މި ދަނޑިވަޅު 20 ރުފިޔާއަށް މަސް ނުގަނެވޭނެ – ޒަހާ
24 ޑިސެމްބަރު 2020 | ބުރާސްފަތި 00:58މިފްކޯއިން މަސައްކަތް ކުރަމުން އަންނަނީ މަސްވެރިންނަށް ލުއި ފަސޭހަ ގޮތްތަކެއް ހަމަޖެއްސުމަށް
މަސްވެރިކަމާއި ބެހޭ ވަޒީރު ޒަހާ ވަހީދު، މަސްވެރިންނަށް ދިމާވެފައިވާ ދަތިތައް ހައްލު ކޮށްދެއްވާނެ ކަމަށް ވަނީ ވިދާޅުވެފައި
މަސް ގަންނަ އެންމެ ކުޑައަގަކީ 20 ރުފިޔާއަށް މި ދަނޑިވަޅު ބަދަލުކުރެވެން ނެތް ކަމަށް މަސްވެރިކަމާއި ބެހޭ ވަޒީރު ޒަހާ ވަހީދު ވިދާޅުވެއްޖެއެވެ.
ބުދަ ދުވަހުގެރޭ ރާއްޖެޓީވީގެ "ފަލަ ސުރުހީ" ޕްރޮގްރާމްގައި ވާހަކަފުޅުދައްކަވަމުން ޒަހާ ވަހީދު ވިދާޅުވީ މި ދަނޑިވަޅު މަސް ގަންނަ އެންމެ ދަށް އަގު 20 ރުފިޔާއަށްވުރެ މަތި ކުރެވެން ނެތް ކަމަށާއި، މި ގޮތަށް އަގު މަތި ނުކުރެވެނީ ބައިނަލްއަގްވާމީ ބާޒާރުގައި މަސް ގަންނަ އަގު ދަށްވުމުން ކަމަށެވެ.
ޒަހާ ވިދާޅުވީ ބައިނަލްއަގްވާމީ ބާޒާރުގައި މަހުގެ އަގު ދަށްވެފައިވާ ދަނޑިވަޅަކު މިފްކޯއަށް ބޮޑު އަގުގައި މަސްގަނެވެން ނެތް ކަމަށާއި، މިފްކޯ އަކީވެސް ކުންފުންޏެއް ކަމަށެވެ. އެހެންކަމުން މިފްކޯ ހިންގުމަށްވެސް ހަރަދުތަކެއް ހިނގާނެ ކަމަށާއި، ކުންފުނީގެ ހަރަދުތައް ދެކޮޅު ޖެއްސުމަށްވެސް ޖެހޭނެ ކަމަށް ޒަހާ ވިދާޅުވިއެވެ.
ޒަހާ އިތުރަށް ވިދާޅުވީ މިފްކޯއަކީ ވަރަށް ގިނަ ސަރަހައްދުތަކުން މަސް ގަންނަ ކުންފުންޏެއް ކަމަށާއި، އެހެން ކުންފުނިތަކާއި ހިލާފަށް މިފްކޯގެ ފްލީޓެއްވެސް އޮންނަ ކަމަށާއި، މިއީ މަސްވެރިންނަށް ވީހާވެސް ލުއި ފަސޭހަ ގޮތްތަކެއް ހެދުމުގެ ބޭނުމުގައި މިފްކޯއިން ކުރަމުން އަންނަ މަސައްކަތްތަކެއް ކަމަށް އެކަމަނާ ވަނީ ފާހަގަ ކުރައްވައިފައެވެ.
ދާދި ފަހުން ފެލިވަރުގައި މަސްވެރިން ވަނީ މައިގަނޑި ހަތަރު ކަމަކަށް ޑިމާންޑްކޮށް އިހުތިޖާޖު ކޮށްފައެވެ. އޭގެ ތެރޭގައި މަހުގެ ހަމަ އަގު 20 ރުފިޔާއަށްވުރެ ދަށް ނުވާނެހެން ދެމެހެއްޓުމާއި، ފެލިވަރުން ލުއި ފަސޭހަ ގޮތެއްގައި މަސްވެރިންނަށް އައިސް ލިބޭނެ އިންތިޒާމުތައް ހަމަޖެއްސުން ހިމެނެއެވެ.
ކޮވިޑްގެ ހާލަތާ ގުޅިގެން ރާއްޖޭގެ މަހަށް އެންމެ ރަނގަޅު އަގު ލިބޭ ޔޫރަޕްގެ ގައުމުތަކުގެ އިގްތިސާދަށް ބޮޑެތި ގޮންޖެހުންތަކެއް ކުރިމަތިވެފައިވާ މި ދަނޑިވަޅުގައި، ދަތުރުފަތުރުގެ ދަތިތަކާއި، ގައުމުތަކުގެ ބޯޑަރު ބަންދު ކުރުމުގެ ސަބަބުން ދިމާވާ ދަތިތައްވެސް ވިޔަފާރީގައި ކުރިމަތިވެފައިވާކަން ފާހަގަ ކުރެވެއެވެ.
