އެމްއެމްޕީއާރުސީގެ ހިޔާނާތް: ނިހާނުގެ މައްސަލަ ނިންމައި، ދައުވާ ކުރަން ޕީޖީ އޮފީހަށް ފޮނުވައިފި
ނިހާނުގެ މައްޗަށް ދައުވާކުރަން ފޮނުވި މައްސަލާގައި އިތުރުކަމެއް ހިމަނަންޖެހޭތީ އެކަން ފުލުހުންނަށް ވަނީ ދަންނަވާފައި
ޕީޕީއެމް ޕާލަމެންޓްރީ ގްރޫޕްގެ ކުރީގެ ލީޑަރު އަހުމަދު ނިހާނު: އެމްއެމްޕީއާރުސީގެ ހިޔާނާތުގެ ތުހުމަތު ކުރެވޭ ރައީސް ޔާމީންގެ ސަރުކާރުގެ އިސްވެރިއެއް
މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ)ގެ ބޮޑު ހިޔާނާތުގެ މައްސަލައިގައި ތުހުމަތުކުރެވޭ ރައްޔިތުންގެ މަޖިލީހުގެ ވިލިމާލެ ދާއިރާގެ ކުރީގެ މެމްބަރު އަހުމަދު ނިހާނުގެ މައްސަލައިގެ ތަހުގީގު ނިންމުމަށްފަހު ދައުވާ ކުރަން ޕްރޮސެކިއުޓަރ ޖެނެރަލް (ޕީޖީ)ގެ އޮފީހަށް ފޮނުވައިފި އެވެ.
"ރާއްޖެއެމްވީ" އަށް މައުލޫމާތު ދެއްވަމުން ޕީޖީ ހުސައިން ޝަމީމު ވިދާޅުވީ، ނިހާނުގެ މައްސަލައެއް ތަހުގީގީ ނިންމުމަށްފަހު، ދައުވާކުރަން ޕީޖީ އޮފީހަށް ފުލުހުން ހުށަހަޅާފައިވާ ކަމަށެވެ. ނަމަވެސް އެމައްސަލާގައި އިތުރު ބައެއް ހިމަނަންޖެހޭތީ ފުލުހުންނަށް އެކަން ދަންނަވާފައިވާ ކަމަށެވެެ.
ނިހާނަކީ، ކުރީގެ ރައީސް އަބްދުﷲ ޔާމީންގެ ސަރުކާރުން އެމްއެމްޕީއާރުސީގެ ބޮޑު ހިޔާނާތް ހިންގިއިރު، ސަރުކާރު ހިންގި ޕީޕީއެމް ކޯލިޝަނުގެ ޕާލަމެންޓްރީ ގްރޫޕްގެ ލީޑަރެވެ. އެދުވަސްވަރު ނިހާނަށް ކުއްލި މުއްސަނދިކަމެއް ލިބިފައިވާކަން ރައްޔިތުންނަށް ފާހަގަ ކުރެވިގެން އެމްއެމްޕީއާރުސީގެ ހިޔާނާތުގައި ނިހާނުވެސް ބައިވެރިވާކަމުގެ ތުހުމަތު ކުރެވިފައި ވެއެވެ. އެގޮތުން، އަގު ބޮޑު ފްލެޓްތަކާއި އަގު ބޮޑު ކާރުތަކާއި "ރޮލެކްސް" ގަޑީގެ އިތުރުން އާއިލާގެ މުއްސަނދި ދިރިއުޅުމުގެ ވާހަކަތައް ހިމެނެއެވެ.
ނިހާނުގެ މައްޗަށް ކުރެވޭ ތުހުމަތާ ގުޅިގެން އޭނާގެ ޕާސްޕޯޓް ވެސް ވަނީ ހިފަހައްޓާފަ އެވެ. ނިހާންގެ ޕާސްޕޯޓް ހިފަހައްޓައިފައިވާކަން ކޮންޓްރޯލަރ އޮފް އިމިގްރޭޝަން މުހައްމަދު އަހުމަދު ހުސެއިން (ހަނަފީ) ވަނީ "ރާއްޖެއެމްވީ" އަށް ކަށަވަރު ކޮށްދެއްވައިފައެވެ. މިކަމާއި ގުޅިގެން ފުލުހުންގެ މީޑިއާ އޮފިޝަލު ރާއްޖެ އެމްވީއަށް ވިދާޅުވެފައިވަނީ ނިހާންގެ ޕާސްޕޯޓް ހިފަހައްޓާފައިވަނީ އެމްއެމްޕީއާރްސީގެ ހިޔާނާތުގެ މައްސަލަ އާއި ގުޅިގެން ކަމަށެެވެ.
