ކޮވިޑު-19 އިން ރައްކާތެރި ވުމަށް އެމެރިކާ އިން ރާއްޖެއަށް ތަކެތި ހަދިޔާކޮށްފި
10 ޑިސެމްބަރު 2020 | ބުރާސްފަތި 16:20ޕޯޓަބަލް އޮކްސިޖަން ނިޒާމުގެ ސަބަބުން ސިއްހީ އެހީތެރިންގެ މަސައްކަތް ވެސް އިތުރަށް ލުއިވެގެންދާނެ
އިންޓެންސިވް ކެއާ ޔުނިޓްތަކަށް އެމެރިކާ އިން ތަކެތި ހަދިޔާކުރި ރަސްމިއްޔާތުގެ ތެރެއިން
ދިވެހިރާއްޖެއިން ކޮވިޑް-19ށް އިޖާބަދިނުމަށް ކުރަމުންދާ މަސައްކަތްތަކަށް އެހީވުމުގެ ގޮތުން، އެމެރިކާއިން ރާއްޖެއަށް އަނެއްކާވެސް އެހީވެއްޖެއެވެ.
އެމެރިކާގެ ފަރާތުން ރާއްޖެއަށް ތަކެތި ހަދިޔާ ކުރެއްވީ ސަފީރު އެލައިނާ ބީ ޓެޕްލިޒްއެވެ.
ރާއްޖެއަށް ހަދިޔާކުރި ތަކެތީގެ ތެރޭގައި ހިމެނެނީ އިންޓެންސިވް ކެއާ ޔުނިޓް (އައިސީޔޫ) ގައި ބޭނުންކުރާ އާލާތްތަކެވެ.
ހަދިޔާކުރި ސާމާނުގެ ތެރޭގައި 40 އޮކްސިޖަން ކޮންސެންޓްރޭޓާސް ހިމެނެއެވެ. ހަދިޔާ ކުރި ތަކެތީގެ އަގު 165،000 (އެއްލައްކަ ފަސްދޮޅަސް ފަސްހާސް) އެމެރިކާ ޑޮލަރު އަރާނެ ކަމަށް މައުލޫމާތު ލިބިފައިވެއެވެ.
މިއެހީގެ ސަބަބުން ކޮވިޑް-19ގެ އިތުރުން ފުއްޕާމޭގެ އެހެނިހެން ބަލިތަކަށް ފަރުވާ ހޯދާ ފަރާތްތަކަށް ފަރުވާ ދިނުމުގައި ފަސޭހަތަކެއް ލިބިގެންދާނެއެވެ.
މިއެހީއަކީ އެމެރިކާގެ ޑިޕާޓްމަންޓް އޮފް ޑިފެންސްގެ ފަރާތުން ދިން އެހީއެކެވެ.
ސެޕްޓެމްބަރު މަހުގެ ތެރޭގައި އެމެރިކާއިން ވަނީ އެންމެ ފަހުގެ، ޒަމާނީ 60 ވެންޓިލޭޓަރު ރާއްޖެއަށް ހަދިޔާކޮށްފައެވެ. މިއެހީއަކީ ކޮވިޑް-19އަށް ފަރުވާ ހޯދަމުންދާ ފަރާތްތަކުގެ ފުރާނަ ސަލާމަތްކުރަން ބޭނުންކުރެވޭ މުހިންމު ވަސީލަތެކެވެ.
ކޮވިޑް-19 އާ ގުޅިގެން އިޖުތިމާއީ ޚިދުމަތްތައް ވަރުގަދަ ކުރުމަށާއި އިގުތިސާދީ ކާރިސާއަށް އިޖާބަދިނުމުގައި އެހީވުމަށް އެމެރިކާއިން ވަނީ ރާއްޖެއަށް ގާތްގަނޑަކަށް ތިން މިލިއަން އެމެރިކާ ޑޮލަރުގެ އެހީ ފޯރުކޮށްދިނުމަށް ނިންމާފައެވެ.
