ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގައި ބޭނުންކުރާ ޝަރުޠުތަކާއި، އުޞޫލުތަކާއި، ގައިޑްލައިންތައް މުރާޖަޢާކޮށްފިއެވެ.
ސިވިލް ސަރވިސް ކޮމިޝަން (ސީއެސްސީ)ން ބުނެފައިވަނީ ސިވިލް ސަރވިސްގެ އިދާރާތަކުން ވަޒީފާތަކަށް މީހުން ހޯދުމާއި ޢައްޔަންކުރުމުގައި ދިމާވެފައިވާ ދަތިތައް ޙައްލުކޮށް، ވަޒީފާއަށް އައްޔަންކުރުމުގެ މަރުހަލާތައް އިތުރަށް ތަފްޞީލުކޮށް ދިނުމުގެ ގޮތުން، އަމަލުކުރަމުންދާ އުޞޫލުތަކާއި މިންގަނޑުތައް އިޞްލާޙުކޮށް، ގައިޑްލައިންތައް އެކުލަވާލާފައިވާ ކަމަށެވެ.
ބަދަލު ގެނެސްފައިވަނީ ސިވިލް ސަރވިސްގެ އިދާރީ އަދި ފަންނީ މަޤާމުތަކުގެ އަސާސީ ޝަރުޠު (7 ވަނަ އިޞްލާޙު) ސިވިލް ސަރވިސްގެ މަޤާމުތަކުގެ ތަޢުލީމީ ރޮނގު އަދި މަސައްކަތުގެ ދާއިރާ ކަނޑައަޅާނެގޮތުގެ އުޞޫލު، ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުތައް 2021 އަދި ސިވިލް ސަރވިސްގެ ވަޒީފާތަކަށް އެސެސްމަންޓް ތައްޔާރުކުރާނެގޮތުގެ ގައިޑްލައިނެވެ.
ސީއެސްސީން ބުނީ މި އުޞޫލުތަކާއި، މިންގަނޑުތަކާއި، ގައިޑްލައިންތަކަށް ޢަމަލުކުރަން ފަށާނީ، 2021 ޖަނަވަރީ 1 ވަނަ ދުވަހުން ފެށިގެން ކަމަށެވެ. އަދި އާ ސަރކިއުލަރ ޢާންމުކުރުމާ ގުޅިގެން، 2020 ޑިސެންބަރު 23 ވަނަ ދުވަހުން ފެށިގެން 2020 ޑިސެންބަރު 31 ވަނަ ދުވަހުގެ ނިޔަލަށް ސިވިލް ސަރވިސްގެ ވަޒީފާތަކަށް އިޢުލާނުކުރުން ހުއްޓާލުމަށާއި، 2021 ޖަނަވަރީ 1 ވަނަ ދުވަހުން ފެށިގެން "ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުތައް 2021" އާ އެއްގޮތަށް އިދާރާތަކުން ސިވިލް ސަރވިސްގެ ވަޒީފާތަކަށް އިޢުލާނުކުރައްވަމުން ގެންދާ ގޮތަށް ކޮމިޝަނުން ނިންމާފައިވާ ގޮތަށެވެ.
2020 ޑިސެންބަރު 23 ވަނަ ދުވަހުގެ ނިޔަލަށް އިދާރާތަކުން ސިވިލް ސަރވިސްގެ ވަޒީފާތަކަށް ކޮށްފައިވާ އިޢުލާނުތަކަށް މުވައްޒަފުން ހޮވުމާއި އައްޔަންކުރުމުގެ މަރުހަލާތައް ކުރިއަށްގެންދާނީ "ސިވިލް ސަރވިސްގެ ވަޒީފާތަކަށް މީހުން ހޮވުމާއި އައްޔަންކުރުމުގެ މިންގަނޑުތަކާއި އުޞޫލުތައް 2018" އާ އެއްގޮތަށް ކަމަށެވެ.
