ބްލެޓާގެ މައްޗަށް ކޮރަޕްޝަނުގެ އިތުރު މައްސަލައެއް

ފީފާގެ ކުރީގެ ރައީސް ސެޕް ބްލެޓާގެ މައްޗަށް ކޮރަޕްޝަނުގެ އިތުރު މައްސަލައެއް އެ އިދާރާއިން ފެންމަތިކޮށްފިއެވެ.

ކޮރަޕްޝަނުގެ ތުހުމަތުތަކާ ފިއްތުންތަކާ ގުޅިގެން މިހާރު އުމުރުން 84 އަހަރުގެ ބްލެޓާ ވަނީ 2015 ވަނަ އަހަރު ފީފާގެ ރައީސްގެ މަގާމުން އިސްތިއުފާދެއްވާފައެވެ. އަދި ކޮރަޕްޝަނުގެ މައްސަލަތައް ސާބިތުވެ، އޭނާ ވަނީ 2015 ވަނަ އަހަރުން ފެށިގެން އަށް އަހަރަށް ފުޓްބޯޅައިން ސަސްޕެންޑްކޮށްފައެވެ. އެކަމަކު ފަހުން ކޯޓް އޮފް އާބިޓްރޭޝަން ފޯ ސްޕޯޓްސް (ސީއޭއެސް) އިން ވަނީ އެ ސަސްޕެންޝަނަށް ލުޔެއްދީ ހަ އަހަރަށް ސަސްޕެންޝަން ކުޑަކޮށްފައެވެ.

މި ފަހަރު ފީފާއިން ފެންމަތިކުރި ކޮރަޕްޝަނުގެ މައްސަލައަކީ ސްވިޒަލެންޑުގެ ޒިއުރިކުގައި ހުންނަ ފީފާ މިއުޒިމަކަށް ބްލެޓާގެ ދައުރުގައި ކޮށްފައިވާ ޚަރަދުތަކުގެ މައްސަލައެކެވެ. އެގޮތުން ފީފާއިން ބުނީ ބްލެޓާގެ ދައުރުގައި އެ އިދާރާގެ ބެލުމުގެ ދަށުގައި ނެތް މިއުޒިއަމް ތަރައްގީކުރުމަށް 420 މިލިޔަން ޕައުންޑް ޚަރަދުކޮށްފައިވާ ކަމަށެވެ. އަދި ފީފާއަށް ގެއްލުންވާ ގޮތަށް އެ މިއުޒިމް ދިގު މުއްދަތައް ކުއްޔަށް ދީފައިވާކަންވެސް ފީފާއިން ފާހަގަކުރިއެވެ.

ފީފާގެ ޑެޕިއުޓީ ސެކްރެޓަރީ ޖެނެރަލް އަލްސްޑާ ބެލް ވިދާޅުވީ އެ އިދާރާގެ މިއުޒަމް ތަރައްގީކުރުމަށް ކޮށްފައިވާ ބޮޑު ޚަރަދުގެ ސަބަބުންނާއި، ކުރީގެ މެނޭޖުމަންޓުން މަސައްކަތްކޮށްފައިވާ ގޮތުގެ ސަބަބުން ކަން ހިނގާފައިވާ ގޮތް ދެނެގަތުމަށް ފޮރެންސިކް އޮޑިޓެއް ކުރެވިގެންދިޔަ ކަމަށެވެ. އަދި އެ އޮޑިޓުން ކޮރަޕްޝަނުގެ ގިނަ ކަންތައްތަކެއް ފާހަގަވެގެންދިޔަ ކަމަށްވެސް ވިދާޅުވިއެވެ.

ކޮރަޕްޝަނުގެ ގިނަ ތުހުމަތުތަކެއް ބްލެޓާ މައްޗަށް ކުރެވިފައިވާއިރު، 2015 ވަނަ އަހަރު ބްލެޓާ އާއި ޕްލެޓިނީ ސަސްޕެންޑްކުރަން ނިންމީ މަގާމުގެ ނުފޫޒު ބޭނުންކޮށްގެން ކޮރަޕްޝަންގެ ގޮތުގައި 1.3 މިލިޔަން ޕައުންޑްގެ މުއާމަލާތެއް އެއްބަސްވުމުގެ ބޭރުން ހިންގާފައިވާތީއެވެ. ޕްލެޓިނީއަށް 2011 ވަނަ އަހަރު ބްލެޓާ ދިން 1.3 މިލިޔަން ޕައުންޑަކީ 1998 ވަނަ އަހަރުން ފެށިގެން 2002 ވަނަ އަހަރާއި ހަމައަށް ޕެލްޓިނީ ފީފާގެ ކޮންސަލްޓަންޓެއްގެ ގޮތުން ކުރި މަސައްކަތުގެ އަގުކަމަށް ބުނި ނަމަވެސް، އެކަން އެއްވެސް އެއްބަސްވުމަކުން ފެންނާކަށް ނެތެވެ. އެހެންވެ އެ މައްސަލަ ބެލުމަށް ފަހު ފީފާއިން ނިންމީ ޕްލެޓިނީ އާއި ބްލެޓާ ސަސްޕެންޑް ކުރުމަށެވެ.

އަދި މިދިޔަ އަހަރުވެސް ފީފާއިން ވަނީ ބްލެޓާގެ އިތުރު މައްސަލަތަކެއް މީޑިއާއަށް ހިއްސާކޮށްފައެވެ. އޭގެ ތެރެއިން އެންމެ ގިނަ ބައެއްގެ ލޯ އަމާޒުވީ 2014 ވަނަ އަހަރު ބްރެޒިލުގައި ބޭއްވި ފީފާ ވޯލްޑް ކަޕަށްފަހު ބޯނަހުގެ ގޮތުގައި ބްލެޓާއަށް 12 މިލިޔަން ޑޮލަރު ލިބުނު މައްސަލައެވެ. ބްލެޓާ މައްޗަށް ފީފާއިން ކުރާ އަނެއް ތުހުމަތަކީ ޕެންޝަނުގެ ގޮތުގައި އެކި ފަރާތްތަކަށް ދެވޭ ފައިސާގައި މަކަރާހީލަތްތަކެއް ހަދާފައިވާ ކަމުގެ ތުހުމަތެވެ. އެކަމަކު މި ހުރިހާ ކަމަށް ބްލެޓާ ވަނީ އިންކާރުކޮށްފައެވެ.