އަންނަ އަހަރު އޭވިއޭޝަން ދާއިރާ "ރިކަވާ އެންޑް ރީބިލްޑް" ކުރެވޭނެ: މިނިސްޓަރު ނަހުލާ
7 ޑިސެމްބަރު 2020 | ހޯމަ 17:28ކޯވިޑް-19 ގެ ޕެންޑެމިކުން އަރައިގަނެ، ޙަރަކާތްތައް ފުޅާވާން ފެށުމާއެކު، ވަޒީފާތަކުގެ ފުރުސަތުތައް ތަނަވަސްވެގެންދާނެ
މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ
އަންނަ އަހަރު ވެގެންދާނީ އޭވިއޭޝަންގެ ދާއިރާ "ރިކަވާ އެންޑް ރީބިލްޑް" ކުރެވޭނެ އަހަރަކަށް ކަމަށް މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާ ވިދާޅުވެއްޖެއެވެ.
ބައިނަލްއަޤްވާމީ މަދަނީ ވައިގެ ދަތުރުފަތުރުގެ ދުވަހާއި ގުޅިގެން މިނިސްޓަރ ނަހުލާ ދެއްވި ޚިޠާބުގައި މިއަހަރުގެ ބައިނަލްއަޤުވާމީ މަދަނީ ވައިގެ ދަތުރުފަތުރުގެ ދުވަސް ފާހަގަ ކުރަމުން މިދަނީ ގްލޯބަލް ޕެންޑެމިކެއްގެ ހިޔަނީގައި މުޅި ދުނިޔެވެސް މަޝްއޫލުވެފައިވާ ދުވަސްވަރެއްގައިކަން ފާހަގަކުރައްވާ ވިދާޅުވީ، ކޯވިޑް-19 ގެ ޕެންޑެމިކުން އަރައިގަނެ، ޙަރަކާތްތައް ފުޅާވާން ފެށުމާއެކު، ވަޒީފާތަކުގެ ފުރުސަތުތައް ތަނަވަސްވެގެންދާނެ ކަމަށާއި އެއާއެކު ޒުވާނުންނަށް ފަހި ފުރުސަތުތައް ހޯދައި ދިނުމުގައި ޓްރާންސްޕޯޓު މިނިސްޓްރީ ދެމި އޮންނާނެ ކަމަށެވެ.
ވަޞީލަތްތައް ފުރިހަމަ އަދި ސިނާޢަތުގެ ޑިމާންޑްތަކާ އެއްވަރަށް ޚިދުމަތްދެވޭ ޒަމާނާ އެއްގޮތަށް ބަދަލުވަމުންދާ ދައުލަތުގެ މުއައްސަސާއެއްގެ ގޮތުގައި ސިވިލް އޭވިއޭޝަން އޮތޯރިޓީ ހެދި ބޮޑުވެގެން ދިއުމަކީ އެކަމުގެ މުހިންމުކަން އިންތިހާއަށް ބޭނުންވެފައިވާ ކަމަކަށްވާއިރު، ޓްރާންސްޕޯޓު އޮތޯރިޓީގެ ހިންގުން އިތުރު ހަރުފަތްތަކަކަށް ގެންދިމުގެ މަސައްކަތް އަންނަނީ ކުރަމުންނެވެ.
މިނިސްޓަރު ނަހުލާ ވިދާޅުވީ، ސަރުކާރުން އެކުލަވާލާފައިވާ ސްޓްރެޓެޖިކް އެކްޝަން ޕްލޭނާ އެއްގޮތްވާ ގޮތުގެ މަތީން ކުރިއަށް އޮތް 5 އަހަރުގެ ސިވިލް އޭވިއޭޝަން އޮތޯރިޓީގެ "ފްލައިޓް ޕްލޭން" މި އަހަރު އިފްތިތާޙު ކުރެވިފައިވާ ކަމަށެވެ. އަދި ވަރަށް ގިނަ ފަރާތްތަކެއްގެ އެހީތެރިކަމާއި އެއްބާރުލުމާއި ބައިވެރިވުމާއެކު އެކުލަވާލެވިފައިވާ މި ޕްލޭންގެ ސަބަބުން ސިވިލް އޭވިއޭޝަން ދާއިރާއަށްއިތުރު ހަރުދަނާކަން ގެނެސްދީ އިތުރު ކުރިއެރުންތަކަށް މަގު ކޮށިގެންދާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، ޓްރާންސްޕޯޓު މިނިސްޓްރީގެ މަސައްކަތްތަކާމެދު ސިނާޢަތާއި ޢާންމު ރައްޔިތުންގެ އިތުބާރު ބޮޑުކުރުމުގެ މައްޗަށް "ފްލައިޓް ޕްލޭން"ގައި އިސްކަމެއް ދެވިފައިވާ ކަމަށެވެ. އަދި މި ނިޒާމުތަކުގެ ސަބަބުން އޮތޯރިޓީގެ ނިންމުންތަކާއި ޙަރަކާތްތައް އިތުރަށް "ސްޓްރީމް ލައިން" ކުރެވި، ދެފުއް ފެންނަ އުޞޫލުތައް މިހާރަށްވުރެވެސް ބޮޑަށް ހަރުދަނާކުރެވިގެން ދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު ވިދާޅުވީ، މިހުރިހާ ބަދަލުތަކާއެކު އަންނަ އަހަރު ވެގެންދާނީ ޚިދުމަތް ހޯދާ ފަރާތްތަކަށް ތަފާތުކަން ފާހަގަ ކުރެވޭނޭ މިންވަރަށް އެ މިނިސްޓްރީގެ މަސައްކަތްތަކަށް ކުރިއެރުން އައިސް ވައިގެ ދަރުތުފަތުރުގެ ސަލާމަތްތެރިކަން ހިންގާ ބެލެހެއްޓުމުގެ މަސަކަތް އިތުރު ދަރަޖައަކަށް މައްޗަށް ޖެހިގެން ދާނޭ އަހަރަކަށް ކަމަށެވެ.
