ލެވަންޑޯސްކީ ފަހު ވަގުތު ބަޔާން މޮޅުކޮށްދީފި

ޖަރުމަން ލީގުގައި ހޮނިހިރު ދުވަހުގެރޭ އިތުބާރު ފޯވާޑް ރޮބަޓް ލެވަންޑޯސްކީ ފަހު ވަގުތު ޖެހި ލަނޑާއެކު ބަޔާ ލެވަކޫސެން އަތުން ބަޔާން މިއުނިކް މޮޅުވެއްޖެއެވެ.

ލެވަކޫސެނުގެ ދަނޑުގައި ކުޅުނު މި މެޗުން ބަޔާން މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗުގެ ކުރީކޮޅު ލެވަކޫސެނުން މޮޅު ކުޅުމެއް ދެއްކިއިރު، މެޗުގެ 14 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ އުންމީދީ ފޯވާޑް ޕެޓްރިކް ޝިކްއެވެ. އެކަމަކު ފުރަތަމަ ހާފު ނިމުމުގެ ކުރިން ބަޔާނުން ވަނީ ނަތީޖާ އެއްވަރުކޮށްފައެވެ. ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް މި ލަނޑު ބަޔާނަށް ކާމިޔާބުކޮށްދިނީ ލެވަންޑޯސްކީއެވެ. އަދި މި މެޗުން ބަޔާން މޮޅުވީ މެޗުގެ އިތުރު ވަގުތުގައި ލެވަންޑޯސްކީ ޖެހި ލަނޑުންނެވެ.

މި މޮޅާއެކު އެންމެ ފަހުގެ ޗެމްޕިއަން ބަޔާން ވަނީ ލެވަކޫސެން ފަހަތަށް ޖައްސާލުމަށްފަހު ތާވަލުގެ އެއްވަނައަށް ޖެހިލާފައެވެ. އެގޮތުން ބަޔާނަށް ކުޅުނު 13 މެޗުން 30 ޕޮއިންޓް ލިބުނުއިރު، ދެވަނައަށް ވެއްޓުނު ލެވަކޫސެނަށް 13 މެޗުން ލިބިފައިވަނީ 28 ޕޮއިންޓެވެ.