ވެސްޓް ހޭމް ބަލިކޮށް ޗެލްސީ ފަސްވަނައަށް

އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ވެސްޓް ހޭމް ޔުނައިޓެޑް ބަލިކޮށް ތާވަލުގެ ފަސްވަނައަށް ޗެލްސީ ޖެހިލައިފިއެވެ.

ހޯމަ ދުވަހުގެރޭ އަމިއްލަ ދަނޑުގައި ކުޅުނު މެޗުން ޗެލްސީ މޮޅުވީ 3-0 ގެ ނަތީޖާއަކުންނެވެ.

މި މެޗުގެ ވަރަށް ކުރީކޮޅު ޗެލްސީން ވަނީ ލީޑު ނަގާފައެވެ. މޭސަން މައުންޓް ނަގައިދިން ކޯނަރަކުން މި ލަނޑު އެ ޓީމަށް ކާމިޔާބުކޮށްދިނީ އިތުބާރު ޑިފެންޑަރު ތިއާގޯ ސިލްވާއެވެ. އޭގެ ފަހުން ނަތީޖާ ހަމަހަމަކުރަން ފުރަތަމަ ހާފުގައި ވެސްޓް ހޭމުން ފުރުސަތުތަކެއް ތަނަވަސްކުރި ނަމަވެސް، މުޅި މެޗުގައިވެސް އެ ޓީމަށް ޗެލްސީގެ ގޯލާ އަމާޒުކޮށް ހަމަލާއެއް އުފެއްދިފައެއް ނުވެއެވެ.

އޭގެ ބަދަލުގައި ޗެލްސީގެ ފަރާތުން ގިނަ ހަމަލާތަކެއް ފެނިގެންދިޔަ މި މެޗުގައި އެ ޓީމުން ލީޑު ފުޅާކޮށްފައިވަނީ 78 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ފޯވާޑް ޓެމީ އަބްރަހަމެވެ. އަދި އޭގެ ދެ މިނެޓު ފަހުން އަބްރަހަމް ވަނީ ޗެލްސީގެ ތިންވަނަ ލަނޑުވެސް ޖަހާފައެވެ.

މި މޮޅާއެކު މީގެ ކުރިން އަށްވަނައިގައި އޮތް ޗެލްސީ ތާވަލުގެ ފަސްވަނައަށް ކުރިއަށް ޖެހިލީ ކުޅުނު 14 މެޗުން ލިބުނު 25 ޕޮއިންޓާއެކުއެވެ. ޗެލްސީގެ ފުލުން ހަވަނައިގައި އޮތް ޓޮޓެންހަމް ހޮޓްސްޕާއަށްވެސް ވަނީ މި އަދަދަށް ޕޮއިންޓް ލިބިފައެވެ. އަދި ޗެލްސީ އަތުން ބަލިވި ވެސްޓް ހޭމް އޮތީ ތާވަލުގެ 10 ވަނައިގައި 14 މެޗުން 21 ޕޮއިންޓާއެކުއެވެ.