ޓީސީއަށް މި ފަހަރު އެއްވެސް މެޗެއް ފަސޭހައެއް ނުވާނެ: ޝާޒްލީ
13 ޑިސެމްބަރު 2020 | އާދީއްތަ 14:05މި ސީޒަނަށް ޓީސީން ނުކުންނާނީ ޒުވާން ސްކޮޑަކާއެކު
ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް)
ޓީސީ ސްޕޯޓްސް ކުލަބަށް މި ފަހަރު އެއްވެސް މެޗެއް ފަސޭހަ ނުވާނެ ކަމަށް އެ ޓީމުގެ ކޯޗު މުޙައްމަދު ޝާޒްލީ (ޝާޒް) ބުނެފިއެވެ.
އައު ސީޒަނާ ކުރިމަތިލާއިރު ޓީސީގެ ސްކޮޑަށް ވަނީ ބޮޑު ބަދަލެއް އައިސްފައެވެ. އެގޮތުން މިދިޔަ ސީޒަނުގައި ޓީސީއަށް ކުޅުނު ތަޖުރިބާކާރު ގިނަ ކުޅުންތެރިން އެ ޓީމު ދޫކޮށްލާފައިވާއިރު، މި ސީޒަނަށް ޓީސީން ނުކުންނާނީ ޒުވާން ސްކޮޑަކާއެކުއެވެ.
ދިރާގު ދިވެހި ޕްރިމިއާ ލީގުގައި ދަ ގްރާންޑޭ ސްޕޯޓްސް ކުލަބާ ދެކޮޅަށް ނުކުންނަ މެޗުގެ ކުރިން ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ޝާޒްލީ ބުނީ މި ސީޒަނަށް ނުކުންނައިރުވެސް ޓީސީގެ މެނޭޖުމަންޓުގައި ހަމަނުޖެހޭ ބައިވަރު ކަންކަން އެބަހުރި ކަމަށާއި، އައު ސީޒަނާ ކުރިމަތިލުމަށް ޓީސީގެ މެނޭޖުމަންޓުން މި ފަހަރު ބޭނުންވީ ޒުވާން ސްކޮޑަކާއެކުގައި ކަމަށެވެ. އެކަމަކު ޒުވާން ކުޅުންތެރިންނާއެކު ނުކުތުމަކީ ފަސޭހަ ކަމެއް ނޫން ކަމަށާއި، އެއީ ވަރަށް ބޮޑު ޗެލެންޖެއް ކަމަށްވެސް ޝާޒްލީ ބުންޏެވެ.
ލީގުގެ ފުރަތަމަ މެޗުގައި ޓީސީން ދަ ގްރާންޑޭއާ ދެކޮޅަށް ނުކުންނައިރު، ޝާޒްލީ ބުނީ މިދިޔަ ސީޒަނަށް ވުރެން މި ސީޒަނުގައި ދަ ގްރާންޑޭ ވަރުގަދަ ވާނެ ކަމަށެވެ. އެހެންކަމުން ފުރަތަމަ މެޗަށް ނުކުންނައިރު މި މެޗު ފަސޭހަ ނުވާނެ ކަމަށާއި، އަދި މި ސީޒަނުގައި ޓީސީއަށް ފަސޭހަވާނެ އެއްވެސް ނޯންނާނެ ކަމަށްވެސް ޝާޒްލީ ބުންޏެވެ.
ފުރަތަމަ ޑިވިޝަނުގައި މިދިޔަ ސީޒަނުގައި އަލަށް ވާދަކުރަން ފެށި ދަ ގްރާންޑޭގެ ކޯޗު އިސްމާޢީލް މަހަފޫޒް (އިންމަ) ބުނީ އިދިކޮޅަށް ނުކުންނަ ޓީމެއް އޮތް ހާލަތާ ދޭތެރޭ އެއްވެސް ވަރަކަށް ނުވިސްނާ ކަމަށާއި، އޭނާގެ ވިސްނުން ހުރީ އަމިއްލަ ޓީމުގެ ހާލަތާ މެދު ކަމަށެވެ. އެގޮތުން ދުވަހުން ދުވަހަށް މަސައްކަތް ކުރަނީ ދަ ގްރާންޑޭގެ ފެންވަރު އިތުރަށް ރަނގަޅު ކުރުމަށް ކަމަށްވެސް އިންމަ ބުންޏެވެ.
އިންމަ އިތުރަށް ބުނީ އިދިކޮޅަށް ނުކުންނަ ޓީސީ އަކީވެސް ރާއްޖޭގައި އޮތް އެންމެ މޮޅު އެއް ޓީމު ކަމަށާއި، އެ ޓީމަށް ބަދަލުތަކެއް އައި ކަމުގައިވީ ނަމަވެސް ޓީމެއްގެ ގޮތުގައި ނުކުންނައިރު އެ ފެންވަރު އެ ޓީމަށް ހިފެހެއްޓޭނެ ކަމަށް ގަބޫލުކުރާ ކަމަށެވެ. އެ ޓީމުގައި ޒުވާން ގިނަ ކުޅުންތެރިންތަކެއް ތިބި ނަމަވެސް، ޓީސީއާ ދެކޮޅަށް ނުކުންނާނީ ރާއްޖޭގެ އެންމެ މޮޅު އެއް ޓީމުގެ ގޮތުގައި ދެކިގެން ކަމަށްވެސް އިންމަ ބުންޏެވެ.
ދިރާގު ދިވެހި ޕްރިމިއާ ލީގުގެ ކުޅުން އާދީއްތަ ދުވަހު ފެށިއިރު، ލީގުގައި ޓީސީ އާއި ދަ ގްރާންޑޭ ބައްދަލުކުރާ މެޗު ފަށާނީ ހޯމަ ދުވަހުގެ ހަވީރު 16:00 ގައެވެ.
