މިލާން އެއްވަރު، ޔުވެންޓަސްއަށް މޮޅެއް

އިޓާލިއަން ލީގުގައި އާދީއްތަ ދުވަހުގެރޭ ޕާމާއާ އެއްވަރުވެ އެއްވަނައިގައި އޮތް އޭސީ މިލާނުގެ ލީޑު ތިން ޕޮއިންޓަށް ކުޑަވެއްޖެއެވެ.

އާދީއްތަ ދުވަހުގެރޭ އަމިއްލަ ދަނޑުގައި ކުޅުނު މެޗުން މިލާން އެއްވަރުވީ ޕާމާއާ ވާދަކޮށް ފަހަތުން އަރައި 2-2 ންނެވެ.

މި މެޗު ފަށައިގެން 13 ވަނަ މިނެޓުގައި ޕާމާއިން ވަނީ ލީޑު ނަގާފައެވެ. މި ލަނޑު އެ ޓީމަށް ކާމިޔާބުކޮށްދިނީ ހަނާނީއެވެ. އޭގެ 11 މިނެޓު ފަހުން ސަމުއެލް ކަސްޓިއްޔޭހޯ މިލާނަށް ލަނޑެއް ޖަހައިދިން ނަމަވެސް، އޭނާ އޮފްސައިޑުގައި ހުރުމުން ވީޑިއޯ އެސިސްޓަންޓް ރެފުރީ (ވީއޭއާރް) އިން އެ ލަނޑު ބަލައިގެންފައެއް ނުވެއެވެ.

މި މެޗުގައި ޕާމާއިން ލީޑު ފުޅާކޮށްފައިވަނީ ދެވަނަ ހާފު ފަށައިގެން 11 ވަނަ މިނެޓުގައެވެ. މި ލަނޑު އެ ޓީމަށް ކާމިޔާބުކޮށްދިނީ ޔާސްމިން ކާޓިޗެވެ. އެކަމަކު އޭގެ ދެ މިނެޓު ފަހުން ތެއޯ ހެނާންޑޭސް ވަނީ ލަނޑެއް ޖަހާ މިލާނަށް ފަރަގު ކުޑަކޮށްދީފައެވެ. އަދި މި މެޗުން މިލާން ބަލިނުވެ ސަލާމަތްވީ އިތުރު ވަގުތުގައި ތެއޯ ހެނާންޑޭސް ކާމިޔާބުކުރި ލަނޑުންނެވެ.

އާދީއްތަ ދުވަހުގެރޭ ކުޅުނު މެޗުން މިލާން އެއްވަރުވިއިރު، އެންމެ ފަހުގެ ޗެމްޕިއަން ޔުވެންޓަސް ވަނީ ޖެނޯއާ އަތުން 3-1 ން މޮޅުވެފައެވެ.

ޖެނޯއާާގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ޔުވެންޓަސްއިންނެވެ. މެޗުގެ 57 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ޕައޮލޯ ޑިބާލާއެވެ. އެކަމަކު އޭގެ ހަތަރު މިނެޓު ފަހުން ސްޓެފާނޯ ސްޓުރާރޯ ވަނީ ޖެނޯއާއަށް ނަތީޖާ އެއްވަރުކޮށްދީފައެވެ. މި މެޗުން ޔުވެންޓަސް މޮޅުވީ ކްރިސްޓިއާނޯ ރޮނާލްޑޯ ކާމިޔާބުކުރި ދެ ޕެނަލްޓީންނެވެ. މި މެޗުގައި ރޮނާލްޑޯ ދެ ލަނޑު ޖެހިއިރު، މިއީ ރޮނާލްޑޯ ޔުވެންޓަސްއަށް ކުޅެދިން 100 ވަނަ މެޗެވެ.

މި ނަތީޖާތަކާއެކު މިލާން އެއްވަނައިގައި އޮތީ 11 މެޗުން 27 ޕޮއިންޓާއެކުއެވެ. އެ ޓީމާ ތިން ޕޮއިންޓް ގާތުގައި ދެވަނައިގައި 11 މެޗުން 24 ޕޮއިންޓާއެކު އޮތީ އިންޓަ މިލާނެވެ. އަދި ތާވަލުގެ ތިންވަނައިގައި އޮތް ނާޕޮލީ އާއި ހަތަރުވަނައިގައި އޮތް ޔުވެންޓަސް އަށް 11 މެޗުން ލިބިފައިވަނީ 23 ޕޮއިންޓެވެ.