގެންދާ ކުނި ނެގުމުގެ ހިދުމަތްތަކަށް ބަދަލު ފެނައުމަށް ނިންމާފައިވާކަމަށް އެ ކޯޕަރޭޝަނުން ބުނެފިއެވެ.
ވެމްކޯއިން ބުނީ ކޮވިޑް-19 އާއި ގުޅިގެން ފުރަމާލެ ސަރަހައްދުގައި އިއުލާންކޮށްފައިވާ ސިއްޙީ ކުއްލި ނުރައްކަލުގެ ހާލަތާއި، ކާފިއުގެ ވަގުތަށް ގެނެވުނު ބަދަލަށް ރިޢާޔަށްކުރުމަށްފަހު، މާލެ ސިޓީ ކައުންސިލްގެ އިސްނެގުމަކަށް މާލޭ ސިޓީގެ ގޭބިސީތަކަށް ފޯރުކޮށްދެމުންދާ ކުނި ނެގުމުގެ ޚިދުމަތްތަކަށް ބަދަލުގެނައުމަށް ނިންމާފައިވާކަމަށެވެ.
ބުރާސްފަތި ދުވަހު އެ ކުންފުނިން ބޭއްވި ނޫސްވެރިންގެ ބައްދަލުވުމެއްގައި ވެމްކޯގެ މެނޭޖިންގ ޑިރެކްޓަރ އާދަމް މުހައްމަދު ވިދާޅުވީ ކުނި ނެގުމުގެ މަސައްކަތް މިހާރު ފޯރުކޮށްދެމުންދާ މެންދުރުގެ ވަގުތަކީ، މާލޭގެ މަގުތަކުގައި ދުއްވާ އުޅަނދާއި، އާންމުން ގިނަ އަދަދަކަށް ހަރަކާތްތެރިވާ ވަގުތެއްކަމަށް ފާހަގަކުރެވިފައިވާ ކަމަށެވެ.
ހަމަ މިއާއިއެކު، ކުނި ބޭލުމަށް ހަމަޖެހިފައިވާ ވަގުތުތައް ފިޔަވައި އެހެންވަގުތު ތަކުގައި މާލޭގެ ބައެއް ސަރަހައްދުތަކުގައި ކުނި ގިނަ އަދަދަކަށް ޖަމާކޮށްފައި ހުންނަ މައްސަލަ އާއްމުވަމުން ދާކަމަށްވެސް އާދަމް ވިދާޅުވިއެވެ. ވުމާއެކު ކުރިއަށް އޮތް ދުވަސްތަކުގައި ސަރުކާރުން ސިއްހީ ކުއްލި ނުރައްކަލުގެ ހާލަތާއި ގުޅިގެން އަޅާފައިވާ ފިޔަވަޅުތަކަށް އިތުރު ލުއިދިނުމަށް މަޝްވަރާކުރަމުންދިޔުމާއި އެކު، ވެމްކޯގެ އޮޕަރޭޝަނަށް ބަދަލުތައް ގެނެއައުމަށް ނިންމާފައިވާކަން އާދަމް ވަނީ ހާމަކުރައްވާފައެވެ.
އެގޮތުން 11 ޖަނަވަރީ، 2021 އިން ފެށިގެން ވެމްކޯގެ ހައުސްހޯލްޑް ޔުނިޓްއިން މާލޭ ސިޓީގެ ގޭބިސީތަކުން ކުނި ނެރެންވާނީ 22:00 އިން 00:00 އާއި ދެމެދުގެ ވަގުތެއްގައި ކަމަށް ވެމްކޯއިން ވަނީ ހާމަކޮށްފައެވެ. އަދި އައު އުސޫލަށް އަމަލުކުރަން ވާނީ ފުރަމާލެ ސަރަހައްދުގެ ތެރެއިން، މާލެ ސިޓީގެ ގޭބީސީތައް އެކަނި ކަމަށާއި ވެމްކޯއިން ޚިދުމަތްތައް ފޯރުކޮށްދޭނީ ކުރިއެކޭވެސް އެއްފަދައިން ޢިމާރާތުގެ ބޭރުން، ދޮރުމަތިންކަމަށް އެ ކުންފުނިން ބުނެއެވެ.
ވެމްކޯއިން އިތުރަށް ބުނީ ވެމްކޯގެ އެއްވެސް މުވައްޒަފަކު އިމާރާތެއްގެ ވަކިވަކި ފަންގިފިލާތަކުން ކުނި ނެގުމަށް ހަމަޖެހިފައި ނުވާކަމަށާއި ސަރުކާރުގެ ފަރާތުން ފުރަބަންދަށް ބޮޑެތި ލުއިތަކެއް ދީފައިވީ ނަމަވެސް، މިހާލަތުގައި ވެސް ރައްކާތެރި ގޮތުގައި ކުނި ބަންދުކުރުމަށާއި އެންގިފައިވާ ވަގުތުގައި ކުނި ބަންދުކޮށްފައި ނެރުމަށް އިލްތިމާސްކުރާކަމަށެވެ. އަދި މިފަދައިން އަމަލުނުކޮށް، އިތުރު ވަގުތުގައި މަގުތަކަށް ކުނި ނެރޭނަމަ، މަގުތައް ގޮނޑުވުމުގެ މައްސަލައަށް އެދެވިގެންވާ ފަދަ ހައްލެއް ނުލިބޭނެ ކަމަށް ބުނެ އެކަން އެގޮތަށް ނުކުރުމަށް ވެމްކޯއިން އިލްތިމާސްކުރެއެވެ.
