އަނީސްއަށް ފުލުހުން އަނިޔާކުރިކަން އެނގޭކަށް ނެތް - ސަލާމަތީ ހިދުމަތްތަކާއި ބެހޭ ކޮމިޓީ
މި މައްސަލަ ކޮމިޓީއަށް ހުށަހަޅާފައިވަނީ މަޑުއްވަރީ ދާއިރާގެ މެމްބަރ އާދަމް ޝަރީފު
ސަލާމަތީ ހިދުމަތްތަކާއި ބެހޭ ކޮމިޓީގެ ބައްދަލުވުމެއްގެ ތެރެއިން
ރ މީދޫ ހުސްނުހީނާގެ އަހުމަދު އަނީސް، ރ.މީދޫ ޕޮލިސް ސްޓޭޝަނަށް ހާޒިރުކުރުމަށްފަހު އެ ސްޓޭޝަންގައި މަސައްކަތްކުރާ ފުލުހަކު އޭނާއަށް އަނިޔާކޮށްފައިވާކަމަށް ބުނާ މައްސަލަ ކޮމިޓީން ބެލިއިރު އޭނާއަށް ފުލުހުން އަނިޔާކޮށްފައިވާކަން އެނގެން ނެތްކަމަށާއި އެހެންކަމުން އެ މައްސަލަ ކޮމިޓީން އިތުރަށް ބެލުމުގެ ޖާގައެއް އޮތްކަމަށް ކޮމިޓީއަށް ނުފެންނަކަމަށް މަޖިލީހުން ފާސްކޮށްފިއެވެ.
މި މައްސަލައަކީ އަހުމަދު އަނީސް، ރ.މީދޫ ޕޮލިސް ސްޓޭޝަނަށް ހާޒިރުކުރުމަށްފަހު އެ ސްޓޭޝަންގައި މަސައްކަތްކުރާ ފުލުހަކު އޭނާއަށް އަނިޔާކޮށްފައިވާކަމަށް ބުނާ މައްސަލައެއް ބަލައިދިނުމަށް އެދި މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީއަށް ހުށަހެޅުމުން އެ ކޮމިޓީން ބަލާފައިވާ މައްސަލައެކެވެ. މި ހާދިސާ ހިނގާފައިވަނީ މި އަހަރުގެ އޭޕްރީލް މަހުގެ 20 ވަނަ ދުވަހުއެވެ. މި މައްސަލަ ކޮމިޓީއަށް ހުށައެޅުއްވީ މަޑުއްވަރީ ދާއިރާގެ މެމްބަރ އާދަމް ޝަރީފެވެ. މިކަންތައް ހިނގައިދިޔަގޮތް ކޮމިޓީން ފުލުހުންގެ އިދާރާއިން ސާފުކޮށްފައިވާކަމަށް ކޮމިޓީ ރިޕޯޓްގައި ބުނެއެވެ.
މި މައްސަލަ ކޮމިޓީން ދިރާސާކުރިއިރު ހަ ކަމެއްވަނީ ހޯދާފައެވެ. އޭގެތެރޭގައި ހިމެނެނީ އަނީސްއަށް ފުލުހަކު އަނިޔާކޮށްފައިވާކަމަށް ތުހުމަތުކޮށް އަނީސްގެ ކަންބޮޑުވުން އޮތްކަމަށް ދޭހަވާގޮތަށް ފޭސްބުކްގައި ޝުއޫރު ފާޅުކޮށްފައިވާކަން ފާހަގަކުރެވުމުން ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުގެ އިސްނެގުމަށް އެ ހާދިސާ ތަހުގީގުކޮށްފައިވާކަމަށެވެ.
ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުން މި ހާދިސާ ހިނގައިދިޔަގޮތް ބެލިއިރު، އަނީސްއާއެކު އިތުރު މީހަކު 20 އޭޕްރީލްގެ މެންދުރުގެ ވަގުތެއްގައި މަސްތުވާތަކެތި ބޭނުންކޮށް އެތަކެތި ގެންގުޅޭކަމުގެ މައުލޫމާތު ފުލުހުންނަށް ލިބިގެން އެ ދެ މީހުން ބަނދަރު ސަރަހައްދުން ހުއްޓުވިކަމަށްވެއެވެ. އަދި އެ ދެ މީހުން ބަލާ ފާސްކުރުމުން އަނީސްއަކީ މީގެކުރިން މިފަދަ ތުހުމަތެއް ކުރެވިފައިވާ ފަރާތަކަށް ނުވާތީ އޭނާ ހުއްޓުވުމުން އެކަމުގެ ހިތްހަމަނުޖެހުން ފާޅުކޮށްފައިވާކަން ފުލުހުންގެ ބަހުން އެނގެން އޮތްކަމަށެވެ.
ނަމަވެސް އަނީސްއަކީ މީދޫގައި މަސްތުވާތަކެތީގެ ނެޓްވޯރކްތަކާއި ގުޅުން އޮންނަ އެފަދަ އަމަލުތައް ހިންގުމުގައި ބައިވެރިވުން އޮންނަ ފަރާތެއްކަމުގެ މައުލޫމާތު ފުލުހުންނަށް ލިބިފައިވާކަން ތަހުގީގު ޓީމަށް ލިބިފައިވާ މައުލޫމާތުން އެނގެން އޮންނަކަމަށް ރިޕޯޓްގައި ބުނެފައިވެއެވެ. އަދި ފުލުހަކު އަނިޔާކުރިކަމަށް ތުހުމަތު ކުރިނަމަވެސް އަނީސްގެ މެޑިކޯ ލީގަލް ރިޕޯޓުން އޭނާއަށް އަނިޔާކޮށްފައިވާ އެއްވެސް ނިޝާނެއް ފެންނަން ނެތްކަމަށްވެސް ވެއެވެ.
އޭގެ އިތުރުން ހާދިސާ ހިނގިކަމަށް ބުނާ ވަގުތަކީ އެތަނުގައި އިތުރު ބަޔަކު ތިބި ވަގުތަކަށް ނުވާތީ އަނީސް ބުނެފައިވާފަދަ އަމަލެއް ހިންގުން ދުރުކަމަށް ފުލުހުންގެ ތަހުގީގުޓީމަށް ފެންނަކަމަށް ތަހުގީގަށް ލިބިފައިވާ މައުލޫމާތުން އެނގެން އޮންނަކަމަށް ރިޕޯޓްގައި ބުނެފައިވެއެވެ. އަދި މިކަން ހިނގައިދިޔަ ގޮތަށް ބަލާއިރު ފުލުސް މީހާއާ މެދު ފިޔަވަޅެއް އަޅަން ނުފެންނަކަމަށް ބޯޑުން ނިންމާފައިވާކަމަށްވެސް ރިޕޯޓްގައި ބުނެފައިވެއެވެ.
މި މައްސަލައާ ގުޅިގެން ކޮމިޓީން ހުށައެޅި ތިން ހުށައެޅުމުގެ ތެރޭގައި، މައްސަލަ ކޮމިޓީން އިތުރަށް ބެލުމުގެ ޖާގައެއް އޮތްކަމަށް ކޮމިޓީއަށް ނުފެންނަ ކަމަށްވަނީ ނިންމާފައެވެ. އަދި މިކަމުގައި އިތުރު މައްސަލައެއް އޮތްކަމަށް ފެންނަނަމަ ނޭޝަނަލް އިންޓެގްރިޓީ ކޮމިޝަނަށް ހުށަހެޅުމުގެ ފުރުސަތު އޮތްކަމަށް މައްސަލަ ހުށަހެޅި ފަރާތަށް ދެންނެވުމަށް ކޮމިޓީންވަނީ ނިންމާފައެވެ. މި ރިޕޯޓް ފާސްކުރީ ވޯޓުގައި ބައިވެރިވެވަޑައިގެންނެވި 59 މެމްބަރުންގެ އިއްތިފާގުންނެވެ.
