ޔޫވީގެ އަމާޒު ގަދަ ތިނަކަށް

ކުރިއަށް އޮތް ސީޒަނުގައި ޔުނައިޓެޑް ވިކްޓަރީ (ޔޫވީ) ގެ އަމާޒަކީ ގަދަ ތިނެއްގައި ވާދަކުރުން ކަމަށް އެ ޓީމުގެ މެނޭޖަރު މުޙައްމަދު ފަސީން ރާފިއު ބުނެފިއެވެ.

އައު ސީޒަނަށް ސްކޮޑު ވަރުގަދަ ކުރުމުގެ ގޮތުން ޔޫވީން ވަނީ ބިދޭސީ ހަތަރު ކުޅުންތެރިއަކު އެ ޓީމަށް ގެނެސްފައެވެ. އެ ކުޅުންތެރިންނަކީ ޓީސީ ސްޕޯޓްސް ކުލަބުގައި 2018 ވަނަ އަހަރު މޮޅު ކުޅުމެއް ދެއްކި ކިރްގިސްތާންގެ މިޑްފީލްޑަރު އަނަޓޯލީ ވްލަސީޗޭވް އާއި، މީގެ ކުރިންވެސް ޔޫވީއަށް ކުޅެފައިވާ ކިރްގިސްތާނުގެ ގޯލްކީޕަރު ރުސްލާން އާމިރޯފާއި، ޔޫކްރޭނުގެ ފޯވާޑް ކީރްލޯ ސިލިޗް އަދި ކިރްގިސްތާނުގެ ޑިފެންޑަރު މަރަޓް އަދްޒިނިޔަޒޯފެވެ.

އަދި އެ ޓީމުން ވަނީ ޓީސީ ސްޕޯޓްސް ކުލަބަށް ކުޅެމުން އައި ގައުމީ ފުޓްބޯޅަ ޓީމުގެ މިޑްފީލްޑަރު އިސްމާޢީލް އީސަ (މެސީ) އާއި، ކުލަބު ގްރީން ސްޓްރީޓްސްއަށް ކުޅެމުން އައި ގައުމީ ފުޓްބޯޅަ ޓީމުގެ މިޑްފީލްޑަރު މުޙައްމަދު އާރިފް (ބަކާ) ގެ އިތުރުން، ކުލަބު އީގަލްސްގެ އިސްމާއިލް ފަރުހާދު (ފަރޭ) އާއި އަޙްމަދު ނިޒާމް (ކުޑަ ނިޒާމްބެ) ވެސް އެ ޓީމަށް ގެނެސްފައެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން ޔޫވީގެ މެނޭޖަރު މުޙައްމަދު ފަސީން ރާފިއު ބުނީ މި ހިސާބަށް އައިރު ބޭރު ހަތަރު ކުޅުންތެރިންނާއެކު މިހާތަނަށް ގާތްގަނޑަކަށް 11 ނޫނީ 12 ވަރަކަށް ކުޅުންތެރިން އެ ޓީމަށް ގެނެވިފައިވާ ކަމަށެވެ. އަދި ވަރުގަދަ ޓީމެއް ހެދުމަށް މި ހިސާބަށް އައިރު ބޭނުންވި ކުޅުންތެރިން ލިބިފައިވާ ކަމަށާއި، އެހެންކަމުން މި ފަހަރުގެ ޔޫވީގެ ޓާގެޓަކަށް ލީގުގެ ގަދަ ތިނެއްގައި ވާދަކުރުން ކަނޑައަޅާފައިވާ ކަމަށްވެސް ބުންޏެވެ.

އައު ސީޒަނަށް ޔޫވީން ކުރިމަތިލާއިރު، މި ފަހަރުވެސް އެ ޓީމުގެ ކޯޗަކަށް ހުންނާނީ މިދިޔަ ސީޒަނުގެ މެދު ތެރެއިން އެ ޓިމާ ހަވާލުވި ކޯޗު މުޙައްމަދު އާދަމެވެ. އެކަމަކު މުޙަމަދު އާދަމުގެ އެދުމަކަށް ޔޫވީގެ ފަރިތަކުރުންތަކުގައި ތަޖުރިބާކާރު ކޯޗު އިހުސާން އަބްދުލް ޣަނީ (ސާންތި) އާއި ކުރީގެ މަޝްހޫރު ގޯލްކީޕަރު އިސްމާޢީލް ޒަރިޔަންދު އަންނަނީ ބައިވެރިވަމުންނެވެ.

ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގެ މުޙައްމަދު އާދަމް ބުނީ ތަޖުރިބާކާރު ކޯޗުންގެ ކިބައިން އަބަދުވެސް ކަންކަން ދަސްކުރަމުން އަންނަ ކަމަށާއި، އެގޮތުން ސާތިގެ އިތުރުން ރާއްޖޭގެ ތަޖުރިބާކާރު ގިނަ ކޯޗުންގެ ފަރާތުން އޭނާއަށް ބޮޑު އެއްބާރުލުމެއް ލިބިގެންދާ ކަމަށެވެ. އަދި އެ ޓީމުގެ ކޯޗިންގ ޓީމުގައި ސާންތި އާއި ޒަރިޔަންދު ހަރަކާތްތެރިވަމުން އަންނައިރު، އަދި މިހާތަނަށް އެ މީހުންގެ ފުރިހަމަ އެއްބާރުލުން މުޅި ޓީމަށްވެސް ލިބެމުން އަންނަ ކަމަށް މުޙައްމަދު އާދަމް ބުންޏެވެ.

ވަރުގަދަ ސްކޮޑަކާއެކު ކުރިއަށް އޮތް ސީޒަނަށް ތައްޔާރުވުމަށް ޔޫވީން މިދިޔަ ނިވެމްބަރު މަހުގެ އެއްވަނަ ދުވަހު ފަރިތަކުރުންތައް ފެށިއިރު، ދިރާގު ދިވެހި ޕްރިމިއާ ލީގުގައި ޔޫވީން ކުޅޭ ފުރަތަމަ މެޗުގައި މި މަހުގެ 13 ވަނަ ދުވަހު ނުކުންނާނީ އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ.