ޔޫކޭގައި ވައިރަސްގެ އައު ސްޓްރެއިންއެއް ފެތުރުން: ރާއްޖެއިން ފިޔަވަޅުތައް އިތުރަށް ހަރުދަނާ ކުރަނީ
21 ޑިސެމްބަރު 2020 | ހޯމަ 04:32ވައިރަސްގެ މައުލޫމާތުތައް ރާއްޖެއިންވެސް ގާތުން ބަލަމުންދޭ
އެޗްއީއޯސީގެ ތަރުޖަމާނު ޑރ ނަޒްލާ ރަފީޤު - ޑރ ނަޒްލާ ވަނީ ޔޫކޭގައި ފެތުރެމުންދާ ވައިރަސްގެ އައު ސްޓްރެއިންގެ މައުލޫމާތު ލިބުމާއެކު، ފިޔަވަޅުތައް އިތުރަށް ހަރުދަނާ ކުރަމުންދާކަން ފާހަގަ ކުރައްވާފައި
އިނގިރޭސިވިލާތުން ފެނުނު ކޮރޯނާވައިރަސްގެ އައު ސްޓްރެއިން އާ ގުޅިގެން އެ ޤައުމުގައި ބަލި ކޮންޓްރޯލް ވުމެއްނެތި ފެތުރެމުން ދިއުމާއެކު، އެކަމުން ރާއްޖެއަށް އޮތް ނުރައްކާ ދެނެގަނެ ފިޔަވަޅުތައް ހަރުދަނާ ކުރަމުންދާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
އާދިއްތަ ދުވަހުގެރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމެއްގައި އެ ސެންޓަރުގެ ތަރުޖަމާނު ޑޮކްޓަރ ނަޒްލާ ރަފީޤު ވިދާޅުވީ، އިނގިރޭސިވިލާތުގައި ފެތުރެމުންދާ ވައިރަސްގެ މައުލޫމާތުތައް ރާއްޖެއިންވެސް ގާތުން ބަލަމުންދާ ކަމަށެވެ. އެގޮތުން މިހާރު ހުރި ފިޔަވަޅުތައް އިތުރަށް ތަންފީޒު ކުރުމާއި، ފިޔަވަޅުތައް ހަރުދަނާ ކުރުމުގެ މަސައްކަތްތައް ކުރަމުންދާކަން ޑރ ނަޒްލާ ފާހަގަ ކުރެއްވިއެވެ.
ޑރ ނަޒްލާ ވިދާޅުވީ، އައު ބާވަތެއްގެ ވައިރަސްއެއް ފެތުރެމުންދާކަމަށް ވާހަކަ ދެކެވޭ މި ދަނޑިވަޅުގައި މި ވައިރަސްއިން ރައްކާތެރިވުމަށް މިހާރު އަޅާފައިވާ ފިޔަވަޅުތަކަށްވެސް ޚާއްސަ ސަމާލުކަމެއް ދިނުމަކީ މުހިއްމު ކަމެއް ކަމަށެވެ.
އިނގިރޭސިވިލާތުން ފެނިފައިވާ ވައިރަސްގެ މި އައު ސްޓްރެއިން ވައިރަސްގެ އަސްލަށްވުރެ އަވަސް މިނުގައި ފެތުރެމުން އަންނަ ކަމަށް ބޭރުގެ މީޑިއާތަކުން ރިޕޯޓު ކުރެއެވެ. އެހެންނަމަވެސް ވައިރަސްއަށް މި އައި ބަދަލުގެ ނުރައްކާތެރިކަމުގެ މިންވަރު އަދި މިހާތަނަށް ހޯދިފައެއްނުވެއެވެ.
އިނގިރޭސިވިލާތުގައި މި އައު ސްޓްރެއިން ހަލުވިކަމާއެކު ފެތުރެމުންދާތީ ބައެއް ޤައުމުތަކުން މިހާރު ވަނީ އެ ޤައުމަށް ކުރާ ދަތުރުތައްވެސް ހުއްޓާލާފައެވެ. އެގޮތުން އިނގިރޭސިވިލާތަށް ކުރާ ދަތުރުތައް ހުއްޓާލި ޤައުމުތަކުގެ ތެރޭގައި ސައުދީއަރަބިއާ އަދި ނެދަރލޭންޑްސް ހިމެނެއެވެ.
އެކަމާ ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޑރ ނަޒްލާ ވިދާޅުވީ، ވައިރަސްއާ ބެހޭ މައުލޫމާތުތައް ލިބެމުންދާ މިންވަރަކަށް އެއާމެދު އަޅަންޖެހޭ ފިޔަވަޅުތައް އަޅަމުން ގެންދާނެ ކަމަށެވެ. އަދި ދުނިޔޭގެ ސިއްޙަތު ޖަމިއްޔާ (ޑަބްލިއުއެޗްއޯ) ގެ ފަރާތުންވެސް އެކަމުގެ މައުލޫމާތު ލިބިފައިވާކަން ފާހަގަ ކުރައްވައި ޑރ ނަޒްލާ އިތުރަށް ވިދާޅުވީ، ޓެކްނިކަލް ޓީމުން މިހާރު އެކަމާ ގުޅޭ މަޝްވަރާތައް ކުރަމުންދާ ކަމަށެވެ.
އެކަމާ ގުޅޭގޮތުން ހޯމަ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ވެލާނާ އިންޓަރނޭޝަނަލް އެއަރޕޯޓުގެ ޖެނެރަލް މެނޭޖަރ (ޓަރމިނަލް އޮޕަރޭޝަންސް) އިބްރާޙިމް ހުސައިން ވިދާޅުވީ، އިނގިރޭސިވިލާތަކީ ރާއްޖެއަށް ފަތުރުވެރިން އަންނަ މައިގަނޑު އެއް މާކެޓު ކަމަށާއި، އެ ޤައުމުގައި ވައިރަސްގެ އައު ސްޓްރެއިންއެއް ފެނިފައިވުމާއެކު އެކަން ސަމާލުކަމަށް އައިސްފައިވާ ކަމަށެވެ. އެހެން ނަމަވެސް އަދި މިހާތަނަށް އިނގިރޭސިވިލާތުގެ ފްލައިޓުތައް ހުއްޓާލުމަށް ނިންމާފައިވާކަން އެނގިފައިނުވާކަމަށް އޭނާ ވިދާޅުވިއެވެ.
އިނގިރޭސިވިލާތުން މި އައު ސްޓްރެއިން ދިރާސާކުރަމުން އަންނައިރު އެކަމުގެ މައުލޫމާތު ޑަބްލިޔުއެޗްއޯއާ ހިއްސާކުރަމުން އަންނަ ކަމަށް އެޖަމިއްޔާއިން ވަނީ ބުނެފައެވެ. އަދި މި ސްޓްރެއިންގެ މައުލޫމާތު މެމްބަރު ގައުމުތަކަށާއި އާންމުންނަށް ފޯރުކޮށްދެމުން ގެންދާނެކަމަށް ޑަބްލިޔުއެޗްއޯއިން ބުނެއެވެ.
މި އައު ސްޓްރެއިން އާ ގުޅޭގޮތުން އިނގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވީ ވައިރަސްގެ އަސްލަށްވުރެ 70 އިންސައްތަ އިތުރަށް މި ސްޓްރެއިން އިން ވައިރަސް ފެތުރޭކަމަށެވެ. އެހެންނަމަވެސް މި ސްޓްރެއިން އިން މަރުވާ މީހުންގެ އަދަދު އިތުރުވާކަމެއް އަދި ހޯދިފައިނުވާކަމަށް އޮފިޝަލުން ބުނެއެވެ.
