އަތޮޅުތެރޭގައި ވެސް ވެކްސިން ރައްކާކުރުމުގެ ނިޒާމް ގާއިމް ކުރާނެ: އެޗްއީއޯސީ
21 ޑިސެމްބަރު 2020 | ހޯމަ 02:16ވެކްސިން ރާއްކާކުރުމުގެ ނިޒާމް ގާއިމްކުރުމުގެ ޕްލޭންތައް ކުރިއަށްދޭ- އެޗްއީއޯސީ
އެޗްއީއޯސީގެ ތަރުޖަމާނު ޑރ. ނަޒްލާ ރަފީގު،
މާލެސިޓީއެކޭ އެއްގޮތަށް އަތޮޅުތެރޭގައި ވެސް ކޮވިޑް-19ގެ ވެކްސިން ރައްކާކުރުމުގެ ނިޒާމް ގާއިމް ކުރާނެ ކަމަށް ހެލްތް އިމަރޖެންސީ އޮޕަރޭޝަންސް ސެންޓަރު (އެޗްއީއޯސީ) ބުނެފިއެވެ.
އާދިއްތަ ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އަތޮޅުތެރޭގައި ވެކްސިން ރައްކާތެރިކަމާއެކު ބެލެހެއްޓޭނެ ނިޒާމެއް ނުވަތަ ވެކްސިންގެ ސޭފްޓީ އެޝިއުއަރ ކުރާނެ ގޮތްތައް މިހާރު ޕްލޭން ކުރަމުންދާ ކަމަށެވެ.
ޑރ.ނަޒްލާ ވިދާޅުވީ މާލެއެކޭ އެއްގޮތަށް އަތޮޅުތެރޭގައި ވެސް ވެކްސިން ރައްކާކުރުމުގެ ނިޒާމް ގާއިމްކުރާނެ ކަމަށާއި، މިހާރު ވެސް އާންމުކޮށް ބޭނުން ކުރާ ރޫޓިން ވެކްސިނޭޝަން ޕްރޮގްރާމް ބޭނުން ކުރާ ވެކްސިންތައް އަތޮޅުތެރޭގައި ރައްކާކުރާ ކަމަށެވެ. އަދި އެފިނިހޫނުމިން ބެލެހެއްޓިގެންދާނެ ކަމުގެ ޔަގީންކަން ޑރ.ނަޒްލާ ވަނީ ދެއްވާފައެވެ.
ކޮންމެ ރަށެއްގައި ވެކްސިން ޖަހާނެ ބަޔަކު ތިބޭނެކަން ފާހަގަކުރައްވައި ޑރ.ނަޒްލާ ވިދާޅުވީ ވެކްސިން ޖެހުމަށްފަހު ސައިޑް އިފެކްޓް ފެނިއްޖެ ހާލަތެއްގައި އެކަންކަން ރިކޯޑް ކުރެވި، އިންވެސްޓިގޭޓް ކުރާނެ ކަމަށެވެ. އަދި ވިދާޅުވީ ވެކްސިންއާ ގުޅިގެން ޚާއްސަ ޑޭޓާބޭސް އެއްވެސް ގާއިމް ކުރެވިގެންދާނެ ކަމަށެވެ.
މާލެސިޓީއެކޭ އެއްގޮތަށް އަތޮޅުތެރޭގައި ވެކްސިން ރައްކާކުރުމުގެ ނިޒާމް ގާއިމުކުރާނެކަން އެޗްއީއޯސީން ހާމަކޮށްފައިވާއިރު، ކޮވިޑް-19 އަށް ވެކްސިން ހޯދުމުގެ މަސައްކަތުގައި މިހާރު ކޮވެކްސް ފެސިލިޓީން ރާއްޖޭގެ އާބާދީގެ 20 އިންސައްތައަށް ހިލޭ ވެކްސިން ހޯދުމަށް ހުށައެޅި ހުށައެޅުން ރަސްމީކޮށް ޑަބްލިޔުއެޗްއޯއިން ވަނީ ގަބޫލުކޮށްފައެވެ. އަދި 2021 ވަނަ އަހަރުގެ ފުރަތަމަ ކުއާޓަރުގައި ރާއްޖެއަށް ވެކްސިން ލިބޭނެ ކަމަށް ހެލްތު މިނިސްޓްރީގެ ޗެއަރޕަރސަން އޮފް ސްޓިއަރިންގް ކޮމިޓީ ފޯރ ކޮވިޑް ވެކްސިން، ޑރ. ޝާހު އަބްދުﷲ މާހިރު ލަފާކޮށްފައިވެއެވެ.