ދާދިފަހުން ނިހާން ވަނީ އެސެޓް ރިކަވަރީ ކޮމިޝަނަށް ހާޒިރުކޮށް ނިހާނުގެ އަގުބޮޑު ގަޑި އަދި ފްލެޓްއާއި ބެހޭ ގޮތުން ސުވާލުކޮށްފައެވެ. "ރާއްޖެއެމްވީ" އަށް މައުލޫމާތު ލިބިފައިވާ ގޮތުގައި ނިހާން ހާޒިރުކޮށް، އޭނާއާ ސުވާލުކޮށްފައި ވަނީ އެމްއެމްޕީއާރްސީ ބޮޑު ޙިޔާނާތާ ގުޅިގެން ކަމަށެވެ. އޭގެ އިތުރުން، ނިހާނުގެ ފްލެޓާ ގުޅޭ ގޮތުން ވެސް ކޮމިޝަނުން ސުވާލުކޮށްފައިވެއެވެ.
މައުލޫމާތު ލިބިފައިވާ ގޮތުގައި ނިހާން ވަނީ ތަހުޤީޤުގައި ވަކީލެއްގެ ފުރުސަތަކަށް އެދިވަޑައިގަންނަވާފައެވެ. އަދި އެ ފުރުސަތު ދިނުމަށް ފަހު ތަހުޤީޤު އެހެން ދުވަހަކަށް ފަސްކޮށްފައިވާ ކަމަށް ބައެއް ނޫސްތަކުން ރިޕޯޓްކޮށްފައިވެއެވެ.
ރައީސް ޔާމީނުގެ ވެރިކަން ނިމުމާއެކު ނިހާނު ވަނީ މި ސަރުކާރު ކޯލިޝަނުގައި ހިމެނޭ ގާސިމް އިބްރާހީމްގެ ޖުމްހޫރީ ޕާޓީއާއި ގުޅިވަޑައިގެންފައެވެ. ނިހާނުއަކީ މިހާރު ޖުމްހޫރީ ޕާޓީގެ އެޑްވައިޒަރުގެ މަގާމުގައި ހުންނެވި ބޭފުޅެކެވެ.
އެމްއެމްޕީއާރުސީ ބޮޑު ހިޔާނާތް ތަހުގީގު ކުރަމުންދަނީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އުފައްދަވާފައިވާ އެސެޓް ރިކަވަރީ ކޮމިޝަނާއި ފުލުހުންގެ އިދާރާ އަދި އެންޓިކޮރަޕްޝަން ކޮމިޝަން ގުޅިގެންނެވެ.
އެމްއެމްޕީއާރުސީގެ ހިޔާނާތުގެ މޭސްތިރިން ކަމަށް ދައުލަތުން ތުހުމަތު ކޮށްފައިވަނީ ރައީސް ޔާމީންގެ އިތުރުން، ކުރީގެ ނާއިބު ރައީސް އަހުމަދު އަދީބާއި އެމްއެމްޕީއާރުސީގެ ކުރީގެ މެނޭޖިންގ ޑިރެކްޓަރ އަބްދުﷲ ޒިޔާތުގެ މައްޗަށެވެ. އަދި މިހިޔާނާތުގެ ރައީސް ޔާމީންގެ ސަރުކާރުގެ އިސްވެރިންގެ އިތުރުން ޕީޕީއެމް-އެމްޑީއޭ ކޯލިޝަނުގެ އިސްވެރިންގެ މައްޗަށް ވެސް ބޮޑެތި ތުހުމަތުތަކެއް ކުރެވެއެވެ.
